BOTHUBO 13

Lot sasu Kututa Shive

1Abram no pa nipu ngo pano pighichekeu eno Lot ishi sasu Ijip yeghi lono Negeb qhalo iqhoe. 2Abram ye atsuaqu eno shuna tsandi pighikeu lono ighono kinimi shi ache. 3Pano Negeb lono iqesusu Bethel kutolo wue, atughulo pa phiki Bethel ngo Ai kuma dolo shikeu alo. 4Pano puzuu khile akumllagho kipti a mulakeu a-lo idesu wu puzu tile Abram no AMPEU mllae.

5Abram gholo Lot chechekeu ghi bheri, ane, amshi eno pagholo ngochekemiqo ishi ache. 6Eno achukumzapu luza kumtsu ghenguno lukumkha shi mo kehu panongu kumtsu ngomla kepu shiuve, kughengu amqo kinikujo lhoxu kumzapu kehu kumtsa ngomlave. 7Ikehu Abram tsu-aqu khemi ngo Lot tsu-aqu khemi dolo mutomushu keu auve. Tipa ghulokilo Kananmi ngo Perizimi no tipa ghakhulo acheke.

8Tile Abram no Lot vilo pi, “Ninguye asholokumike ghenguno nikujo dolo na, itsu-aqu khemi ngo otsu-aqu khemi dolo pinamu mutomushupe kepu kumoe. 9Ayeghi kuchopu ogizulo anike kumo keshea?Tighenguno noye ilauno okuta shiluvelo. Nono piyiu kudau lu aye ino ajeu kudau luni momu nono ajeu kudau wuniepi aye ino piyiu kudau wunie.” 10Ikehu Lot no pishipuwo Jordan khila qha ti Zoar kutolo eno tiye azu nibonilei akeu ithuluve, AMPEU ghutu kimihike momu Ijip yeghi kimihike. Hiye AMPEU no Sodom ngo Gomora phughi puhavetsu mphi zuuke. 11Lot no pasala Jordan ghokiqa kisheluve eno kipelau kudau iqe susu wuve eno panongu lakhino lakhi launo kututa shive. 12Abram ye Kanan yeghilo kughuna ache eno Lot no aqalo aphughi phivilo kughuna acheuve eno Sodom phughi kupunulo pa phiki shipeqhie. 13Ikemu Sodom phughilo akemiqoye AMPEU zulo ighono lhoksakughami eno axinemiqoe.

Abram no Hebron lo Iqewu

14Lot no Abram launo kututa shive kethiu AMPEU no pa vilo pi, “Nono ngo akeua lono ahuu ngo apeu eno kipelau ngo kulolau ishi tsaqui juchho julo. 15Kughengu nono ithulu akeu yeghi qha kumtsu ino no eno otikughuko tsunie, hiye pulhapuju ghengu nongu wu shiniae. 16Ino opiti pesu ayeghi lo asaye jehi shitsuni eno timino ayeghilo asaye kihikhamla ke toi opiti kughukoye kihikhamla peni. 17Ithu puzu ayeghi khipahi kije eno khitohi kushuwa keno iqhoiqi julo kughengu hi kumtsu ino otsuni cheni.” 18Ike Abram no pa phiki xakiqe susu wupuzu Hebron lo Mamre chine subo akeu phivilo kughuna acheuve eno pano tilehi akumllagho kiptia lakhi AMPEU ghenguno shitsu.

Currently Selected:

BOTHUBO 13: SUMIBSI

Highlight

Copy