BOTHUBO 12

Alhou no Abraham Kulu

1AMPEU no Abram vilo ishi pipua, “No ghakhu lono, no sholokumi launo eno opuno kibo lono noye chevelo eno ino opiyeni keu ghakhulo wuvelo. 2Ino otikughuko pesu shiyeh kije shitsunie. Ino okumghatsu puzu oje pipi tsunie, tishianguno noye kutami kumgha kutsuu shipeni.

3Okumghatsu kemiqo ino kumghatsuni. Ikemu oghusho kemiye ino ghushoni. Ovechewo ayeghilo shiyeh kumtsu kumghalupe nani.”

4Ikehu AMPEU no pavilo pike toi Abram no cheve eno pagholo Lot sawue. Abram no Haran qhiveno wuke ghulokilo paye apunu mpe lhotsuni pungu shiae. 5Abram no panipu Sarai ngo pa thikuzuu nu Lot eno Haran lo akelo tinhemgha ngo aquaxemi khije pighiche keno kumtsu sasu Kanan lo wuniye cheve. Panonguno Kanan yeghi tokelo, 6Abram ye Shekhem phu chine alo More chine subo toke kutolo aghakhu hechesu ighie. Tipa ghulokilo Kananmino aghakhulo ache. 7Tile AMPEU no Abram lau peghino pa vilo pi, “Ino otikughuko tsuniye akeu ghakhu hu hike.” Ikehu tipa-alo Abram no AMPEU khuuno pa lau ipeghi keno tipau lau akumllagho kiptia lakhi shipe qhie. 8Tipathiu Bethel phu kipela kudau naghutolo pano iqesusu wue eno Bethel no kulola kudau shi Ai phuno kipela kudau shi ghi tikuma dolo pa phikishipe qhie. Tipa-a loghi AMPEU lau akumllagho kiptia lakhi shipe qhino AMPEU mllae. 9Abram no hule hile iqesusu apeu Negeb qha kudau wue.

Abram no Ijip lo Iqi

10Tipa ghakhulo puqumiye ighie eno achuqupu ithumla mitheve kehu Abram ye apeu Ijip yeghi lo ado kitila ghenguno pokawuve. 11Ijip kupunuve puzu alughi katha iloni ye akelo pano panipu Sarai vilo ishipi, “Ino ithi ani, noye ighono ajukivi totimi lakhie, 12tighenguno kughou Ijipmi no oithuluni keno panonguno ishi pi nani, ‘Hiye pa nipu kena,’ ipi puzu ighiqhiveno osasu wuve nosae. 13Tighenguno ino oqhuiniju ani ke noye ichepue pi pilo, tishianguno oghenguno ipuxu peni eno akivishi iheju penike.” 14Abram no Ijip lughi bocholo iloghi kelo, Ijipmino panipu ye ajukivi kepi jukutouve. 15Kijemi qono li ithuluve eno Farao vilo li jukivi pesu pi eno pawu akighikilo li sasu wuve. 16Li ghenguno Farao no Abram akivishi heju eno bheriqo, aneqo, amshiqo, gadahaqo, aqemiqo eno kemel ngo ishi pesu patsue.

17Ikemu Farao no Abram nipu Sarai luveke ghenguno AMPEU no kusukini kije pashou eno pakibo shou pukutsue. 18Ikelo Farao no Abram ku puzu pi, “Noye ishou hiye kiu shivetsu ani kya? Kushiye liye onipu kepi ivilo pimo kya? 19Kushiye liye ochepue pi ivilo pi puzu ipelo inipu shipeniye saluvepe kya? Onipu hi anike li saluvelo eno chevelo.” 20Farao no pawu timiqo ahza tsupuzu tipaqo pelo Abram ngo pa nipu ngo eno kiu aghikeno kumtsu sasu tipa ghakhu lono puwuve.

Currently Selected:

BOTHUBO 12: SUMIBSI

Highlight

Copy