MARK 8

Jesu’n mi saang li a vaahna

1Huchih hunlaiin mi a tam mahmah va, neeh diing bangmah a nei sih va, Jesu’n a nungjuite a kou a, a kawmvah, 2Mipite tuin ka kawmah ni thum neeh diing nei lou a um ahih taah jiahun ka hehpih mahmah hi; 3Huleh angawl in a inn vah paisah leng lamkal ah a sawlsamkha diing uh; khenkhatte hung na a gamla mahmah ngal a, a chi a. 4Huin a nungjuite’n a dawng va, Koi in hi gamdai ah mihing hizahpi vahna khop tanghou khoi a la diing ahiai? a chi va. 5Huin ama’n; Tanghou beu bangzah na nei viai? chi'n a dong a. Huleh amahun, Sagih, a chi uh. 6Huin ama’n mipite chu tual a tou diingin thu a pia a; tanghou beu sagih chu a la a, kipaahthu a soi a, a balkeeh a, huin a ma va lui diingin a nungjuite kawmah a pia a; huleh amahun mite ma ah a luita uh. 7Huleh nga tawmtakhat zong a nei va; ama’n a vangpiah a, hute zong a ma va lui diingin thu a pia hi. 8Huchi'n a ne va, a vahta uh; huleh a kham val uh neen bawm sagih dim in a luaah uhi. 9Huleh a nete chu mi saang li vel ahi va; huin amahuh a sawlmangta hi.

Pharisaite chiamchihna ngetna, Tol thu hilhchianna

10Huleh amah chu a nungjuite toh kuang sungah a luutpah a, Dalmanutha gam a tungta uh. 11Huleh Pharisaite ahung kuan va, amah ze-etna in, chiamchihna ngen in, amah chu thu ahung dongta uhi. 12Huin amah chu a lungsim in a khuaisa a, Bang diinga tulai khang thahte’n chiamchihna hawl ahi viai? Chihtahzetin ka hung hilh ahi, Hi tulai khang thahte kawmah chiamchihna mawngmawng a kipe sih diing hi, a chi a. 13Huin amahuh nusia in kuang ah a luut kiit a, gaal lehlamah a chiahta hi. 14Huleh nungjuite’n tanghou a keng mangngilh va, tanghou beu khat chauh chih louh kuang ah tanghou dang mawngmawng a nei sih uh. 15Huleh ama’n a kawmvah, Pil vang unla, Pharisaite leh Herod tol lahah kiveeng un, a chi a. 16Huin amahuh chu, Tanghou i neih louh jiah ahi, chi'n a kingaihtuah va. 17Huleh Jesu’n a heet tahin a kawmvah, Bang diinga tanghou na neih louh jiah va kingaihtuah na hi viai? Tutan a hethei lou leh hesiam nailou na hi uh maw? Na lungtang uh taah nalai ahi maw? 18Mit nei ngal a mu lou na hi viai mah? bil nei ngal a ja lou na hi viai mah? huleh he zing lou na hi viai mah? 19Mi saang ngaa laha tanghou beu ngaa ka balkeeh laiin a neen bawm bangzah a tai na luaahdim uh? a chi a Amahun a kawmah, Sawmlenih, a chi va. 20Huleh mi saang li laha sagih ka balkeeh laiin a neen bawm bang jah a tai na luahdim uh? a chi a Amahun, Sagih, a chi va. 21Huin ama’n a kawmvah, Bangchia hesiam lou na hi viai? a chi hi.

Bethsaida a mittaw a suhdamna

22Huleh Bethsaida ahung tung a; a kawmah mittaw khat ahung pui va, amah khoih diingin a ngen uh. 23Huin ama’n mittawpa chu a khut in a tu a, kho polamah a puidoh a; Huleh a mit ah chil a siat a, a tungah khut a koih a, Khua na mu thei ei? chi'n a dong hi. 24Huin amahpa a daahdoh a, Mite chu sing bangin pai in ka mu hi, a chi a. 25Hunungin a mit ah a khut a koih kiit a, a mit a hahsah a; huchi'n ahung damta a, mi chinteng chu chiantahin a mu theita hi. 26Huleh amah chu, Khosung a lah luut sinla, khua a mi koimah zong hilh het sin, chi'n a inn lamah a sawlta hi.

Peter in Jesu chu Khrist ahi chia a phuanna

27Huleh Jesu leh a nungjuite chu a pawtdoh va, Caesarea Philippi khuate ah a chiah va; huleh lampi ah a nungjuite kawmah, Mite’n kei hi koi ka hi ahung chi viai? chi'n a dong a. 28Huleh amahun, Baptistu John ahi, ahung chi uh; hizongleh khenkhatte’n, Elijah ahi, ahung chi uh; huleh a dang in, zawlneite laha khat ahi, ahung chi uhi, chi'n a dawng uhi. 29Huin ama’n a kawmvah, Ahihleh nang un koi ka hi na hung chi viai? a chi a. Huin Peter in a dawng a, a kawmah, Khrist chu na hi, a chi a.

Jesu’n a sih diing leh a thohkiit diing thu a soilawhna

30Huleh ama’n a tanchin koimah hilh lou diingin amahuh a khap a. 31Huleh ama’n a kawmvah, Mihing Tapa in sil tampi a thuaah diing bang, upate leh, siampu lalte leh, lehkhagialtute deih louh a, a um diing bang, thah a, a um diing bang, huleh ni thum ni a, a thohkiit diing haw bang a hilh panta hi. 32Huleh ama’n hu thute chu phuanglaah tahin a soi a. Huin Peter in amah a pui a, a vauta hi. 33Hizongleh amah chu a kihei a, a nungjuite a en a, Peter chu a vau a, Setan, ka nungah pai in, nangma’n Pathian silte ngaihtuah louin, mihing silte na ngaihtuah zaw hi, a chi hi.

Hinkhua man daan dihtah

34Huleh ama’n mipite leh a nungjuite a kou a; a kawmvah, Mi koipouh in ahung juih nuam inchu, amah gimthuaah poisa louin, a kros pua in hung jui heh, 35Ajiahchu mi koipouh a hinna humbit tum in a taan diing a; hizongleh mi koipouh keimah leh Tanchinpha jiaha, a hinna taan in a humbit diing hi. 36Bang jiahin ahiai i chih leh mi’n khovel a pum in nei henla, amah hinna taan ngal leh bang a phatuam diai? 37Ahihlouleh, mi’n a hinna luang in bang a pe diai? 38Hujiahin mi koipouh tulai khang thah aangkawm haat leh giloute laha keimah leh ka thu zumpih chu mihing Tapa in zong angel siangthoute toh a Pa loupina a ahung chiangin, hu mi chu a zumpih ve diing hi, a chi hi.

Currently Selected:

MARK 8: SIMTBSI

Highlight

Copy