MARK 7

Jesu’n Pharisaite a taina

1Huin Jerusalem khua a kipan a hung Pharisaite leh lehkhagialtu koite aha a kawmah a hung va. 2Huleh amahun, a nungjuite khenkhat in khut niin pum a, chihchu khut sil lou a an a neeh uh a muh un, dih a sa sih va. 3Ajiahchu Pharisaite leh Judate zousiah in upate thugousiah a juih zing jiahun, a khut uh hoihtah a sil louin an a ne ngei sih uhi. 4Huleh dawl mun apat ahung chiangun, kisilzet louin an a ne sih uhi. Huleh thudang tampi juih diing a a muh uh a um a, hute chu noute, beelte, sumbeelte sil bang ahi. 5Huin Pharisaite leh lehkhagialtute’n, Bang diinga na nungjuite’n upate thugousiah banga um lou a, khut silou a an ne ahi viai? chi'n amah a dong va. 6Huin ama’n a dawng a, a kawmvah, Isaiah in nanguh milepchiahte thu ana soilawh dihten hi, Hi mite’n a muuh un ahung paahtawi va, hizongleh a lungtang uh kei apatin a gamla hi. 7Bang hitaleh a thuhilhna va mihing thupiahte a hilh jiahun, ahung biah u’chu a thawn ahi, chih gelh bangin. 8Ajiahchu nangun Pathian thupiah paampaih in, mihing thugousiah na tu uh; beelte leh noute sil bang; huleh a dang tampi huchibang silte na hawl uhi, a chi a. 9Huleh ama’n a kawmvah, Na thugousiah uh na juih theihna diingun Pathian thupiah tangtahin na paampaih uhi. 10Ajiahchu Mosi in, Na pa leh na nu zahbawl in; koipouh a pa aha, a nu aha housia chu si jiang heh, a chi a. 11Hizongleh nangun, Mi'n a pa aha, a nu aha kawma, Ka vanga na phattuamna diing uh Korban ahita, a chih inchu, (huchu Pathian kawma piah chihna ahi), amah chu a zalen diing, na chi uh. 12Huleh amah chu a pa aha, a nu aha diing a bangmah a bawlsah na phal sih uh; 13Na thugousiah uh mi na piahsawn un Pathian thu bangmahlou na suahsah uhi; huleh huchi bang sil tampi na hawl uhi, a chi a. 14Huin ama’n mipi zousiah a kawmah a kou a, a kawmvah, Na bawnun ka thu ngaikhia unla, hesiam un; 15Mihing polam apat a, a sunga luut a, amah subuah thei bangmah a um sih; hizongleh amah apat a hung pawt silte, hute ngei chu mihing subuah ahi zaw hi. 16Mi koipouh jahna diing a bil nei in ja heh, a chi a. 17Huleh ama’n mipi nusia a innsung a, a luut zohin, a nungjuite’n hu tehkhinthu amah a dongchianta va. 18Huin ama’n a kawmvah, Nanguh zong huchi lawm a heetsiam na bei na hi uh maw? Bang sil hitaleh polam a kipan a mihing sunga luut in amah a subuah thei sih; 19Ajiahchu a lungtang sunga luut lou a, a gil sunga luut zaw a, neeh chinteng susiang a dailenna a pawtkhemei ahi chih he lou na hi viai mah? a chi a. 20Huleh ama’n, Mihing sunga kipan a hung pawt, hu ngei in mihing a subuah hi; 21Ajiahchu sunglam a, mihing lungtang a kipanin, ngaihtuahna giloute, aangkawmnate, thanghuainate, tualthahnate, 22Guuhtaatnate, huaihamnate, giitlouhnate, heemhaatnate, bevennate, kimitsiipnate, soisiatnate, kiletsahnate, leh ngolhuainate bang ahung pawt veu hi; 23Hi sil gilou zousiah chu sunglam apat hung pawt in mihingte a subuah veu hi, a chi hi.

Jentel numei tanu suhdamna

24Huin a thoua, hu a kipanin Tura leh Sidon gam kual sungah a chiahta a, inn khat ah a luut a, koimah heet diing a deih sih a; hizongleh a kiphual zou sih hi. 25Huchi'n numei khat, a tanu naupang khat dawiniin paai ahi a, a tanchin ana ja a, huleh a hung a, a keeng bulaha bohkhup a. 26Hu numeinu chu Grik mi ahi a, nam lam thu ah Sirophoniki mi ahi; amahnu in a tanu sunga dawi nohdohsah diingin a ngen hi. 27Hizongleh Jesu’n amahnu kawmah, Tate hung vah phot u’heh; tate tanghou laahsah a uite kawma piah a kilawm sih, a chi a. 28Huin amahnu in a dawng a, a kawmah, Hih zaw ahi, Lalpa, ahihvangin dohkaan nuaia uite’n zong tate anneng kia a ne veu uhi, a chi a. 29Huin ama’n amahnu kawmah, Na thusoi jiahin chiahta in; dawi chu na tanu sunga kipanin a pawtta hi, a chi a. 30Huleh amahnu a inn ahung tunin dawi chu a na pawtdohta a, a tanu, lupna a lum ahung muta hi.

Mi bilngong leh haamthei lou suhdamna

31Huleh Tura leh Sidon gam kual sung apat pawt kiit in, Dekapoli gam lai tawnsuah peh in Galili diil ahung tungta a: 32Huleh mi bilngong, haam zong haamchian thei lou khat a kawmah ahung pui va; a tunga a khut nga diingin a ngen va. 33Huin ama’n mipi lah apatin amah a puituam a, a khutzung in a bil sungte a khoih a, huin chil a siat a, huleh a lei a khoih a; 34Huin vaan lam en in a haaihuai a, a kawmah, Ephphatha, a chi a, huchu, Kihong in, chihna ahi. 35Huin a bilte ahung vang a, a leigui a kiphel a, huleh siangtahin a haam theita hi. 36Huleh ama’n koimah hilh lou diingin amah uh a khap a; hizongleh a khap nah pouh leh a soi phuang zaw sem uhi. 37Huleh soi theih louh khopin thumah a sa va, Ama’n sil zousiah a bawl hoih ta; bilngong lah khua a jasah a, huleh haamthei lou laha haamsahta, a chi uhi.

Currently Selected:

MARK 7: SIMTBSI

Highlight

Copy