MARK 6

Nazareth a Jesu a huatna uh

1Huleh hu a kipanin a pawt a, amah gam lamah a hung a; huleh a nungjuite’n amah a jui uhi. 2Huleh khawlni ahung hihin, kikhopna inn ah thu a hilh panta a; huleh mi tampi a thuhilh jate’n limdang a sa va, Hipa’n hi thute khoi apat a muh ahiai? a kawma pilna kipia bang pilna hi a, a khut in hichitah a sil loupi a bawl hi bangchidan ahiai? 3Amah hi Mari tapa, Jakob leh, Josse leh, Juda huleh Simon unaupa, sing kuang bawltu khu hilou amaw? A sanggamte hi ah i kawmah um hilou ahi u'maw? a chi va. Huchi'n a tungah a lungkimta sih uhi. 4Hizongleh Jesu’n a kawmvah, zawlnei chu amah gam sung leh, amah innkuante lah leh, amah innsungah chih louh zahbawl louhin a um ngei sih hi, a chi a. 5Huleh mi damlou tawmtakhatte tunga khut nga a, a suhdam chih louh hutahah sil loupi mawngmawng a bawl thei sih hi. 6Huleh ama’n a gintaat louh jiahun limdang a sa mahmah hi. Huleh khuate a thuhilh in, a chiah lehleh hi.

Sawlleh sawmlenihte natoh

7Huleh ama’n sawmlenihte a kawmah a kou a, nih nihin a sawldoh a; huleh dawiniinte tunga thuneihna zong a pia hi. 8Huleh a zinna va diingin chiangphut chih louh bangmah, kawljal hileh, tanghou hileh, dangka ip sunga zong sum keng lou diingin thu a pia hi. 9Hizongleh keengtophah chu but unla; huleh puannaah nih silh sih un, a chi a. 10Huleh ama’n a kawmvah, Khoi munah zong na tunna inn phot vah, hu apat na pawt masiah un umden un. 11Huleh koi hizongleh ahung tunsah louh va, na thu u’zong a ngaihkhiah louh uleh hu apat na pawt chiangun amah uh heetsahna diingin na keengtaw va leivui thingkhia un. Chihtahzetin ka hung hilh ahi, Vaihawmni chiangin hu khua thuaah diing sangin Sodom leh Gommorrah thuaah chu a dan a um zaw diing, a chi a. 12Huin a kuandohva, Mite chu a kisiih diing uh ahi chih thu a soi uhi. 13Huleh dawi tampi a nohdoh va, damlou tampi thau nuh in a sudam jel uhi.

Baptistu John sihna

14Huleh kumpipa Herod in a tanchin ana ja a; (a min a than taah jiahin), Baptistu John misi laha kipan in ahung thou kiitta a, hujiahin sil loupite bawl theihna amah ah um in ahung kilang ahi, a chi a. 15Midangte’n, Elijah ahi, a chi va. Huleh mi dangin, zawlnei ahi, zawlneite laha khat ahi, a chi va. 16Hizongleh Herod in chu, A lu ka tansahpa John ngei ahi; misi lah apat ahung thou kiit ahi, a chi hi. 17Ajiahchu Herod in a unaupa Philip ji Herodia a kiteenpih taah jiahin Herodia jiahin mi a sawl a, John chu a mansah a, huleh amah chu kaan in suangkul aha khumta hi. 18Ajiahchu John in Herod kawmah, Na unaupa ji na kiteenpih daan ngei ahi sih, ana chi hi. 19Hujiahin Herodia in amah a mudah a, thah a ut a; hizongleh a that thei sih. 20Ajiahchu Herod in John chu midihtat leh siangthoutah ahi chih a heet jiahin a lau a, a huuh veu a; a thu a jahin a lungdong a, hizongleh kipaahtahin a ngaikhe jel hi. 21Huleh lemtaan ni khat ahung tung a, Herod in a pi ani in a mi loupite, a sepaihliante, huleh Galili gam a mi liante a diingin jan ankuang a lui a; 22Huin Herodia tanu ahung luut a, a laam a, Herod leh a kawma pute a kipaahsahta a, kumpipa’n nungaah naupangnu kawmah, Na deihdeih ngen in ka hung pe diing, a chi a. 23Huleh amahnu kawmah, Na hung nget photmah, ka gam kimkhat tan in ka hung pe diing, chi'n a kichiam a. 24Huin amahnu chu a pawt a, a nu kawmah, Bang ka ngen diai? a va chi a; Huleh amahnu in, Baptistu John lutang, ana chi a. 25Huin amahnu chu kumpipa kawmah kintahin ahung luutpah a, Baptistu John lutang tu mahmahin kuang khat in hung pe lechin ka ut, chi'n a ngen a. 26Huin kumpipa chu a lungkham mahmah a; hizongleh a kichiamnate leh, a kawma pute jiahin a nial nuam sih a. 27Huleh kumpipa in a that diingin mi khat a sawlpah a, a lutang hung tawi diingin thu a pia a; huleh amah chu chiah in suangkul sungah a lutang a va tanta hi. 28Huleh a lutang chu kuang khat in ahung tawi a, nungaah naupangnu a peta a; huin hu nungaah naupangnu in a nu kawmah a peta hi. 29Huleh a nungjuite’n hichu a jah tahun a hung va, a luang ahung la va, haan ah a vuita uhi.

Sawllehte hung kilehkiitna

30Huleh sawllehte chu Jesu kawmah ahung kikhawm va, a silbawlte zousiah uleh a thuhilhnate uh ahung hilh va. 31Huin ama’n a kawmvah, Nanguh chauhin hung unla, munsip ah tomkhat hung khawl phot un, a chi a; ajiahchu huah mi ahung paileh a tam jiahin an nasan a ne man sih uhi.

Mipi saangngaa vaahna

32Huleh amahuh chu kuang in mun sipah a tuam chiahta va, 33Huleh mipite’n a chiah lai uh a mu va, mi tampi in amah a he va, khopi chin a kipan keeng in ahung tai va, ana makhelh in a kawmah ahung paikhawmta uhi. 34Huleh Jesu’n ahung pawtdoh in mipi nasatah a muta a, a chingtu bei belaam bang ahihjiahun a hehpih mahmah a; thu tampi a hilh panta hi. 35Huin ni a vaigeih mahmah tahin a nungjuite a kawmah a hung va, Hi gamsip mun ahi a, hun laha vaigeita a; 36I kimvela loute leh khuate a va chiah a, an neeh diing a kilei theihna diingun amahuh sawldoh in; neeh diing bangmah laha nei ngal sih va, a chi va. 37Ama’n a dawng a, a kawmvah, Nangun neeh diing pia un, a chi a. Huin amahun a kawmah, Tanghou makhai za nih man va lei in, neeh diing ka pe diing uh maw? a chi va. 38Ama’n a kawmvah, Tanghou beu bangzah na nei viai? va endih vua, a chi a. Huin amahun a neih jah uh a heet tahun, Beu ngaa leh nga nih, a chi va. 39Huleh ama’n mi zousiah hampa hing tunga a lawilawi a tousah diingin thu a pia a. 40Huin amahuh a gualgual in, za khatkhat bang, sawmngaa ngaa bangin a touta va. 41Huleh ama’n hu tanghou beu ngaa leh nga nih chu a laah zohin vaan lam a en a, a vangpiah a, tanghou te chu a balkeeh a, a ma va luisah diingin a nungjuite kawmah a pia a; huleh nga nihte zong a bawn va lahah a hawmsah suahta hi. 42Huleh amahun a bawnun a ne va, a vah chiatta uhi. 43Huleh tanghou neente leh nga neente chu bawm sawmlenih dimin a luaah uh. 44Huleh tanghou nete chu mi saang ngaa vel ahi uhi.

Jesu tuipi tunga keeng a, a pai

45Huleh ama’n mipi a hahkhiah sungin a nungjuite chu gaal lehlam a Bethsaida khua a na chiah masa diingin kuang ah a tuangsahpah a. 46Huleh amahuh a sawlkhiah zohin haamtei diingin taang ah a chiahta hi. 47Huleh nitaah lam ahung hihin, kuang chu diil laiah a umta a, amah chu a ngen in tual tungah a um a. 48Huleh ama’n amahuh chu huihin a lehlamlam a, a nam jiaha kuang jap a, a mangbat uh a mu a; huleh kho vaah kuan la min amah chu diil tunga a keeng a pai in a kawmlam uh ahung zu an a, amahuh paipeel a tum a. 49Hizongleh amah chu diil tunga keenga pai a muh un siha khat hiinte, a chi va, a kikoudoh uh. 50Ajiahchu a bawnun amah a mu va, a buaita uhi. Huin amahuh a houpihpah a, Ha muangtah in um un; kei ka hi; lau sih un, a chi a. 51Huleh kuang ah a kawmvah a tuangdoh a; huih chu a tawpta hi. Huin amahun soi theih louh khopin limdang a sa mahmah uh. 52Ajiahchu amahun tanghou silmahte bang a he nawn sih uhi, a lungtang uh ana ngon taah jiahin.

Genesaret a damnate

53Huleh gaal lehlam a kai un, Genesaret gam a tung va, luipang ahung zu an va. 54Huleh kuang a kipan a pawtdoh un mite’n amah ana hepah uh, 55Hu gam sung pumpi ah a tai kimvel va, amah a um hi chih a heetna tan vah damloute a lupna un ahung zawng uhi. 56Huleh khoneute leh, khopite leh louzau bang, khoi munah zong a luutna photah, damloute chu kotzing bangah a lumsah va, a puanmong beeh khoih theih a ngen va, huleh amah khoih pouhmah chu a dam jel uhi.

Currently Selected:

MARK 6: SIMTBSI

Highlight

Copy