MARK 3

Mi khutzeng suhdamna

1Huleh amah chu kikhopna inn ah a luut kiit a; huah mi khutzeng khat ana um a. 2Huleh amah a heeh theihna diingun, khawlni a, a suhdam leh suhdamlouh a ensim va. 3Huleh ama’n khutzengpa kawmah, Dingdoh in, a chi a. 4Huleh ama’n a kawmvah, Khawlni in sil hoih bawl aha siang, ahihlouhleh sil hoihlou bawl? hutdam aha siang, ahihlouhleh suhlup? a chi a. Hizongleh amah uh a sip chiat va. 5Huleh ama’n a lungtang khauhdan uh poisatahin, lungthah pum a, a et kimvel nungin, hupa kawmah, Na khut zandoh in, a chi a. Huleh ama’n a zandoh a: huchi'n a langkhat bangin a damta hi. 6Huleh Pharisaite chu a pawtdoh va, amah a suhlup theihdan diing uh ngaihtuahin. Herod mite toh a kihoukhawmpah uhi. 7Hizongleh Jesu chu a nungjuite toh diil lamah a chiahta a; huleh Galili gam a kipan mipi nasatahin amah a jui va, 8Huleh a silbawl loupidante a jaun, Judia gam apat, Jerusalem apat, Idumai apat bang, Jordan gaal apat bang in; Tura leh Sidon khokiim apat bangin mipi nasatah a kawmah a hung uhi. 9Huleh ama’n mipi jiahin amah diing a kuang neu khat guatsa a koih diingin a nungjuite a hilh a, huchilou inchu amah a nehthopkha diing uh. 10Ajiahchu mi tampi a sudamta a; huchi'n natna nei photmahin amah a khoih theihna diingun a boh lutlut uh. 11Huleh dawiniinte’n amah a muh un, a ma a bohkhup in, Nang Pathian Tapa na hi, chi'n a kikou uhi. 12Huleh ama’n a tanchin phuangdoh lou diingin amahuh a khap chat hi.

Jesu’n sawmlenihte a teelna

13Huleh taang ah a chiah tou a, a deihdeihte a kawmah a kou a; Huleh amahuh a kawmah a hung va. 14Huleh a kawm a um diingin leh, thusoi a, a sawlkhiah theihna diingin sawmlenihte a guat a, 15Damloute suhdam theihna leh, dawite nohdoh theihna thunei diingin; 16Huleh Simon chu ama’n Peter a sa a, 17Zebedi tapa Jakob leh, Jakob unaupa John; amahuh chu Bonerges a sa a, huchu, Vaanpiging tate, chihna ahi. 18Huleh Andru, Philip, Bartholomai, Matthai, Thoma, Alphai tapa Jakob, Thaddai, Kananmi Simon, 19Huleh a mansahpa Juda Iskariot zong ahi uh; huleh amahuh inn sungah a luut va. 20Huleh an nasan nesah thei lou khopin mipi ahung kikhawm kiit uh. 21Huleh a lawmte’n hichu a jahun, A ngol ahita, chi'n amah mat tum in a pawt uhi.

Ngaihdam theih louh sual

22Huleh lehkhagialtute Jerusalem khua a kipan a hungsuhte’n, Beelzebul paai ahi, huleh dawi maangpa jiahin ahi dawite a nohdoh, a chi va. 23Huleh ama’n amahuh a kou a, a kawmvah tehkhinthu in thu a soi a, Bang chi'n Setan in Setan a nohdoh thei diai? 24Gam khat kilangkhen in kidou leh, hu gam chu a dingdoh thei sih diing hi. 25Huleh innkuan khat kilangkhen in kidou leh, hu innkuan zong a dingdoh thei sih diing hi. 26Setan zong amah leh amah kidouin kilangkhen leh a dingdoh zou sih diing a, a mangthai zaw diing hi. 27Mi koimah in mi haatpa a kaantom masat louhngalleh, mi haatpa inn a luut in a thuampuate a laahsah thei sih; a kaantom nung chiangin chu a thuampua a tomsah mai diing. 28Chihtahzetin ka hung hilh ahi, Mihing tate a sualna zousiah uleh, Pathian soisiatna lama a soisiatna zousiahte uh ngaihdam ahi diing va; 29Hizongleh koipouh Hagau Siangthou soisia in chu bangchihtanin ngaihdamna a mu sih diing a, kumtuang siamlouhtanna lauhuai ah a um zaw diing hi, a chi a. 30Dawi niin paai ahi, a chih jiahun hu thu chu a soi ahi.

Kitanauna dih

31Huin a unaute leh a nu a hung va, inn pua a ding in amah kou diingin mi a sawl va. 32Huleh a kiim ah mipihon a tou va, amahun a kawmah, Ngai in, inn pua ah na nu leh na unaute’n ahung hawl uhi, a chi va. 33Huleh ama’n a dawng a, a kawmvah, Ka nu leh ka unaute koite ahiai? a chi a. 34Huin a kiim a pute a envel a, En un, ka nu leh ka unaute! 35Ajiahchu koipouh Pathian deihzawng bawl photmah, hu mite chu ka unaute, ka sanggamnute leh ka nute ahi uh, a chi hi.

Currently Selected:

MARK 3: SIMTBSI

Highlight

Copy