MARK 4

Buhchithehtu tehkhinthu

1Huleh diil pangah thu a hilhpan kiitta a; huleh mipi nasatah a kawmah ahung kikhawm va, huchi'n diil tunga kuang ah a luut a, a touta a; huleh mipi zousiah chu diil geiah leitung ah a um uhi. 2Huleh amahuh chu tehkhinthu in thu tampi a hilh a, huleh a thuhilhna ah a kawmvah; 3Ngaikhia unla, En un, buhchithehtu khat buhchi theh diingin a kuan a; 4Huleh hichi ahung hi a, a theh laiin khenkhat lampi gei ah a tu a, huleh hute chu tungleeng vate a hung a, a ne zouta uh. 5Huleh khenkhat suang silei lahah a tu a, huleh lei a sah louh jiahin a poupah a; 6Hizongleh ni ahung satin a haivul a, huleh zung a neih louh jiahin a gogawpta hi. 7Huleh khenkhat chu lingnawng lahah a tu a, huleh ling ahung khang a, a deepmangta a, huleh gah a neita sih hi. 8Huleh a dang chu lei hoih ah a tu a, huleh pouin a khangpahta a, huleh a leh sawmthum bang, sawmgup bang, huleh zakhat bangin ahung pungta hi, a chi a. 9Huleh ama’n a kawmvah, Koipouh jahna diing a bil nei in ja heh, a chi a. 10Huleh a tang a, a um laiin a kiim a sawmlenihte toh umte’n tehkhinthu chu a dong va. 11Huin ama’n a kawmvah, Pathian gam thuguuh chu nanguh heet diing phal ahi a; hizongleh polam mite diingin chu sil zousiah tehkhinthu a hih ahi. 12Muh chu a muh theih va, a heetsiam louhna diing uleh, jah chu a jah theih va, a ngaih na a heet louhna diingun; huchilou inchu a zawleh ahung kihei kiit diing va, a sualnate uh ngaihdam ahi kha diing uh, a chi hi.

Buhchithehtu tehkhinthu hilhchianna

13Huleh ama’n a kawmvah, Hi tehkhinthu na he sih u'maw? huleh huchi a hih inchu tehkhinthu zousiah bangchi’n na heta divuai? 14Buhchithehtu in chu thu a theh a. 15Huleh lamgei a thu thehnate chu hitobang ahi uh; thu chu a jah tahun Setan a hungpah a, a lungtang va thu kitheh chu a lamangpah hi. 16Huleh huchibang mahin suang si leia kitheh chu hite ahi uh; amahun thu chu a jah tahun kipaahtahin a pompah uh; 17Hizongleh amah vah zung a nei sih va, tomtakhat chauh a um va; hu nunga thu jiaha gimthuaahna ahung um chiangin a puuhpah uhi. 18Huleh lingnawng laha kitheh chu hite ahi uh: hute’n thu chu a ja va, 19Huleh khovel hinkhua ngaihtuahnate, hauhsat utna heemnate leh sil dangdang deihgohnate hung luut in thu chu a deep a, gahlouin a um veuta hi. 20Huleh lei hoih a kitheh chu hite ahi uh: thu chu ja in a pom va, a leh sawmthum bang, sawmguup bang, huleh za khat bangin a gah uh, a chi hi.

Khawnvaah leh haichi apat kihilhna

21Huleh ama’n a kawmvah, Khawn vaah koihna a koih louh diingin, loh nuai aha, ahihlouhleh lupna nuai aha a koih diingin khawnvaah a la ngei viai mah? 22Ajiahchu kiphuang lou diing a iim bangmah a um sih a; kilang lou diing a phual zong bangmah a um sih hi. 23Mi koipouh in jahna diing a bil a neih leh ja heh, a chi a. 24Huleh ama’n a kawmvah, Bang ahiai na jah uh pilvaang un; na tehna ngeimah un ahung tehsah diing va; huleh nanguh a ngaikhete kawmah ahung piah behlap diing uh. 25Ajiahchu koipouh a nei kawmah piahbeh ahi diing a; huleh koipouh a nei lou chu a neihsun zong laahsah ahi diing, a chi a. 26Huleh ama’n, Pathian gam chu, mi’n leiah haichi tuh henla; 27Huleh jan chiangin ihmu in suun chiangin thou henla, huleh haichi chu hung pou in khang doh henla, amahpa’n laha zia he sih leh, hutobang ahi. 28Ajiahchu lei in amah in gah ahung suah jel a; a masa in a nah, huin a vui, huin a vui ah a tangching. 29Hizongleh a gah chu ahung min chiangin, buhlaah a huntaah jiahin kawite in a aat panta hi, a chi a. 30Huleh ama’n, Pathian gam chu bangtoh i tehkaahta diai? ahihlouhleh bangtoh tehkhina soi diing i ta viai? 31Hichu ankam chi tang khat leia a kituh chianga, leia haichi zousiah sangin neupen zongleh; 32A tuh nungun, ahung pou a, loupa zousiah sangin ahung lianzaw a, ba lianpi ahung nei a; huchi'n tungleeng vate a liimah a giaah uhi, hutobang ahi, a chi a. 33Huleh hichibang tehkhinthu tampiin, amahuh heet theih khamkham in a kawmvah thu a soi a; 34Hizongleh tehkhinthu louin a kawmvah thu a soi sih hi; huleh amahuh ngena a um chiangun a nungjuite kawmah sil zousiah a hilhchian jel hi.

Jesu’n tuikinawh a suhdaihna

35Huleh huni mahin, nitaahlam ahung hih in, ama’n a kawmvah, Gaalkhat lamah i kai diing uh, a chi a. 36Huleh amahun mipite a sawlkhiah zoh un, kuang a a um bangbang in amah a paipihta va. Huleh a kawmah kuang neu dangte zong a um hi. 37Huleh huihpi nasatah ahung nungta a, tuikinawh chu kuang sungah ahung luut juijui a; huchi'n ahung dim phialta a: 38Huleh amah chu kuang meilamah taangkhap khap in, ihmu in a um a; huleh a phawng va, a kawmah, Houtupa, ka manthai uh poisa lou na hi maw? a chi va. 39Huin amah chu ahung thou a, huih chu a tai a, diil kawmah, Daai inla, um kinke'n in, a chi a. Huin huih chu a tawpta a, ahung sipkeeita hi. 40Huleh ama’n a kawmvah, Bang diinga huchi lau na hi viai? Ginna himhim na neih louh uh bangchidan ahiai? a chi a. 41Huleh a lau mahmah va, khat leh khat kihouin, Hipa hi bangtobang mi ahiai, huih leh diil tanphain a thu a awi uh, a kichituah uhi.

Currently Selected:

MARK 4: SIMTBSI

Highlight

Copy