MARK 16

Jesu thohkiitna

1Huleh khawlni a bei phetin, Mari Magdalene leh, Jakob nu Mari leh, Salomi in amah a vanuh diingun sil gimtui a lei va. 2Huleh hapta ni masapen ni jingkal matahin haan ah ni suaah in ahung va. 3Huleh, amah uleh amahuh kihou in, Ha an kot apat suang kua’n hung liihkhiahsah diing adiai? a kichi va. 4Huleh a et uleh suang chu liihdohsa in a muta uhi; a suang chu a lian mahmah hi. 5Huleh haan sunga a luut uleh, tangval khat puan vaam tualtah silh a, jiatlam panga tou a muta va; a lau mahmah uhi. 6Huin ama’n a kawmvah, Lau sih un; Kros a kikilhbeh Nazareth Jesu na hawl uh ahi; amah chu a thou kiitta a, hi-ah a um nawn sih hi; en un a sialna mun uh. 7Hizongleh chiah unla, a nungjuite leh Peter kawmah, Galili gam ah na ma vah a chiah hi; na kawm va a soi bangin amah na mu diing uh, chih va hilh un, a chi a. 8Huin amahuh chu kintahin a pawt va, haan apatin a taita uh a; kiliing a thum ah a sah jiahun. Huleh a lau jiahun koimah kawmah bangmah a soi sih uhi. 9Huchi'n Jesu chu hapta ni masapen a, a thohkiit in Mari Magdalene, a sung apat dawi sagih a nohdohna nu kawmah a kilaah masapen a. 10Huleh amahnu chu a chiah a, Jesu umpih veute, amah suuna kapte a va hilh a. 11Huleh amahun, amah chu a hingta a, huleh amahnu in a mu hi chih a jah un a tahsang sih uhi. 12Huleh hu nungin a lah va mi nih, gamlam zuana a pai laiun, meel tuam pu in a kawmvah a kilaah a. 13Huin amahuh chu a chiah va, nungjui dangte a va hilh va; amahun zong ana gingta sih uhi. 14Hunung la min, ankuang a, a tou laiun, sawmlekhatte kawmah a kilaah a, a thohkiit nunga amah mute thu a gintaat louh jiahun, a gintaat louhna uleh, a lungtang khauh thu vah a taihilh hi. 15Huin ama’n a kawmvah, khovel zousiah ah chiah unla, silsiam chinteng kawmah Tanchinpha soi un. 16Koipouh a gingta a baptisma tang chu huhing in a um diing a; hizongleh a gingta lou chu siamlouh tang in a um diing hi. 17Huleh a gingtate chu hi chiamchihnate in a jui diing: Ka min in dawite a nohdoh diing va; haam thahte in a haam diing uh. 18Guulte khut in a la diing va; sih theihna sil bangchi bang dawn zongle uh bangmah a chi sih diing uh; huleh damloute tungah khut a nga diing va, a dam jel diing uhi, a chi hi.

Jesu vaan a kaltouhna

19Huchia Lalpa’n a kawm va thu a soi zohin, amah chu vaan ah puitouh in a um a, Pathian jiatlamah a touta hi. 20Huleh amahuh chu a kuandoh va, mun chinah thu a soita va, Lalpa’n amah uh a tohpih a, chiamchihna in juiin a thu chu a sukip jel hi. Amen.

Currently Selected:

MARK 16: SIMTBSI

Highlight

Copy