LUKE 1

Thumapui

1I lahva chiantaha gintaat a um hu silte, mi tampite’n a phuanjahna diing ngaihtuah a gelh ana tup uh; 2A chiil apat a mita mutute leh thu natongtute’n ahung na hilh bangun, 3Zahumpen Theophil, a bul a kipan sil zousiah heetkimna nei in, kizom jel a na kawm a gelh hoih ka sa hi. 4Tuma a nang hungna kihilh thute a dih ngeel hi chih na heetna diingin.

Baptistu John pian diing soilawhna

5Juda gam kumpipa Herod damlai in, a min Zakaria kichi, Abia pawla mi siampu natong khat a um a; huleh a ji chu Aaron tanute khat ahi a, a min Elizabeth ahi. 6Huleh amahuh geel chu soisel beiin Lalpa thupiah leh a daan zousiah juiin Pathian mitmuh in dihtattahin a um uhi. 7Huleh Elizabeth a chi'n jiahin ta a nei sih va, a nih un a upa tuaah mahmahta uhi. 8Huleh hichi ahung hi a, Ama’n a hun tan dungjui a Pathian ma a siampu nna a toh laiin, 9Siampu tawndan dungjuiin Lalpa biahinn a luut chiang a gimnamtui haal chu a tan ahi a. 10Huleh gimnamtui kihaal laiin mipite chu a bawnun innpua ah ana haamtei uhi. 11Huleh Lalpa angel khat gimnamtui haalna maitaam jiatlam a dingin a kawmah ahung kilaah a. 12Huleh Zakaria in amah a muh tahin a mangbang a, lau zong a lau a. 13Hizongleh angel in a kawmah, Zakaria, lau sin; ajiahchu na haamteina jah ahita hi; na ji Elizabeth in tapa ahung neihsah diing a, a min John nasah diing ahi. 14Huleh nang chu nuamin na kipaah diing a; huleh mi tampite amah pianin a kipaah diing uhi. 15Ajiahchu Lalpa ngaih in amah mi lian ahi diing a, uain aha, ahihlouhleh khamtheih zu mawngmawng a dawn sih diing; huleh a nu sunga kipan ngei in Hagau Siangthou in a dim diing hi. 16Huleh Israel tate tampi Lalpa a Pathian uh lam a kihei kiitsah diing hi. 17Huleh pate lungtang tate lam a ngasah diing leh, thumang loute midihtat pilna lam a ngasah diing leh, Lalpa diing a mi honkhat kipeihsa a um diing a na bawllawh diingin Elijah lungsim leh silbawltheihna toh Lalpa ma ah a pai diing hi, a chi a. 18Huin Zakaria in angel kawmah, Hikhu bangchi'n ka hethei diai? keilah teehsia hita ing a, ka ji zong a teeh mahmahta a, a chi a. 19Huin angel in a dawng a, a kawmah, Kei Gabriel, Pathian ma a diing chu ka hi; huleh na kawm a thu soi diing leh hi thu kipaah huaite hilh diing a sawl ka hi. 20Huleh ngai in, a hun banga hung tung diing hi thu ka soite na gintaat louh jiahin hi silte ahung tun masiah haamthei louin na um diing hi, a chi a. 21Huleh mipite’n Zakaria chu a nangaah va, Pathian biahinn sunga a sawt um beeh jiahin limdang a sa mahmah uhi. 22Huleh ahung pawt in a kawmvah thu a soi theita sih a; huin biahinn sungah kilaahna a mu ahi chih a heta va; ajiahchu a kawmvah heetsahna a bawl a, huleh haam thei louin a um zingta hi. 23Huleh hichi ahung hi a, a natohna a ni a chin tahin a inn ah a chiahta hi. 24Huleh hu nite nungin a ji Elizabeth chu ahung gaaita a, ha ngaa sunga kibu a, 25Mite laha ka minse seel diingin, Lalpa’n ahung muh in hichibangin ka tungah a bawlta hi, chi'n.

Jesu pian diing soilawhna

26Huleh aha guupna ah Pathian in angel Gabriel chu Galili gam a khua khat, a min Nazareth kichi ah, 27Nungaah siangthou khat, David suan a mi, a min Joseph kichipa ji diing a hual kawmah a sawl a; hu nungaah siangthou min chu Mari ahi. 28Huleh angel chu a kawmah a luut a, Chibai, nasatah a deihsahnu, Lalpa na kawmah a um hi; numei lahah hamphanu na hi, a chi a. 29Huleh amahnu’n amah a muh in a thusoite ah a lunghimoh mahmah a, hikhu hi bangtobang chibai buuhna hita diing a de aw, chi'n a ngaihtuah a. 30Huin angel in a kawmah, Mari, lau sin; ajiahchu Pathian lahah deihsahna na tang hi. 31Huleh ngai in, na gaai diing a, tapa na nei diing a, a min Jesu na sa diing hi. 32Amah chu mi lian ahi diing a, Tungnungpen Tapa a kichi diing; huleh Lalpa Pathian in a kawmah a pa David laltouphah a pe diing a; 33Huleh Jakob haahte tungah kumtuang in a lal diing a, a gam in beini a nei sih diing hi, a chi a. 34Huin Mari in angel kawmah, hi bangchi'n ahi diai? pasal lah nei lou ing a, a chi a. 35Huleh angel in a dawng a, a kawmah, Hagau Siangthou na tungah ahung tung diing a, Tungnungpen silbawltheihna in ahung liahkhuh diing; hujiahin mi siangthou nang a hung piang diing zong Pathian Tapa chih ahi diing hi. 36Huleh ngai in, na sanggamnu Elizabeth in zong a teeh nungin tapa khat a paaita hi; a chiing a chihnu ah, tu aha guupna a hita hi. 37Ajiahchu Pathian diingin ahi thei lou bangmah a um sih diing hi, a chi a. 38Huleh Mari in, En in, Lalpa suaahnu chu; na soi bang ngei in ka tungah hung tung heh, a chi a. Huin angel in a chiahsanta hi.

Mari in Elizabeth a va veh: Paahtawina la

39Hulaiin Mari chu a thou a, singtaang gam ah, Juda khopi khatah kintahin a chiah a; 40Huleh Zakaria inn ah a luut a, Elizabeth chibai a buuh a. 41Huleh hichi ahung hia, Elizabeth in Mari chibai buuh a jah tahin a sunga naungeeh chu a tawm a; huleh Elizabeth chu Hagau Siangthou in ahung dimta a. 42Huleh aw ngaihtahin ahung haamdoh a, Numei lahah hamphanu na hi, na gil a gah zong a hampha hi. 43Ka Lalpa nu ka kawma na hung bangchidan a hitai? 44Ngai in, na chibai hung buuh gin ka bila a luut tahin ka gilsunga naungeeh chu nuamin a kitawm hi. 45Huleh a gingtanu zong a hampha hi; Lalpa’n a kawma a thusoite chu taangtung diing ahih jiahin, a chi a. 46Huin Mari in, Ka hinna in Lalpa a paahtawi a, 47Huleh ka hagau chu ka Hundampa Pathian tungah a nuam hi. 48Ajiahchu ama’n a suaahnu namngiam dan a ngaihsah a; huchi'n, ngai in, tu a kipanin khang thah zousiah in hampha ahung chi diing uhi. 49Ajiahchu amah mihaat in ka tungah sil loupitahte a bawlta a; huleh a min zong siangthou ahi. 50Huleh amah laudan siamte tungah a hehpihna a khang a khang in a um peh hi. 51A baantha in a haatdan a ensah a; mi kiliansahte chu a lungtang suangtuahna uh a suhdalhsahta hi. 52Mi haatte chu a laltouna va kipan a lakhia a, mi ngiamte chu a tawisangta hi. 53Gilkialte chu silhoih in a sutai a; huleh mi hausate chu khutguaah in a sawlmangta hi. 54A hehpihna heet zingna in a suaah Israel a panpihta a; 55Kumtuanga diing a i pulepate, Abraham, huleh a haahte kawma ana soi bang ngei in, a chi a. 56Huleh Mari chu a kawmah ha thum vel a taam a, huin a inn ah a pai kiitta hi.

Baptistu John pianna: Vangngetna

57Huleh Elizabeth chu a nausuah hun ahung tungta a; huchi'n tapa ahung neita a. 58Huleh a innveengte leh a sanggamte’n, Lalpa’n hehpihna loupitah a tungah a sulang chih ana ja va, a kipaahpih uhi. 59Huleh hichi ahung hi a, a ni giatni in naungeeh zehtan diingin a hung va; a min diingin a pa min la in Zakaria a sah tum va. 60Huin a nu in a dawng a, Huchi hi sinte, John chih zawh diing ahi, a chi a. 61Huleh amah un a kawmah, Na beh na phung lahah hi mina kikou koimah um loupi, a chi va. 62Huleh amah un a pa kawmah, A min bang na hisah nuam ei chi'n heetsahna a bawl va. 63Huin ama’n lehkhagelhna dohkaan a ngen a, A min chu John ahi, chi'n a gial a. Huleh a bawnun thumah a sa mahmah uh. 64Huin a kam ahung kihongpah a, a lei ahung kiphel a, ahung haam a, Pathian a paahtawita hi. 65Huleh a kawmva teeng zousiahte chu ahung lauta va; huleh hi thute chu Judia gam singtaang zousiah ah a thangsuahta hi. 66Huleh a jakha zousiah in a lungtang vah a geel chiat va, Hi naungeeh bangchibang ahung hitaphet de aw, chi'n! Huleh Lalpa khut in amah a umpih hi. 67Huleh a pa Zakaria chu Hagau Siangthou in ahung dim a, huleh thu ahung soidohta a, 68Israel Lalpa Pathian chu paahtawi in um heh; ajiahchu ama’n a mite ahung kana, ahung tanta hi, 69Huleh a suaah David innkuante lahah hutdamna kii ahung siamsahta hi. 70Leilung pian chiil apat a zawlnei siangthoute kama ana soi bangin; 71I meelmate lah leh ahung mudah zousiahte khuta kipan hutdam i hi a; 72I pulepate kawma khotuahna a chiam chu bawl diing leh, a thuhun siangthou he zing diingin; 73I pu uh Abraham kawma a kihaahsialna chu, 74I meelmate lah apat a hung hunkhia a, lau loua a nna i toh theihna diing, 75I damsung teng a mitmuh a siangthou leh dihtattaha um diingin. 76Huleh nang, naungeeh, Tungnungpen zawlnei ahung kichi diing hi; ajiahchu a lampite bawl diingin Lalpa ma ah na pai diing hi. 77A sualnate uh ngaihdamna a, a mite kawma hutdamna heetna pe diingin. 78I Pathian uh hehpihna nemtah jalin; hujiahin tunglama kipana nisuaah in ahung khohta hi. 79Mial lah leh sihna liim nuaia pute taan vaah diing leh, hamuanna lampi a i keengte hung puisah diingin, a chi a. 80Huleh naungeeh chu ahung khang lian a, a lungsim lam ahung haat deuhdeuh a, Israelte kawma a kilaah masiah gamdai ah a um zing hi.

Currently Selected:

LUKE 1: SIMTBSI

Highlight

Copy