MARK 1

Baptistu John leh a thupuaah

1Pathian Tapa, Jesu Khrist Tanchinpha kipatna; 2Zawlneite lehkhabu ah, Ngai in, ka sawlleh na ma ah ka sawl a, ama’n na lampi a bawl diing. 3Gamdaai a mi kikou aw in, Lalpa lamlian sial unla, a lampite hihtang un, a chi, chi a kigial bangin. 4John in gamdai ah a baptis a, sualte ngaihdamna diing a kisiihna baptis thu a soi hi. 5Huleh Judia gam mi zousiah leh Jerusalem a umte chu a pawt va, a kawmah a chiah va, a sualte uh thuphatawi in Jordan lui ah baptisma a tang chiat uhi. 6Huleh John chu sangawngsaau mul puan silh in, a kawng savun kawnggaah in a gaah a; huleh a an chu khaukhup leh gam khuaizu ahi. 7Huleh, Ka nung ah kei sanga lianzaw khat a hung a, kei chu kuun a, a keengtophah khau phel taah zong ka hi sih. 8Ke'n chu tuiin ka hung baptis a; hizongleh ama’n chu Hagau Siangthou in nanguh ahung baptis diing, chi'n a soi hi.

Jesu baptisma tanna

9Huleh hu hun laiin hichi ahung hi a, Jesu chu Galili gam a Nazareth khua a kipanin a hung a, John kawmah Jordan lui ah baptisma a tang a. 10Huleh tui lah apat ahung pawt tahin, vaan kihong a, Hagau vakhu banga a tunga hung kumsuh a mu a; 11Huleh vaan a kipanin aw khat ahung ging a, Nang ka Tapa deihtah na hi, na tungah ka kipaah mahmah hi, chi'n.

Jesu heem a, a umna

12Huleh Hagau in amah chu gamdai ah a sawldohpah a. 13Huleh amah chu Setan heem a um in ni sawmli gamdai ah a um a; huleh gamsate lahah a um a; angelte’n a nna a tohsah uhi.

Jesu’n a natoh apatna

14Huchi'n John suangkul a, a khum nungun, Jesu chu Pathian gam Tanchinpha soiin Galili gam ah a hung a, 15A hun a tungta a, huleh Pathian gam a naita hi; kisiih unla, Tanchinpha gingta un, chi'n.

Simon leh Andru kouhna

16Huleh Galili diil geia a vaahna ah Simon leh a unaupa Andru diil a leen sep a mu a; ajiahchu ngaman mi ahi uhi. 17Huleh Jesu’n a kawmvah, Hung jui un, mihing man di’n ka hung siam diing, a chi a. 18Huleh amahun a leente uh nusia in amah a juipah uhi. 19Huleh hu a kipana themkhat a chiah gamlaat leh Zebedi tapa Jakob leh a unaupa John a mu a; amah uh chu a leen uh phoh a kuang a um mah ahi uh a. 20Huleh ama’n amah uh a koupah a; huin amahun a pa uh Zebedi chu a suaah thalaahte u’toh kuang a nusia in amah a juita uhi.

Kapernaum a dawimat Jesu’n a suhdamna

21Huleh amah uh chu Kapernaum khua ah a luut va; huleh khawlni’n kikhopna inn ah a luutpah a, thu a hilh hi. 22Huleh amahun a thuhilh chu limdang a sa mahmah va; ama’n lehkhagialtute bang hilou a, thuneitah banga a hilh jiahin. 23Huleh a kikhopna inn vah dawiniin paai mi khat ana um a; amah chu a kikoudoh a; 24Ka tangun hung umsah in; Nazareth Jesu, nang leh kei un bang ahiai kizopna i neih? kei uh sumang diing a hung na hi maw? Koi na hih ka hung he hi, Pathian misiangthou na hi, chi'n. 25Huleh Jesu’n amah a tai a, Sip inla, a sung apatin hung pawt in, a chi a. 26Huleh dawiniin in mipa chu a soisa vah a, hah kou a kikou in a sung apat ahung pawtta hi. 27Huleh a bawnun limdang a sa mahmah va, huchi'n, Hi bang ata ei leh? bangchi bang thuhilhna thah a ta ei? Ama’n thunei tahin dawiniinte nasan thu a pia a, a thu a mang uh, chi in a kidongtuah uh. 28Huleh Galili gam kiimvel zousiah ah, gam chinah a tanchin a thangsuahpahta hi.

Jesu’n Peter ji nu leh midang tampi a suhdamna

29Huleh kikhopna inn a kipat a pawt un Simon leh Andru inn ah Jakob leh John toh a luutpah va. 30Huleh Simon ji nu chu khosih a na in ana lum a, huleh amahnu tanchin ana hilhpah uhi. 31Huleh ama’n amahnu chu a khut a va tu in a phong a; huin a khosih in a nusepah a, huleh amahnu’n a nna uh a tohsah hi. 32Huleh nitaahlam, nitum in, damlou zousiah leh dawi paaite a kawmah ahung pui uh a, 33Huleh khopi sunga mi zousiah chu kotpi bulah a kikhawm va. 34Huleh ama’n mi tampi natna tuamtuam a nate a sudam a, dawi tampi a nohdoh a; huleh dawite’n amah a heet jiahun a haam diinguh a phal sih hi.

Jesu haamtei diing a, a kuana leh Kapernaum a nuutsiatna

35Huleh jingkal in, kho vaah ma daihin a thou a, a pawt a, munsip ah a va chiah a, huah a haamtei hi. 36Huleh Simon leh a lawite’n a nungah a jui va. 37Huleh amah a muh tahun a kawmah, Mi zousiah in nang ahung hawl uhi, a chi va. 38Huleh ama’n a kawmvah, Kho nailahte ah zong thu ka soi theihna diingin i chiah diing uh; hu diing maha hung kuan ka hi ngal a, a chi a. 39Huleh ama’n Galili gam pumpi a, a kikhopna innte va thu hilhin dawite a nohdoh jel hi.

Miphaah suhdamna

40Huleh miphaah khat a kawmah a hung a, a ma a khupdin in, Na ut leh na hung susiang thei hi, chi'n a ngen a. 41Huleh Jesu’n a hehpih mahmah a, a khut a zam a, a khoih a, a kawmah, Ka ut hi; siangthouta in, a chi a. 42Huleh a soi zoh tahin a phaahna in a nusepah a, ahung siangthouta hi. 43Huleh amah a khapchat a, a sawlmangpah a; 44Huleh a kawmah, En in, koimah kawmah bangmah soi het sin; hizongleh chiah inla, siampu kawmah va kilah inla, na damsiang thu amah uh heetsahna diingin Mosi’n thu a piah silte va laan in, a chi a. 45Hizongleh amah chu a chiahdoh a, hu thu nasatah a taangkoupihin a phuangdalh panta hi; huchi'n Jesu chu a langtangin khopi sungah a luut theita sih a, gamdai munte ah a um zawta a; huleh mun chin a kipanin a kawmah mite ahung uhi.

Currently Selected:

MARK 1: SIMTBSI

Highlight

Copy