MATTHAI 27

Jesu Romemi Pilat, gamoptu ma ah

1Jingkal ahung hihin, siampu lalte leh vaantaang upate zousiah Jesu thahna diingin a kihoukhawm va; 2Huin amah chu a kaan va, a pui va, gamoptu Pontia Pilat kawmah a pekheta uhi.

Juda sihna

3Huin Juda a mansahtu in Jesu siamlouh a tangsah uh chih a heet in a kisiih a, hu dangka sawmthum chu siampu lalte leh upate kawmah ahung tawi kiit a, 4Mikhial lou sisan ka matsah chu ka sual ahi, a chi a. Huleh amahun, Hu kei uh diingin bang a khawh diai? nang na lohloh kilohta in, a chi va. 5Huin ama’n dangka chu Pathian biahinn sungah a sepluut a, a pawt a, chiah in ava kikhailum hi. 6Huleh siampu lalte’n dangka chu a la va, Sisan man ahih jiahin hichu thohlawm bawm a koih a siang sih hi, a chi va. 7Huleh a kihoukhawm va, mikhual vuina diingin hu sum in beelkhengtu mun a leita uh. 8Hujiahin hu mun chu tutanin, Sisan mun a chi uhi. 9Huchi'n zawlnei Jeremiah thusoi, Israel tate laha koite aha in ana sahsa uh, amah man diing dangka sawmthum chu a la va; 10Huleh Lalpa hung chiam bangin, beelkhengtu mun man diingin a pia uh, a chih chu hung taangtung ahita hi.

Jesu Pilat ma ah

11Huin Jesu chu gamoptu ma ah a ding a, huleh gamoptu’n, Judate Kumpipa na hi maw? chi'n a dong a, Huin Jesu’n a kawmah, Hi e, a chi a. 12Huleh siampu lalte leh upate’n amah a heeh laiun bangmahin a dawng sih hi. 13Huin Pilat in a kawmah, Ahung heehna zoujai uh jalou na hi maw? a chi a. 14Huleh ama’n kamkhat in zong a dawng sih a; huphetin gamoptu’n thum ah a sa mahmah hi. 15Huleh gual vaah ni chianga gamoptu’n suangkul taang khat, mipite’n a teel penpen uh a hahsah veu ahi a. 16Hulaiin Barabba a chih uh, gilou a kithangtah suangkul taang khat a um a. 17Hujiahin amahuh ahung kikhop tahun, Pilat in a kawmvah, Koi zaw ahiai ka hung hahdohsah na deih uh? Barabba ahiai? Jesu Khrist kichi? a chi a. 18Ajiahchu thangsiat jiaha a matsah uh ahi chih ama’n a he hi. 19Huleh vaihawmna touphah a, a tou laiin, a ji in a kawmah mi a sawl a, Hu mi dih tungah bangmah bawl sin; ajiahchu amah jiahin tu ni’n ka mang in sil tampi ka thuaah hi, a va chisah hi.

Barabba a nget uh

20Hizongleh siampu lalte leh upate’n Barabba chu ngen a, Jesu chu sulum diingin mipite a heem va. 21Gamoptu’n a dawng a, a kawmvah, Nihte laha koi zaw hung hahkhe leng chi na hi viai? a chi a. Amahun, Barabba, a chi va. 22Pilat in a kawmvah, Ahihleh Jesu Khrist kichi hi bang ka lohta diai? a chi a. Amahun a bawnun a kawmah, Kros ah kilhbeh in um heh, a chi va. 23Huin gamoptu’n, Bang diingin eimaw? Bang bawlsual a nei ei? a chi a Amahun a bawnun, Kros ah kilhbeh in um heh, chi'n a kikou saan uhi. 24Pilat in bangmah loh theih louh leh, buaina semsem hi diing ahi chih a muh tahin, tui a la a, mipi ma a, a khut sil in, Hi mi dih sisan ah mohna bei ka hi; nangun na lohloh kiloh un, a chi a. 25Huin mipi zousiah in a dawng va, A sisan phuba chu keiuh tung leh ka tate uh tungah tu heh, a chi va. 26Huin ama’n Barabba chu a kawmvah a hahkhiahsahta a; huleh Jesu chu a jep zohin kilhbeh diingin a pedohta hi.

Jesu kilhbeha a umna

27Huin gamoptu sepaihte’n Jesu chu innpi ah a puiluut va, a kawmah sepaih hon a bawnin a khawm va. 28Huleh amah puan a hawhkhiahsah va, puansandup a silhsah uhi. 29Huleh linglukhuh a phan va, a khuhsah va, a khut jiatlam ah sialluang a tawisah va; huleh a ma ah a khupdin va, Chibai, Judate Kumpipa! chi'n chiamnuih bawlna in a nei uhi. 30Huleh a tungah chil a siat va, sialluang chu laahsah in a lu a jepna uhi. 31Huleh amah chiamnuih bawlna a neih zoh un, puansandup chu a hawhkhiahsah va, kilhbeh diingin a puita uhi. 32Huleh ahung pawtdoh uleh, Cyrene mi, a min Simon kichi mi khat a mu va; amah chu a kros paw diingin a man uhi. 33Huleh Golgotha kichi mun ahung tun un, huchu luguh mun chihna ahi. 34Amah chu uain thuuh, silkha toh kihal dawn diingin a pia va: ama’n huchu a chiam a, a dawn nuamta sih hi. 35Huleh amah chu kros ah a kilh va, huleh aaisaan in a puante chu a kihawm va; zawlnei in, Ka puante chu a kihawm va, ka puannaah tungah aai a saan uh, chia ana soi a taangtunna diingin. 36Huleh huah a tou va, amah chu a veengta uhi. 37Huleh a heehna; Hichu JUDATE KUMPIPA Jesu ahi, chia gelh a lu tungah a taah uhi. 38Huleh amah toh suamhaat mi nih zong a kilhbeh va, a jiatlam ah khat, a veilam ah khat. 39Huleh mi vaahleh phot in a lu uh thing in, a elhou va, 40Nang, Pathian biahinn susia a ni thum sunga bawl kiitpa, nang leh nang kihunkheta’n Pathian Tapa na hih leh kros dawn apat hung kumkhia in, a chi va. 41Hubangmahin siampu lalte’n zong elhou in, lehkhagialtute leh upate toh, 42Ama’n midang a hundam a; amah leh amah laha kihundam thei sih. Israelte Kumpipa ahihleh kros dawn apat hung kumta henla, huchileh ka gingta mei diing uh. 43Ama’n Pathian a muang vele; Amah deih ahihleh tuin hunkheta hen; Pathian Tapa ka hi, a chi ngal a, a chi va. 44Hu suamhaatte, amah toh a kilhbehte un zong huchimahin a elhou uhi.

Jesu sihna

45Huleh pung guupna apatin pung kuaahna tandongin leitung pumpi ahung mialta a. 46Huleh pung kuaahna diing velin, Jesu chu aw ngaihtahin a kikou a, Eli, Eli, lamasabakthani? a chi a. Huchu, Ka Pathian, ka Pathian, bang diinga hung taisan na hitai? chihna ahi. 47Amah kawma ding khenkhatte’n huchu a jah un, Hipa’n Elijah a kou ahi, a chi va. 48Huleh a lahva mi khat a taipah a, spanji a la a, uain thuuh ah a diah a, sialluang mongah a taah a, a dawn diingin a petou hi. 49A dangte’n chu, Huchisah in; amah hundam diingin Elijah ahung naimah i en diing uh, a chi va. 50Jesu chu aw ngaihtahin a kikou kiit a, a hagau a hahta hi. 51Huleh ngai in, Pathian biahinn puanjah chu a tunglam apatin a nuailam tanin keeh nih ahung kisuaha; huleh ziil ahung liing a, suangpite ahung pawhkeeh a, 52Huleh haante ahung kihong a; misiangthou ihmusate sapum tampi kaihthoh in a umta uh, 53Huleh amah thohkiit nungin haante apat hung pawtdohin khopi siangthou ah a luut va, huleh mi tampi kawmah a kilaah uhi. 54Huin sepaih zahoutu leh a kawma Jesu veenga umte’n ziilling leh sil hung umte a muh un nasatahin a lauta va, Hichu Pathian Tapa ahi ngei mei, a chi va. 55Huleh Galili gam apata a natohsah jel kawma Jesu hung jui numei tamtah hu munah a um va, gamlatah apatin a en zing va; 56Hute lahah chu Mari Magdalene, Jakob leh Jose nu Mari, huleh Zebedi tate nu chu a um uhi.

Jesu vui a, a umna

57Nitaahlam ahung hihin, Jesu nungjui hive, Arimathia khua a um, a min Joseph, mihausa khat a hung a, 58Amah chu Pilat kawmah a va chiaha, Jesu luang a ngen a. Huin Pilat in luang chu piah diingin thu a pia a. 59Huleh Joseph in a luang chu a la a, puannem siangtahin a tuam a, 60Huin a haan thah, suang a khuaah hawmah a sial a; huleh haan kot ah suang lianpi khat a liihluut a, a chiahta hi. 61Huleh Mari Magdalene leh Mari dang huah, haan mazawnah tou in a um uhi.

Haan chiamchih a, a veen uh

62Huleh a jingin, huchu kiginni jingni ahi a, siampu lalte leh Pharisaite Pilat kawmah a hungkhawm va, 63Pu, hu miheemhaatpa’n a dam laia, Ni thum nungin ka thou kiit diing a chih ka he zing uhi. 64Hujiahin haan chu ni thum tan hoihtaha veen diingin thu pia in, huchilou inchu jan chiangin a nungjuite hungin amah a va gu diing va, mipi lahah, Misi laha kipatin a thou kiitta hi, a chikha diing uhi; huchileh khelhna masa sangin khelhna nunung a sezawkha diing hi, a chi va. 65Pilat in a kawmvah, Veengtu mi na nei uh ahi sih maw: chiah unla na theihpa tawp un veeng hoihsahta un, a chi a. 66Huchi’n a chiah va, haan chu a enchian va, a suang a chiamchih va, veengtu a koihta uhi.

Currently Selected:

MATTHAI 27: SIMTBSI

Highlight

Copy