LUKE 23

Jesu Rome gamoptu ma-a a dinna

1Huin mipite chu a bawnun a ding va, amah chu Pilat kawmah a pui va; 2Hipa’n, Kei Khrist, kumpipa ka hi chi a Kaisar kawm a siah tawi a khap leh, ka jaatte uh a tohbuai ka he uh, chi'n a heeh ta va. 3Huin Pilat in, Judate kumpipa na hi maw? chi'n a donga. Ama’n a dawng a, Na chih chu ka hi, a chi a. 4Huin Pilat in siampu lalte leh mipite kawmah, Hipa tungah sualna bangmah ka mu sih, a chi a. 5Huin amahun, Hipa’n Galili gam apatin hi mun tanin Juda gam khochinah thu hilhin mipite a tohbuai veu hi, chi'n a hahpan sem uhi.

Jesu Herod ma-a a dinna

6Galili thu a jah tahin Pilat in hu mi chu Galili gam mi ahihleh hih louh a donga. 7Huleh Herod vaihawmna nuaia um ahi chih a heet tahin Herod kawmah a sawla, hulaiin amah zong Jerusalem a um ahihjiahin. 8Huleh Herod in Jesu a muh tahin a kipaah mahmah a; a tanchin tampi ana jah jiahin hun sawttah apat kimuhpih ut mawng ahi a; huleh a silmah bawl bangaha beeh muh zong a kinem a. 9Huin ama’n a kawmah thu tampi a donga; hizongleh ama’n bangmahin a dawng sih. 10Huin siampu lalte leh lehkhagialtute chu a dingkhia va, nasatahin a heeh uhi. 11Huin Herod leh a sepaihte’n Jesu chu a simmohbawl va, chiamnuih bawlna’n a zang va, huleh puan loupi a silhsah va, Pilat kawmah a sawl kiitta uhi. 12Huleh huni mahin Herod leh Pilat chu a kihoutheita uh; hu masiah chu kilungdou zing ana hi uhi.

Barabba hahkhiahna leh Jesu siamlouhtansahna

13Huin Pilat in siampu lalte leh houtute leh mipite a koukhawma, 14A kawmvah, Mite a tohbuai chi-a hipa ka kawma na hung pui uh ahi a; huleh, ngai un, na ma va hoihtaha ka etchian nungin na heehna thu vah a tungah bangmah dih louhna ka mu sih hi; 15Herod in zong a mu sih; ajiahchu nanguh a kawmah ka hung sawla, huleh ngai un, sihna khop hial bangmah a bawl sih hi; 16Hujiahin ka jep diing a, ka hah mai diing, a chi a. 17(Ajiahchu gualvaah ni a mi khat a kawmva hahkhiahsah teitei diing ahi a) 18Huin amahun thakhat in a kikou va, Hipa sumangthai inla, Barabba hung hahdohsah in, a chi va. 19(Hu pa chu khopi sunga helna bang aha jiah leh tualthah jiaha suangkul a taang ahi a) 20Hujiahin Pilat in Jesu a hahdoh nuama, a kawmvah thu a soi kiita. 21Hizongleh amahuh chu a kikou va, Kros ah kilhbeh in, kros ah kilhbeh in, a chi va. 22Huin ama’n a thumveina di’n a kawmvah, Bang jiahin eimaw? bang ahiai a suhkhelh? sihna khop hial a tungah bangmah ka mu sih hi; hujiahin ka jep diing a ka hah mai diing, a chi a. 23Huleh amahun chu aw ngaihtahin kros a kilhbeh diingin a ngen teitei va. Huin amahuh aw leh siampu lalte aw in a neh zou zota hi. 24Huin Pilat in a nget bang va bawl diingin thu a tanta a. 25Huleh helna leh tualthahna jiaha suangkul taang a ngetpa u’chu ahah a; Jesu ahihleh a utut va bawl diingin a pekheta hi.

Jesu kilhbehna

26Huleh amah a pui laiun gam lama kipana hung Cyrene gam mi Simon chu a man va, Jesu nung nunga po diingin a tungah kros chu a ngata uhi. 27Huleh mipi nasatah leh, amah kah a maau jenjun numei honin a jui va. 28Hizongleh Jesu’n amahuh lam hung ngain, Jerusalem tanute, kei hung kah sih unla, nang uleh na tate uh diingin kap zaw un. 29Ajiahchu ngai un, hichibang nite ahung tung diing a, huni chiangin chiingte leh nau paai ngei louhna gilte, huleh naungeeh teep ngei louh nawite a hampha uh, a chi diing uh. 30Hu hun chiangin amahun taangte kawmah, Hung netkhum un, huleh mualte kawmah, Hung khuhkhum un, a chi diing uh. 31Bang jiahin ahiai i chih leh sing hinga bawn hi silte a bawl uleh, sing gaw ah bang a kibawltaphet diai? a chi a. 32Huleh amah toh midang migilou nih zong suhlup diingin a pui va. 33Huleh Kalvari a chih mun uh a tun un huah amah chu kros ah a kilhbeh va, migiloute toh, khat a jiat lamah, huleh khat a veilam ah a kilhbeh uhi. 34Huin Jesu’n, Pa, amahuh ngaidam in; ajiahchu a silbawl uh a he lou uh ahi, a chi a. Huin a puansilh kihawmin aai a saan uhi. 35Huleh mipite’n dingin a en zing uh. Huleh houtute’n zong, Midang bawn a hundam vele; Pathian miteel, Khrist ahih ngeel leh amah leh amah kihundamta henla, chi'n a eenghou va. 36Sepaihte’n zong chiamnuih bawlna’n a zang va, a kawma hungin zu thuuh a pia va. 37Huleh, Judate kumpipa na hih tahzet leh nangmah kihundam in, a chi uhi. 38Huleh a lutung lamah Grik leh Latin leh Hebrai haa min, HIPA JUDATE KUMPIPA AHI chia kigial a tuang hi. 39Huleh migilou kikhaite laha khat in amah a taia, Khrist na hihleh nangmah kihundam inla, kei u’zong hung hundamta’n, a chi a. 40Hizongleh khatpen inchu amah taikawmin a dawng a, Kibang giapa ahung kigawt he in Pathian lau lou na hiai mah? 41Ei chu gawt taah mawng i hi; ajiahchu i silbawlte man mu i hi; hizongleh hipa’n chu bangmah a susual sih hi, a chi a. 42Huin ama’n Jesu kawmah, Lalpa, na gam na tun chiangin hung he zing in, a chi a. 43Jesu’n a kawmah, Chihtahzetin ka hung hilh ahi, Tuni’n ka kawmah paradis ah na um diing hi, a chi a.

Jesu sihna

44Huleh hichu pung guupna vel diing ahi a, pung kuaahna tandongin leitung zousiah ahung mialta a. 45Huleh ni ahung mialta a, Pathian biahinn puanjah chu a kimlaiah ahung keeh ta hi. 46Huleh Jesu chu aw ngaihtahin a kikoua, Pa, na khutah ka hagau ka hung kolsah hi, a chi a; huleh huchia a chihzohin a hagau ahahta hi. 47Huleh sepaih zahoutuin sil umdan a muh in, Hipa matheilouin midihtat ahi ngei mai, chi'n Pathian a paahtawita hi. 48Huleh hu etnop en diing a hung khawm mipi zousiah in sil umdan a muhun a awm uh tuum kawm kawmin a chiah kiitta uhi. 49Huleh a meelheette zousiah leh Galili gam a kipana amah hung jui numeite chu gamlapi ah a ding va, hi silte a en zing uhi.

Jesu vuina

50Huleh, ngai un, mi khat a min Joseph kichi vaihawmtu a um a; amah chu mipha leh midih ahi a; 51(Ama’n chu a vaihawm uleh, a silbawl u’zong lem ana sahpih sih a; ) Amah chu Judate khopi Arimathiami ahi a, Pathian gam ngaah zinga um ahi. 52Hipa chu Pilat kawmah a chiah a, Jesu luang a ngen a. 53Huin a lakhia a, puannem in a tuama, koimah sialna ngei nai louh suang kikhuaah haan khatah a sialta hi. 54Huleh hu ni chu kiginni ahi a, khawlni ahung naita a. 55Huleh numeite, Galili gam a kipana amah toh hung kitonte’n zong a nung a jui va, a haan leh a luang kisialdan a mu uhi. 56Huin a chiah kiit va, silgimnamte leh thau gimtuite a siam va; huleh thupiah dungjuiin khawlni in a khawlta uhi.

Currently Selected:

LUKE 23: SIMTBSI

Highlight

Copy