LUKE 22

Juda Iskariot lepchiahna

1Huleh tanghou tolsoh louh ankuang luina chiahkaan Kuut a chih uh ahung naita a. 2Siampu lalte leh lehkhagialtute’n amah a thah theihna diing uh a ngaihtuah va; mipite laha lau uh a. 3Huin sawmlenihte laha tel Juda Iskariot a chih uh sungah Setan a luut a. 4Huleh a chiahta a, a kawmva Jesu a matsah theihna diing daan siampu lalte leh houtute a va kihoupih a. 5Huin amahuh chu a kipaah mahmah va, amah chu sum piah diingin ana chiamta uhi. 6Huleh ama’n lem a sa a, mipi um louh kal khata matsahna diing lemtaang a hawlta hi.

Chiahkaan Kuut nunungpen

7Huin tanghou tol sohlouh ni chiahkaan Kuut belaamnou gohna ni diing ahung tung ta a. 8Ama’n Peter leh John a sawla, Chiah unla, chiahkaan kuut i neeh diingun hung va bawlsah un, a chi a. 9Huin amahun a kawmah, Khoitah ah va bawlte le ung na deih ei? a chi va. 10Ama’n a kawmvah, Ngai un, khopi sunga na luut chiangun tuibeel pua pasal khat in ahung na tuaah diing a; a luutna inn ah juiluut un. 11Huleh a inn neitu kawmah, Houtupa’n, ka nungjuite toh chiahkaan kuut ka neeh na diing uh mikhual pindan khoitah ahiai ahung chi hi, na chi diing uh; 12Huleh ama’n pindan tungnung lianpi, guatsa diam khat ahung na ensah diing; huah bawl un, a chi a. 13Huin a chiah va, a kawmva a soi bangin a muta va; huleh chiahkaan kuut chu a bawlta uhi. 14Huleh ahun ahung chin tahin a touta a, sawmlenihte’n zong a toupih va. 15Huin ama’n a kawmvah, Ka thuaah ma in hi chiahkaan kuut nang u’toh neehkhawm ka ut mahmah hi; 16Ajiahchu ka hung hilh ahi, Pathian gam a suhbukim ahih masiah hikhu ka ne nawn sih diing hi, a chi a. 17Huleh nou a la a, kipaah thu a soi zohin, Hi la unla, kihawm un; 18Ajiahchu ka hung hilh ahi, Pathian gam ahung tun masiah grep gah tui ka dawn nawn sih diing hi, a chi a. 19Huin tanghou a la a, kipaahthu a soi zohin a balkeeha, a kawmvah a pia a, Hichu ka tahsa, nanguh diing a piah chu ahi; na hung heet zing na diingun hichu bawl veu un, a chi a. 20Huchimahbangin nitaah an neeh zohin nou zong a la a, Hi nou ka sisana thuhun thah, nanguh diing a luang khia chu ahi. 21Hizongleh, ngai un, ahung mansahtu diing khat chu ka kawmah dohkaan tungah a um hi. 22Tahzetin mihing Tapa chu a kiguatsa bangjelin a chiah hi; hizongleh a mansahtupa tung a gih hi! a chi a. 23Huin amahuh chu hitobang bawl diing a lahva koipen hi diing ahiai chi'n a kidongtuahta uhi.

A lianpen hih diing kituhna

24Huleh amah u’lahah koiaha lianpena seh diing chi-a kinialna zong a um a. 25Ama’n a kawmvah, Jentelte kumpipate chu a tungvah lal tahin a um va; huleh a tungva thuneitute chu mi hoihna diing bawltute a chih uh; 26Hizongleh nang u’chu huchibang na hi sih diing uh; na lahva lianpen chu naupang zaw bangin um henla; huleh a loupipen chu neehbawltu bangin um zaw heh. 27Ajiahchu, ankuang uumtu leh neehbawltu koi ahiai lian zaw? Ankuang uumtu hizaw lou ahiai mah? hizongleh kei chu na lahvah neehbawltu bangin ka um hi. 28Nanguh chu heemna ka tuaah sung siaha hung umpihtute na hi uhi. 29Huleh ka Pa’n kei gam ahung guatsah bangin nanguh diingin gam ka hung guatsah hi. 30Ka gam a ka dohkaana na neeh va, na dawn va, huleh Israel nam sawmlenihte vaihawmsaha laltouphaha na tou theihna diingun, a chi a.

Peterin Lalpa a kiheetmohbawl diing soilawhna

31Huin Lalpa’n, Simon, Simon, ngai in, Setan in buh banga ahung seep theihna diingin ahung ngen hi. 32Hizongleh na ginna a man louhna diingin ka hung haamteisah hi; na kihei kiit chiangin na unaute sukip in, a chi a. 33Huin ama’n a kawmah, Lalpa, nang toh suangkul leh sihna ah zong chiah ka ngaap hi, a chi a. 34Huin ama’n, Peter, ka hung hilh ahi, thumvei na hung kiheetmohbawl masiah tuni’n aah a khuang sih diing, a chi a. 35Huin ama’n a kawmvah, Nanguh dangka-ip beia, sakhau beia, huleh keengtophah beia ka hung sawl laiin sil khatbeeh na kitasam viai mah? a chi a. Amahun, Tasam lou, a chi va. 36Huin ama’n a kawmvah, hizongleh tuin chu dangka-ip nei in keng henla, huchimahbangin sakhau nei in zong; huleh namsaau nei louin a puan zuah henla, lei heh. 37Bang jiahin ahiai i chih leh ka hung hilh ahi, Amah chu daan botsetute lahah a sim tel uh chih gelh chu ka tungah a taangtung diing him ahi; ajiahchu ka tungtaang thute tungkim ahita, a chi a. 38Huin amahun, En in, Lalpa, hi-ah namsaau nih a um hi, a chi va Ama’n a kawmvah, A hun hi, a chi a.

Gethsamane huan ah Jesu

39Huin a pawtdoh a, a ngeina bangin Olive taang ah a chiah a; huleh a nungjuite’n zong a jui va. 40Huleh a mun a tun un ama’n a kawmvah, Heemna-a na luut louhna diingun haamtei un, a chi a. 41Huin amah chu suang a sehphaah tan diing bangah a chiahtuam a, a khupdin a; huleh a haamtei a; 42Pa, lem na sah a ahihleh hi nou chu ka kawma kipanin lasuanin; hizongleh kei thu hilouin nang thuthu hizaw heh, a chi a. 43Huin vaan apatin angel khat a kawmah ahung kilaah a, amah ahung suhaat a. 44Huin amah chu a gim mahmah a, phatuam ngai josemin a haamtei a; huleh a khosa chu sisan khal liantah bangin leiah ava kheta a. 45Huleh a haamtei zoh-a ahung thohdoh tahin a nungjuite kawmah a hung a, amahuh chu lungkham jiaha ihmuin ahung mu a. 46Huin a kawmvah, Bang diinga ihmu na hi viai? Heemna-a na luut louhna diingun thou unla haamtei un, a chi a.

Jesu mat a, a umna

47Huleh thu a soi lai tahin, ngai un, mipi hon khat a hung a, huleh sawmlenihte laha khat, Juda a chih uh ahung makaia, tawp tum in Jesu kawm a naih a. 48Hizongleh Jesu’n a kawmah, Juda, mihing Tapa hi tawpa mansah na hi maw? a chi a. 49A kiima mi umte’n sil hung um diing chu a muhun, Lalpa, namsaauin ka saat diviai? a chi va. 50Huleh a lahva mi khat in siampu lal suaahpa a saata, a bil jiatlam a saat khiahsah a. 51Huin Jesu’n ahoupih a, Hichi chiang chu phal un, a chi a Huin a bil chu a khoih a, a sudamta hi. 52Huin Jesu’n a kawma hung siampu lalte leh, Pathian biahinn houtute leh, upate kawmah, Guta man diing bang hialin namsaau leh khetbuuh tawiin na hung uh ahi maw? 53Na kawmva ni china Pathian biahinn a ka um laiin lah ka tungah khut na ha hial sih va; hizongleh tu hi na hun uh ahi, huleh mial thuneihna toh, a chi a.

Peter in Jesu a kiheetmohbawlna

54Huin amah chu a man va, a pui va, siampu lal inn sungah a puiluut uhi. Huleh Peter in gamlatahah agaal juih a. 55Huleh amahun huang sung laiah mei a chih va, a toukhawm va, Peter chu a lahvah a va tou a. 56Huleh mei kawma a tou laiin nungaah koiaha in a mu a, ngun tahin a ena, Hipa zong a kawma um ahi, a chi a. 57Ama’n, Numei, amah ka he sih hi chi'n a kiheetmohbawl a. 58Huleh tomkhat zouin midang khat in a mu kiita, Nang zong a lahva mi na hi, a chi a. Huin Peter in, Ka hi sih, mihing, a chi a. 59Huleh pung khat vel nungin midang khat in, Hipa zong a kawma um himah tham ve aw, Galilimi ahi ngal a, a chi tenten a. 60Peter in, Na thusoi ka he sih, mihing, a chi a. Huin a thusoi laitahin aah ahung khuangta a. 61Huin Lalpa chu a kiheia, Peter a ena Peter in, Tuni’n aahkhuan ma in thumvei na hung kiheetmohbawl diing, chia Lalpa’n a kawma a chih chu ahung hedohta a. 62Huin Peter chu a pawtdoh a, a kap huthutta hi. 63Huleh Jesu mantute’n amah chu chiamnuih bawlna’n a zang va, a vua va. 64Huleh amaikaan zohun a maai a beeng va, Koi ahiai hung vua? soi in, chi'n a dong va. 65Huleh thudang tampiin amah soisia in a kawh uhi.

Jesu siampu lalpen ma ah

66Huleh kho vaah tahin vaantaang upate leh, siampu lalte leh, lehkhagialtute ahung kikhawm va, a vaihawmna ma- vah a puiluut va; 67Khrist na hiai mah? hung hilh in, a chi va Ama’n a kawmvah, Hung hilh mah zongleng na gingta sih diing uh; 68Huleh ke'n zong nanguh thu hung dong leng na hung dawng saam sih diing va, chiah lah na hung chiahsah sih diing uh; 69Tukalsiah mihing Tapa chu Pathian silbawltheihna jiatlam ah a tou ta diing hi, a chi a. 70Huin a bawnun, Ahihleh, Pathian Tapa na hi maw leh? a chi va. Ama’n a kawmvah, Na hung chih bangun ka hi, a chi a. 71Huin amahun, Heetsahna dang bang i ngai nawntuan eimah? Eimah ngei in a kamsuaah i zata uhi, a chi va.

Currently Selected:

LUKE 22: SIMTBSI

Highlight

Copy