LUKE 13

Kisiih diing a hasotna

1Huchih hun laiin, Galili gam a mite Pilat in a thah a, a sisan uh Pathian biahna sa toh a halkhawmsah uh thu a kawma hung hilh mi hunkhop a um va. 2Jesu’n a dawng a, a kawmvah, Huchibang silte a thuaah jiahun hu Galilimite chu Galili gam a mite zousiah sanga sual diahkhola ngaihtuah na hi viai mah? 3Ka hung hilh ahi, Hilou e; nanguh zong na kisiih louh unchu huchibang mahin na mangthai veh diing uh, a chi a. 4Ahihlouhleh Siloam innsaang in a puuhkhum a, a netlup mi sawmlegiatte zong Jerusalem khua a um zousiah sanga misual diahkhol hia ngaituah na hi viai mah? 5Ka hung hilh ahi, Hilou e; Nanguh zong na kisiih louh unchu huchibang mahin na mangthai veh diing uhi, a chi hi.

Theipi kung gahlou tehkhinthu

6Ama’n hi tehkhinthu zong a soi a; Mi koiaha in a grep huanah theipi kung suan khat a nei a; huleh a gah ahung hawl a, khat zong a mu sih a; 7Huin ama’n grep hu an enkoltu kawmah, Ngai in, kum thum sung hi theipi kungah a gah ka hung hawl a, khat zong ka mu sih; phuuh mai in, bang diinga mun luaha um zing ahiai? a chi a. 8Ama’n a dawng a, a kawmah, Lalpa, tukum zong umsah nalai in, a kiimkot in ka tou diing a, bawng-eeh in ka phungvuh diing; 9Ahung gah taah leh a pha ahi diing a; ahung gah louha ahihleh huchian na phuuh na diing, a chi hi.

Khawlni a numei khat suhdamna

10Huleh ama’n khawlni in kikhopna inn khat ah thu a hilh a. 11Huleh ngai in, kum sawmlegiat haat louhna dawi in a mat numei khat a um a, a ngum a kuul khiukheu a, huleh a dingtang thei himhim sih hi. 12Jesu’n amah a muh tahin a kou a, a kawmah, Numei, na haatlouhna apat hahkhiah na hita, a chi a. 13Huleh a tungah a khut a koih a; huchi'n amahnu chu thakhat in ahung tangpah a; Pathian a paahtawita hi. 14Huin khawlnia Jesu’n mi a suhdam jiahin kikhopna inn houtu chu a lungthah a, mipite kawmah, Mihing natohna diing ni guup um hilou ahiai mah; hu sungin hung unla, hung kisudamsahta un, khawlni a hilouin, a chi a. 15Huphetin Lalpa’n amah a dawng a, Nang milepchiah, khawlni in na bawng uh aha, na sabiltung uh aha, a khihna apat suut in tui dawnsah diingin na puikhe veu uh hilou ahiai mah? 16Hi numei Abraham tanu ahih toh, ngai in, Setan in kum sawmlegiat sunga mat chu khawlni a, a gaahna suutsah louh diing ahiai mah? a chi a. 17Huleh ama’n hi thute a soi tahin a meelmate zousiah chu a zumta va; mipite chu a sil loupi bawl zousiah jiahin a kipaah chiat uhi.

Ankam tang leh tol tehkhinthu

18Huin ama’n, Pathian gam chu bang tobang ahiai? huleh bangtoh tehkhin diing ka hiai? 19Hichu mi’n ankam tang khat a laah a, a huana a paihluut bang ahi; huchu ahung pou a, a khang a, sing lianpi ahung hi a, huleh tungleeng vate’n a bate giahna’n a nei uh, a chi a. 20Huleh Pathian gam chu bangtoh tehkhin diing ka diai? a chi kiit a. 21Hichu tol, numei in a laah a, tehna thum dim an laha, a bawna a thoh veh masiah a phuum bang ahi, a chi hi.

Hinna a luutna lampi jim chu

22Huleh ama’n thuhilh kawmin Jerusalem lam zuanin khopi leh khoneu tawn jelin a chiah a. 23Huin mi khat in a kawmah, Lalpa, hutdama um diingte tawmtakhat hi u'maw? a chi a. Ama’n a kawmvah, 24Kot jim ah luut tum teitei un; ajiahchu ka hung hilh ahi, mi tampi’n luut a tum diing a, a luut thei sih diing uh; 25Inn neitu khatvei a thoh a, kot a khaah tah chian, nanguh innpua a dingin, Lalpa, Lalpa, kot hung honin, chia kot na kiuh chiangun, ama’n na kawmvah, Khoilam mi na hi viai, ka hung he ngei sih, chi'n ahung dawng diing. 26Hutah chian nangun, Na ma ah ka ne un, ka dawn va, huleh ka kotzing vah thu na hilh hi, na chi diing uh; 27Hizongleh ama’n, Ka hung hilh ahi, khoilam mi na hi viai mah ka hung he sih; nanguh sil gilou bawlte zousiah, ka kawm apat paimang un, ahung chi diing. 28Abraham leh, Isaak leh, Jakob leh zawlneite zousiah Pathian gam a um na muh va, nanguh polama paikhiah a um na hih uh na hung kiheet chiangun huah kah leh hagawi a um diing. 29Huleh suahlam leh, tumlam leh, simlam leh maallam apat in mi ahung diing va, Pathian gam ah a tou diing uhi. 30Huleh ngai un, a nunung pente a masa pena pang diing a um va, huleh a masa pente zong a nunung pena pang diing a um uhi, a chi a. 31Hu ni mahin Pharisai koite aha a hung va, a kawmah, Pawt inla, hi mun apat chiahmang in; ajiahchu Herod in thah hung tum ahi, a chi va. 32Ama’n a kawmvah, Chiah unla, hu si-aal kawmah hi thu va soi un, Ngai in, tuni leh jingchiang dawite nohdoh in natnate sudam in ni thum niin ka zou diing hi. 33Bang hitaleh tuni toh, jingchiang toh, a jing kiit toh ka pai jel diing hi; ajiahchu Jerusalem khua lou ah zawlnei sih ngeina hilou ahi, a chi hi.

Jesu’n Jerusalem a kahkhumna

34Aw Jerusalem, Jerusalem! zawlneite that leh nang kawma hung kisawlte suang a na seplum; aahpi’n a noute a hanuaia a opkhum bangin bangzah vei na tate opkhum ka tum a, hizongleh na ut sih uh. 35Ngai un, na inn uh a hawm a nuutsiatsah in a umta hi; huleh chihtahzetin ka hung hilh ahi, Lalpa min a hung pai chu a hampha hi na chih masiah uh na hung mu sih diing uh, a chi hi.

Currently Selected:

LUKE 13: SIMTBSI

Highlight

Copy