LUKE 12

Pharisaite tol apat kiveeng diing a thuhilhna

1Huchiah laia mipi simseeng louh khat leh khat kituanchil khop hiala ahung kikhop laiun, ama’n a masapenin a nungjuite kawmah, Pharisaite tol, lepchiahna lahah kiveeng un. 2Ajiahchu kilanglou diing a kikhuh bangmah a um sih a; huleh heet louh diing a kiphual zong bangmah a um sih. 3Hujiahin miala na soi photmah uh vaah ah jahin a um diing a; huleh innsung tawnga bilbula na soi uh chu innkhum vuum ah taangkou pihin a um diing hi. 4Huleh nanguh ka lawmte, ka hung hilh ahi, Tahsa sulumtheia, huzohchianga bangmah dang bawltheih nei nawnloute lau sih un. 5Hizongleh koi ahiai na lau diing uh ka hung hilh lawh diing: a thah nunga zong gawtmuna paihtheihna thuneipa amah chu lau un; ahi, ka hung hilh ahi, Amah chu lau un. 6Kawlgit ngaa paisa nihin a zuah veu sih viai mah? huleh a lahva khat zong Pathian ma ah mangngilh in a um sih hi. 7Hizongleh na lu va samzangte nasan sim veh ahi. Hujiahin lau sih un; kawlgit tampi sangin na luulzaw uhi. 8Ka hung hilh ahi, Koipouh mite ma a kei hung gum photmah chu mihing Tapa’n zong Pathian angelte ma ah amah a gum diing hi. 9Hizongleh mite ma a kei hung kiheetmohbawl chu Pathian angelte ma ah kiheetmohbawl in a um diing. 10Koipouh mihing Tapa kalha thusoi chu ngaihdam ahi diing a; hizongleh Hagau Siangthou kalha soisia chu a soisiatna ngaihdamsah ahi sih diing hi. 11Huleh nanguh kikhopna innte, thukhentute, huleh houtute ma a ahung pui tah chiangun bangchia bangthuin ka dawng diai, ahihlouhleh bang ka soi diai chih lungkham sih un. 12Bang jiahin i chih leh Hagau Siangthou in a huntahin na soi diing uh ahung hilh diing hi, a chi hi.

Mi hausa ngolpa tehkhinthu

13Huleh mihon laha khat in, a kawmah, Houtupa, ka unaupa kawmah gou hung kihoppih diingin soi in, a chi a. 14Ama’n a kawmah, Mihing, Kua’n ahiai kei na tungva vaihawmtu aha, tanhawmtu aha a hung bawl? a chi a. 15Huin ama’n a kawmvah, Pilvaang unla, eenna lahah kiveeng un; ajiahchu hauhsat mihing damsan ahi sih hi, a chi a. 16Huleh ama’n a kawmvah tehkhinthu khat a soi a, Mi hausa koi ahakhat chu a loua piang ahung pung mahmahta a. 17Huchi'n a lungsim in a kingaihtuah a, Ka buh le baal koihna diing lah ka nei sih a, bang loh diing ka diai? a chi a. 18Huin, Hikhu ka bawl diing, ka buh innte ka phel diing a, a lianzaw ka lam diing; huleh huah ka buh leh baalte leh ka thuampua zousiah ka koih diing; 19Huleh ka hagau kawmah, Hagau, kum tampi sunga diing thuampua tampi na neita a; kitawlnga inla, ne in, dawn in, huleh nuamtahin um in, ka chi diing, a chi a. 20Hizongleh Pathian in a kawmah, Nang mingol, tujan leh na hinna hung kilaahsah diing ahi; hu na sil kholkhawmte koi a diing ahita diai? a chi a. 21Amah chauh diing a gou kikhol a, Pathian lama hausa lou chu huchi ahi veu hi, a chi hi.

Damsung khosah lungkham lou diing a hilhna

22Huin ama’n a nungjuite kawmah, Hujiahin ka hung hilh ahi, Bang ahiai ka neeh diing, chi'n na hinna diing uleh; bang ahiai ka silh diing, chi'n na tahsa diingun lungkham sih un. 23Hinna chu neeh diing sangin a thupi zaw a, huleh tahsa zong puansilh sangin a thupi zaw hi. 24Va'aahte ngaihtuahun, buh lah a tuh sih va, aat zong a aat sih uh; buhpang leh buhinn zong a nei sih uh; himahleh Pathian in amahuh a vaah hi; nanguh vate sanga bangchituha hoihzaw na hita viai mah? 25Huleh na lahva kua’n ahiai lungkham jiaha, a din tongkhata behlap thei? 26Huchia nangun hu sil neupa tawp bawn na bawl theih louh uleh bang diinga a dangte lungkhampih na hi viai? 27Lili paahte khandan ngaihtuah un; nna a tong sih va, pat a kheeh sih uh; himahleh ka hung hilh ahi, Solomon zong a loupina zousiaha a kijepin hi lili paahte laha khat banga jep in a um sih hi. 28Huchia gam a hampa tunia hing a, a jing a meikhuuh a paih mai diing bawn Pathian in huchituh a, a jep inchu, Aw nanguh ginna tawmte, bangchituha nanguh silhsaha um diing na hita viai mah? 29Huleh na neeh diing uh aha, na dawn diing uh aha hawl sih un; ginlahna lungsim nei in zong um sih un. 30Ajiahchu khovela namte’n hihaw zousiah a hawl uh; huleh na Pa un hi silte na mamoh uh chih a he hi. 31Hizongleh nangun chu Pathian gam hawl zaw un; huchi'n hi silte ahung kipiahbeh diing hi. 32Pawl tawmte, lau sih un; bang jiahin i chih leh na kawmva lalgam piah chu na Pa uh kipaahna zawngtah ahi. 33Na neih pouh uh zuah unla, migentheite kawmah pia un; vaan ah guta chiah louhna leh, leikha neehsiat louhna ah, dangka ip lui thei lou leh gou sethei lou kikhol zaw un. 34Ajiahchu na gou uh umna photah na lungtang u’zong a um diing hi.

Khrist hung kiitna diing thu a sumkoltu ginum tehkhinthu

35Na kawng uh gaah unla, na thaumei u’zong kuang sah zing un. 36Mi a pu kiteenna ankuang luina apat a hung pai a kotkhaah ahung kiuh tah chianga na honsahpah thei diing a na ngaah zing bangin um un. 37A pu uh a hung tahchianga amah na ngaah zinga a muh suaahte a hampha uhi; chihtahzetin ka hung hilh ahi, a kawng a gaah diing a, amahuh chu ankuang ah a tousah diing a, a neeh uh a bawlsahta diing. 38Huleh jan khang laiin ahiai, jingthoh in ahiai hungleh, huchibanga ahung muh in chu, hu suaahte chu a hampha uhi. 39Hichu he un, guta hung diing hun inn neitu in he henla hileh a veeng diing a, a inn a suvangsah sih diing. 40Hujiahin nanguh zong kiging zingin um un; ajiahchu na ngaihtuah louh laitah va mihing Tapa chu hung diing ahi, a chi a. 41Huin Peter in a kawmah, Lalpa, hi tehkhinthu hi keiuh kawm chauh a na soi ahiai, ahihlouhleh mi zousiah kawm a zong? a chi a. 42Lalpa’n, Sumkoltu ginum leh piltah, a pu in a hunchina a an tan diing uh hawmsah diing a, a innkuanpihte tunga houtu a, a siam diing chu koipen ahi diai? 43A pu ahung pai chianga huchibang bawl a ahung muh hu suaah chu a hampha hi. 44Dihtahin ka hung hilh ahi, Amah chu a neih zousiah tunga thuneitu in a siam diing hi. 45Hizongleh hu suaahpa’n a lungsim in, Ka pu hungzoh lou diing hita, chi'n a suaah numei leh pasalte na jep in, huleh ne a dawnin na kham taleh; 46Hu suaahpa pu chu a gintaat louh ni khat in a heet louh kalin ahung diing a, tum nih a suah diing a, ginglou mite tan bang a tangsah diing hi. 47Huleh suaah a pu deihzawng he ngal a ana kiginglou leh a deihzawng banga bawl lou chu tampivei vuaah ahi diing. 48Hizongleh he lou a, vuaahna taah hial sil bawltu chu tawmtakhat vei vuaah ahi diing Ajiahchu koipouh tampi kipiahna kawmah tampi a kiphuut diing a, huleh mi’n tampi a kolsah uh kawmah a tamzosem a phuut diing uhi.

Khrist mihingte khentu

49Leitung a mei khesuh diing a hung ka hi; tuin zong kaangpanta leh chi hina'ng e! 50Hizongleh baptisma tan diing khat ka nei hi, hu ka taangtun masiah ka ngaih muanglou hina e! 51Lei tunga lemna leengsah diing a hung hungsa na hi viai mah? Hilou hial, ka hung hilh ahi, kikhenna umsah diing a hung ka hi zaw hi. 52Ajiahchu tu a kipanin innsung khat a mi ngaa um chu nih langah thum, huleh thum langah nih pangin a kikhen diing uh. 53Pa in tapa, huleh tapain pa; nuin tanu, huleh tanuin nu; innpinuin a mounu, huleh mounuin a innpinu a dou diing, a chi a. 54Huleh ama’n mipite kawmah zong, Nangun nitumna lama mei hung kai na muh chiangun guah zu diing ahi na chipah ngal va; huleh huchi'n ahung um ngei a. 55Huleh sim huih hung nung na heet chiangun khua lum diing ahi na chi va, huchi'n ahung lum ngei hi. 56Nanguh milepchiahte Aw, vaan leh lei umzia lah na hesiam va, bang diinga tulai hun umzia hesiam lou na hi viai? 57Huleh bang diinga nangun bang dih ahiai chih ngaihtuahlou na hi viai? 58Thukhentu ma a na langpa toh na chiah chiangin lamkal ah amah apat suahtaatna diing hawl haamhaam in; huchilouin chu vaihawmtu ma ah ahung tut diing a, vaihawmtuin miman houtu kawmah ahung pekhe diing a, huleh miman houtuin suangkul ah ahung khumkha diing hi. 59Ka hung hilh ahi, paisa san khat tan a na dit bei keei masiah hu apatin na pawt hial sih diing hi, a chi hi.

Currently Selected:

LUKE 12: SIMTBSI

Highlight

Copy