JOHN 7

Jesu leh a unaute kihouna

1Hi silte nungin Jesu chu Galili gam ah a vaah a, Judate’n thah a tup jiahun Judia gam a pha nuamta sih a. 2Huleh Judate bawh kuut ahung naita a. 3Hujiahin a unaute’n a kawmah, Hi apat in Judia gam ah chiahmang in, na nungjuite’n na natohte a muh theihna diingun; 4A minthanna diing bawl ngalin koima’n sil bang aha a guuhin a bawl ngei sih hi. Hi silte bawl na hihleh khovel kawmah kimusah in, a chi va. 5Ajiahchu a unaute ngei in zong amah a gingta sih uhi. 6Huin Jesu’n a kawmvah, Ka hun a tung nai sih; hizongleh nanguh hun chu bangchih laipouh in a tung zing hi. 7Khovel in nanguh ahung ho thei sih a, kei chu ahung hua uhi: a natohte uh a gilou chih ka heetsah jiahin. 8Nanguh gual vaahna ah chiahtou un; kei chu hi gual vaahna ah ka hungtou nai sih diing hi. Ajiahchu ka hun a tung bukim nai sih hi, a chi a. 9Hi thute a kawmva a soi zohin amah chu Galili gam ah a um zing nalai a. 10Hizongleh a unaute ankuang luina a, a chiahtouh nungun amah zong vaantaang heet hilou in, a guuhin a chiahtou a. 11Huin Judate’n gual vaahna ah amah a hawl va, Khoi a um ahiai? a chi va. 12Huchi'n amah tungtaang ah mipite lahah phunna nasatah a umta a; ajiahchu khenkhat in, Mi hoih ahi, a chi va; a dangin, Mite a heem a hizaw, a chi va. 13Ahihvangin Judate lau jiahin koima’n a tung thu a langtangin a soi ngam sih uhi.

Jesu’n Jerusalem a Pathian a kipana hung a hihdan a soina

14Huleh ankuang lui saan lai tahin Jesu chu Pathian biahinn ah a chiahtou a, thu a hilh a. 15Huleh Judate’n thumah a sa va, Hipa’n jil ngeiloupi a bangchidan a lehkha he ahiai? a chi va. 16Huin Jesu’n amahuh a dawng a, Ka thuhilh chu keimaha hung kuan ahi sih a, ahung sawlpa a hung kuan a hizaw hi. 17Mi koipouh in a deihzawng a bawl inchu thuhilhna chu Pathian a kuan ahiai, ahihlouhleh keimah phuaah thuh ka soi ahiai chih a he diing uh. 18Koipouh amah phuaahthuh thusoi chu amah kipaahtawina diing hawl ahi; hizongleh koipouh a sawlpa paahtawina diing hawl chu, amah ngei chu mi dih ahi a, amah ah dihtat louhna himhim a um sih hi. 19Mosi’n nanguh daan ahung pe sih eimah? hizongleh na lahva koima’n daan na jui sih uh. Bang diinga thah hung tum na hi viai? a chi a. 20Mipite’n a dawng va, Dawi paai na hive, kua’n ahiai nang thah hung tum? a chi va. 21Jesu’n a dawng a, a kawmvah, Nna khat ka tong a, na bawnun thumah na sa uhi. 22Huchi'n Mosi’n zehtan thu nanguh ahung pia a, (Mosi piah ahi sih a, pulepate a hung kipan ahi zaw), huleh khawlni’n mi zeh na tan veu uh. 23Mosi daan bohsiat louh na diing a mi’n khawlni a zeh a tan inchu, ke’n khawlni a mi khat ka damsiangsah jiahin ka tungah na lungthah uh ahiai mah? 24A latdan bangin thu khen sih unla, dihtattahin khen zaw un, a chi a. 25Huin Jerusalem mi khenkhat in, Hipa, thah a tup pa uh hilou ahiai mah? 26Hizongleh endih vua, haangtahin thu a soi a, amahun laha kawmah bangmah a soi sih uh. Amah hi Khrist chu ahi chih vaihawmtute’n a he tahtah uh adiai? 27Enlah hipa khoia hung kipan chih i he ngal a, hizongleh Khrist ahung chiangin chu koima’n a he sih diing hi, a chi va. 28Huin, Jesu chu Pathian biahinn ah thuhilhin a kikou a, Nangun kei na hung he va, huleh khoi a hung kuan chih zong na hung he uh; keimah thua hung ka hi sih a, hizongleh amah ahung sawlpa chu a dih ahi, nangun amah na he sih uh. 29Hizongleh ke’n amah ka he hi; ajiahchu amah a kuana hung ka hi a, huleh amah hung sawl ka hi, a chi a. 30Huin amah mat a tum va, hizongleh a hun a tun nai louh jiahin koima’n a tungah khut a nga sih uh. 31Huleh mipi tam tahin amah a gingta va, Khrist ahung chiangin hipa bawl sanga tamzaw silmah a bawl diai? a chi uh. 32Pharisaite’n a tung thu ah mipite hutobanga a phun uh a ja va, huleh Pharisaite leh siampu lalte’n amah man diingin houtute a sawl va. 33Jesu’n a kawmvah, Tomchakhat na kawmvah ka um diing a, huzohchian ahung sawlpa kawmah ka chiah diing hi. 34Nangun na hung hawl diing va, na hung mu sih diing uh; huleh ka umna ah na hung thei sih diing uh, a chi a. 35Huin Judate amahuh kihouin, i muh louh diing a khoi a chiah diing a de aw? Jentelte laha kithedalhte kawma chiah a Jentelte thu va hilh diing a diai? 36Na hung hawl diing va, na hung mu sih diing uh; huleh ka umna ah na hung thei sih diing uh, a chih bang a chihna a diai? a chi uhi.

Hagau Siangthou tungtaang soilawhna

37Huleh gual vaahna ni loupi, ni nunungpenah Jesu chu a ding a, a kikou a, Koipouh a dang a taahleh ka kawmah hung henla, dawn heh. 38Koipouh kei hung gingta chu Pathian lehkhathuin a soi bangin a sunga kipanin tuihing luite a luang doh diing, a chi a. 39(Hizongleh hichu ama’n amah gingtate’n a muh diing uh Hagau Siangthou a soi na ahi; ajiahchu Hagau Siangthou piah ahi nai sih a, Jesu paahtawia a um nai louh jiahin). 40Hujiahin mipi tamtahte’n hi thu a jah tahun, Tahzetin hipa zawlnei khu ahi, a chi va; 41Adangte’n, Khrist ahi, a chi uh. Hizongleh khenkhatte’n, Khrist Galili gam ah ahung piang diai mah? 42Pathian lehkhathu in, Khrist chu David haahte lahah leh David teenna khua Bethlehem ah ahung piangdoh diing, a chi sih eimah? a chi uh. 43Huchi'n amah jiahin mite lahah kikhenna a umta hi. 44Huleh a lahva khenkhat in amah mat a tum va, hizongleh koima’n a tungah khut a nga sih uh. 45Huin houtute chu siampu lalte leh Pharisaite kawmah a hung va, huleh amahun a kawmvah, Bang diinga amah hung puilou? ana chi va. 46Houtute’n, Hipa thusoi bangin koima’n thu soi ngei himhim sih, a chi va, a dawng va. 47Huin Pharisaite’n, Nang u’zong heema um na hita uh maw? 48Vaihawmtute leh Pharisaite lahah amah gingta mi a umkha ta’imah? 49Hizongleh daan he lou hi mipite chu haamsethuaah ahi uh, a chi va, a dawng va. 50Nikodem, jan a Jesu kawma hungpa, a lahva telve in a kawmvah, 51I daanun mi amah kama thu jah ma leh, a silbawlte heet ma in siamlouh a tangsah ngei ei mah? a chi a. 52Amahun a dawng va, a kawmah, Nang zong Galili mi na hia maw? Hawl inla, en in, ajiahchu Galili gam ah zawlnei himhim a piang ngei sih hi, a chi va. 53Huin mi chin a inn chiat vah a chiahta uhi.

Currently Selected:

JOHN 7: SIMTBSI

Highlight

Copy