JOHN 8

Aangkawm lai a mat uh numeinu

1Jesu chu Olive taang ah a chiahta a. 2Huleh jingkal matahin Pathian biahinn ah ahung kiit a, mi zousiah a kawmah a hung a; huleh amah chu a tou a, amahuh thu a hilh hi. 3Huleh lehkhagialtute leh Pharisaite’n numei khat, a aangkawm lai a, a mat uh, a kawmah ahung pui va, a lai va a dinsah zoh un, 4A kawmah, Houtupa, hi numei a aangkawm laitaha kiman ahi a. 5Daan lehkhabu ah Mosi’n hitobang mi chu suang a sehlup diing thu ahung pia hi; hizongleh nang bangchi diing na chi ei? a chi va. 6Hichu amah heehna diing a muh theihna diing va a ze-etna a, a soi uh ahi a. Hizongleh Jesu chu a kuun a, amahuh soi jalou hileh kilawm in, a khutzung in lei a gial a. 7Huchi'n a dot mun jiahun a thoudoh a, a kawmvah, Na lahva sualna nei hetlou penin amahnu chu sep masa heh, a chi a. 8Huin a kuun kiit a, lei a gial jel a. 9Huleh amahun hi thu a jah un a sialepha heetna un siamlouh tangsah in, a upapen a kipan a tawptanin khat khat in a chiahmangta va; Jesu chauh leh numeinu a lai a diing toh a um hi. 10Huin Jesu a thou a, numeinu chih louh midang a muh louh tahin a kawmah, Numei, nang hung heehte khoi a um ahita viai? koima’n siamlouh ahung tangsah sih maw? a chi a. 11Amahnu’n, Koima’n hung tangsah lou, Lalpa, a chi a. Jesu’n a kawmah, Ke’n zong siamlouh ka hung tangsah sih hi, chiah inla, sual kiit nawn sin, a chi hi.

Jesu khovel vaah a hihdan

12Huin Jesu’n a kawmvah, Kei khovel vaah ka hi; koipouh kei hung jui chu mial ah a khohei sih diing a, hizongleh hinna vaah a nei zaw diing hi, a chi a. 13Hujiahin Pharisaite’n a kawmah, Nangmah leh nangmah thu na kiheetsah ahi, na thu heetsah a dih sih hi, a chi va. 14Jesu’n a dawng a, a kawmvah, Keimah leh keimah thu kiheetsah hizongleh ka thu heetsah a dih hi; ajiahchu khoi a kuan a hung ka hih leh, khoi a chiah diing ka hih ka he hi; hizongleng nangun khoi a kuan a hung ka hih leh, khoi a chiah diing ka hih na he sih uh. 15Nangun tahsa daan in vai na hawm uh; ke’n koimah vai ka hawmsah sih. 16Huleh vai hawmsah hitazongleng ka vaihawm chu a dih hi; ajiahchu kei ngen ka hi sih a, kei leh ka Pa ahung sawlpa ka hi zaw uhi. 17Na daan lehkhabu va’ zong, Mi nih thuheetpih chu a dih ahi, chih gelh ahi. 18Kei chu keimah thuheetpih khat ka hi a, huleh Pa ahung sawlpa’n ka thu ahung heetpih hi, a chia. 19Huin amahun, a kawmah, Na Pa khoiah a um ei? a chi va Jesu’n a dawng a, Nangun kei lah na hung he sih va, ka Pa lah na he sih uh; kei hung he hile uchin ka Pa zong na he diing uh, a chi a. 20Hi thute Jesu’n Pathian biahinn a thu a hilh laiin sumkoihna munah a soi a; huleh koima’n a tungah khut a nga sih, ahun a tun nai louh jiahin. 21Huin Jesu’n a kawmvah, Ka chiahmang diing a, nangun na hung hawl diing uh; ka chiahna ah na hung thei sih diing uh, a chi kiit a. 22Huin Judate’n, Amah leh amah a kithat diing a diai? a chi va; ama’n, Ka chiahna diing ah na hung thei sih diing uh, a chih jiahin. 23Huleh ama’n a kawmvah, Nanguh chu nuai lama kipan na hi va; kei chu tunglama kipan ka hi; nanguh hi khovel a na hi va, kei chu hi khovel a ka hi sih. 24Hujiahin na kawmvah, Na sualna vah na si diing uh; ajiahchu kei amah ka hi chih na gintaat louh uleh na sualna vah na si diing uh, ka chi ahi, a chi a. 25Huin amahun a kawmah, Nang koi na hiai? a chi va Jesu’n a kawmvah, Achiila kipana na kawmva ka soi khu mah ka hi, 26Na tung thu vah soi diing leh vaihawmsah diing tampi ka nei hi; hizongleh ahung sawlpa chu a dih hi; huleh amah apata ka jahte chu khovel kawmah ka soi veu hi, a chi a. 27Ama’n Pa thu a kawmvah a soi ahi chih amahun a he sih uhi. 28Huin Jesu’n a kawmvah, Mihing Tapa na khaikaang zoh chiangun amah ka hi chih leh, keimah thu in bangmah ka bawl sih a, hizongleh ka Pa’n ahung hilh bangin hi thute ka soi zaw ahi, chih na he diing uh. 29Amah ahung sawlpa ka kawmah a um hi; Pa'in ka ngen in ahung nuse sih; ajiahchu a kipaah zawng silte ka bawl zing hi, a chi a. 30Hi thute a soi laiin mi tampi’n amah a gingta uhi. 31Huin Jesu’n amah gingta Judate kawmah, Ka thu a na um zing uleh ka nungjuite na hitahzet diing uh. 32Huleh thutah na he diing va, thutahin nanguh ahung suaahtasah diing hi, a chi a. 33Amahun, Abraham haahte ka hi va, bangchih mahin koimah salin ka taang ngei sih uh; bangchidan a na suaahta diing uh, na chih ahiai? chi'n a dawng va. 34Jesu’n amahuh a dawng a, Chihtahzetin, chihtahzetin ka hung hilh ahi, Koipouh sual bawl chu sual suaah ahi. 35Suaah chu kumtuang in innah a um zing sih; hizongleh Tapa chu kumtuang in a um zing hi. 36Hujiahin Tapa in ahung suaahtaatsah inchu na suaahta tahzet diing uhi. 37Abraham haahte na hi uh chih ka hung he hi; hizongleh nangun kei thah na hung tum uh, ka thu nanguh a, a um louh jiahin. 38Ke’n ka Pa kawma ka muhte ka soi a; nangun na pa kawmva na muhte uh na bawl uhi, a chi a. 39Amahun a dawng va, a kawmah, Abraham ka pa uh ahi, a chi va Jesu’n a kawmvah, Abraham tate hile u’chin Abraham natohte na tong diing uh. 40Hizongleh tuin kei, Pathian kawma ka jah thutah na kawmva hung hilhpa thah na hung tum uh; Abraham in hichibangin a bawl sih hi. 41Nangun chu na pa uh silbawlte na bawl uhi, a chi a. Huin amahun a kawmah, aang kikawm a piang ka hi sih uh; Pa khat ka nei uh, huchu Pathian ahi, a chi va. 42Jesu’n a kawmvah, Pathian na Pa uh hile chu keimah na hung lungsiat diing uh; ajiahchu Pathian a kipana hung pawt ka hi a; keimah thu in ka hung sih a, ama’n ahung sawl zaw ahi. 43Bangchidan a ka haam dan hesiam lou na hiviai? ka thu na pom theih louh jiahun ahi. 44Nang u’chu na pa uh diabol a hung kuan na hi uh, huleh na pa uh deihzawng na bawl ut uhi. Amah chu a chiila kipana tualthat ahi a, huleh thutah ah a um sih, amaha thutah a um louh jiahin. Juau a soi inzong amah a ngei a soi ahi; bang jiahin ahiai i chih leh amah mi zuau ahi a, huleh zuau pa zong ahi. 45Thutah ka soi jiahin nangun na hung gingta sih uhi. 46Na lahvah kua na hi viai sual thu a siamlouh hung tangsah? Thutah ka soi leh bang diing a hung gingta lou na hi viai? 47Pathian a hung kuanin Pathian thu a ngaikhe veu; hujiahin na ngaikhe lou uh ahi, Pathian a hung kuan na hih louh jiahun; a chi a. 48Huin Judate’n a dawng va, a kawmah, Samarimi na hi a, huleh dawipaai na hi ka hung chih uh ka chi dih mahmah sih viaimah? a chi va. 49Jesu’n a dawng a, Dawipaai ka hi sih a, ka Pa ka paahtawi ahi zaw; nangun kei na hung paahtawi sih uh. 50Keimah loupina diing chauh ka hawl sih; a hawl leh vaihawmtu khat a um hi. 51Chihtahzetin, chihtahzetin ka hung hilh ahi, Mi koipouh in ka thu a zop leh sih na a mu ngei himhim sih diing, a chi a. 52Huin Judate’n a kawmah, Tuinchu dawipaai na hi chih ka hung heta uh. Abraham a sita a, huleh zawlneite zong a sita uh; hizongleh nangin, Mi koipouh in ka thu a zop leh sih na a mu ngei himhim sih diing, na chi hi. 53Ka pu uh Abraham sisa sanga loupizaw na hiai mah? huleh zawlneite zong a sita uh; nang leh nang koia kibawl na hiai? a chi va. 54Jesu’n, Kei le kei kipaahtawi hitaleng ka kipaahtawina bangmah ahi sih diing; ahung paahtawi chu ka Pa, nangun ka Pathian uh ahi na chih uh ahi. 55Hizongleh nangun amah na he sih uh; ke’n chu amah ka he hi; amah ka he sih chitaleng nanguh banga mi zuau ka hita diing hi; hizongleh amah ka he a, huleh a thu zong ka zop zing hi. 56Na pu uh Abraham in ka ni muh diing a nuam mahmah a, huleh a mu ngei a, a kipaah mahmah hi, a chi a. 57Huin Judate’n a kawmah, Nang kum sawmngaa zong ching nailou chin a, Abraham na mukha maw? a chi va. 58Jesu’n a kawmvah, Chihtahzetin, chihtahzetin ka hung hilh ahi, Abraham um ma in ka um hi, a chi a. 59Huin amahun a sehna diingin suang a la va, hizongleh Jesu chu a kiphual a, Pathian biahinn apat a pawta, a lahva paisuaahin a chiahta hi.

Currently Selected:

JOHN 8: SIMTBSI

Highlight

Copy