JOHN 6

Mipi saang ngaa vaahna

1Hi silte nungin Jesu chu Galili diil, Tiberi diil kichimah gaal lamah a chiahta a. 2Huleh natna veite tunga a silmah bawlte a muh jiahun mipi nasatahin amah a jui va. 3Jesu chu taang ah a chiahtou a, huah a nungjuite toh a tou hi. 4Huleh chiahkaan kuut, Judate gual vaahna chu a naita a. 5Huin Jesu a daah a, mi tampi a kawm lam zu an a muh in Philip kawmah, Hite neeh diing tanghou khoi a ahiai i lei diing? a chi a. 6Ama’n hichu amah etkhiahna diing a, a soi ahi a, ajiahchu bang ahiai a bawl diing ama’n a kiheet hi. 7Philip in a kawmah, Mi chinin themkhat chiata a tan diing u’zong makhai za nih man tanghou in a daih sih diing hi, a chi a, a dawng a. 8A nungjuite laha khat, Simon Peter unaupa Andru in a kawmah, 9Hitah ah barley-buh tanghou pheeng ngaa leh ngagawp nih nei naupang khat a um hi, ahihvangin mi hizahpi lahah bangtham ahi diai? a chi a. 10Jesu’n, Mipite tousah un, a chi a. Huleh hutah ah hampa tampi a um a. Huchi'n mipite chu a touta va, a tam lam u’chu saang ngaa vel ahi uh. 11Huin Jesu’n tanghou pheengte chu a la a, huleh a vangpiah zohin a nungjuite kawmah a hawm a, a nungjuite’n a toute kawmah; huchimahbangin ngate zong a deihkhop un a hawm uhi. 12Huin a kham nungun ama’n a nungjuite kawmah, Bangmah mang lou diingin a nengthemte luaah un, a chi a. 13Hujiahin a luaahkhawm va, barley buh tanghou pheeng ngaa nete neeh valin bawm sawm le nih a luaah dim uhi. 14Huin Jesu silmah bawl a muhun hu mipite’n, Tahzetin hipa chu khovel a zawlnei hung diingpa ahi ngei mei, a chi uhi.

Jesu tuitung a, a paina

15Huin Jesu’n amah chu kumpipa a bawl diing a pawngmat diingin hung diing ahi uh chih a heet tahin amah ngenin a chiahtuamta a. 16Huleh nitaah lam ahung hihin a nungjuite diilaha chiahsuh va. 17Kuang khatah a tuang va, Kapernaum lam zuanin diil tungah a chiahuh. Huleh khua a mialta a, Jesu laha kawmvah ahung nai sih hi. 18Huihpi haat tah a nun jiahin tui a kinawh saang hulhul a. 19Huchi'n farlong sawmnih le ngaa aha, sawmthum aha a jap nungun Jesu diil tunga a keenga pai a, kuang lam hung naih a mu va, huleh a lau uhi. 20Hizongleh ama’n a kawmvah, Kei ka hi, lau sih un, a chi a. 21Huin amahun uttahin amah chu kuang ah a tuangsahta va; huleh kuang chu thakhat in a zot gam uh a tungpahta hi.

Jesu’n hinna tanghou a hihdan a soina

22A jingni’n diil gaal lehlam a ding mipite’n a nungjuite tuanna loungal kuang dang a um sih chih leh, Jesu a nungjuite toh kuang ah a chiah sih a, a nungjuite a ngen un a chiah uh chih a heta va. 23(Ahihvangin Tiberi akipanin Lalpa’n a vangpiah nunga tanghou a neehna mun kawmah kuang dang ahung tung ngal a;) 24Huchi'n mipite’n Jesu hileh, a nungjuite hileh a um nawn sih uh chih ahung heet tahun amah u’zong kuang neute ah a tuang va, Jesu hawlin Kapernaum ahung tung va. 25Huleh amah chu diil gaal lehlama ahung muh tahun a kawmah, Rabbi, bangchih a hitah tung na hiai? a chi va. 26Jesu’n a dawng a, a kawmvah, Chihtahzetin chihtahzetin ka hung hilh ahi, Silmahte na muh jiah va hung hawl na hi sih va, hizongleh tanghou na neeh va, na vah jiahun na hung hawl uh ahi zaw hi. 27An mangthang diing mai hawlin phephe sih unla, kumtuang hinna dong a um zing diing an, mihing Tapa in ahung piah diing hawlin phe zaw un; ajiahchu Pa Pathian in amah a chiamchihta hi, a chi a. 28Huin amahun a kawmah, Pathian nna ka toh theihna diingun bang ahiai ka bawl diing uh? a chi va. 29Jesu’n a dawng a, a kawmvah, Amah ahung sawlpa na gintaat uh, hichu Pathian natoh ahi, a chi a. 30Hujiahin amahun a kawmah, Ahihleh ka muh va ka hung gintaat theihna diingun bang chiamchihna na hung ensah diai? 31Ka pulepate un gamdaiah manna a ne uh; Ama’n vaan a kipanin neeh diing tanghou a pia, chia kigelh bangin, a chi va. 32Huin Jesu’n a kawmvah, Chihtahzetin, chihtahzetin ka hung hilh ahi, Mosi in hu tanghou vaan a kipanin ahung pe sih a, hizongleh ka Pa in vaan a kipanin tanghou dihtah ahung pe zaw hi. 33Bang jiahin ahiai i chih leh Pathian tanghou chu vaan a kipana hung kumsuh, khovel kawma hinna pe pa chu ahi, a chi a. 34Amahun a kawmah, Lalpa, hu tanghou chu kumkhuain hung pia in, a chi va. 35Jesu’n a kawmvah, Kei hinna tanghou chu ka hi; koipouh ka kawma hung chu a gilkial ngei sih diing, huleh koipouh kei hung gingta chu a dangtaah ngei sih diing, 36Hizongleh ka hung hilh ahi, Nangun na hung muh un zong na hung gingta sih uh. 37Ka Pa’n ahung piah zousiah ka kawmah ahung diing; huleh ka kawma hung photmah chu bangchi lezong ka nohdoh het sih diing. 38Ajiahchu keimah deihzawng bawl diing a vaan apata hungsuh ka hi sih a, ahung sawlpa deihzawng bawl diing a hungsuh ka hi zaw hi. 39Huleh Pa ahung sawlpa deihzawng chu hi ahi, Ama’n ahung piah zousiah khatbeeh mangsah lou a, hizongleh ni tawpni chianga ka kaihthoh chu, 40Huleh hichu ahung sawlpa deihzawng ahi, Koipouh Tapa mu a, gingta in kumtuang hinna a neih a, huleh ke’n ni tawpni chianga amah ka kaihthoh chu, a chi a. 41Huin Judate a tungah a phun va, Kei vaan apata tanghou hung kumsuh ka hi, a chih jiahin. 42Huleh amahun, Hipa hi Jesu, Joseph tapa, a pa leh a nu zong i heet uh hilou ahiai mah? Vaan apata hung kumsuh ka hi, bangchidana a chih ahiai? a chi va. 43Hujiahin Jesu’n a dawng a, a kawmvah, Phun phun sih un. 44Pa ahung sawlpa’n a hiip louhleh koimah ka kawmah ahung thei sih; huleh ke’n amah nitawp ni chiangin ka kaithou diing. 45Zawlneite lehkhabu ah, Pathian hilhin a um veh diing uh, chih gelh ahi. Hujiahin michin Pa thu ja a, he photmah ka kawmah ahung veu hi. 46Mi koimah in Pa a mu ngei sih, Pathian a kipana hungpa loungal; ama’n chu Pa a muta hi. 47Chihtahzetin, chihtahzetin ka hung hilh hi, Koipouh kei hung gingta in kumtuang hinna a neita. 48Kei hinna tanghou chu ka hi. 49Na pulepate un gamdaiah manna a ne va, a si uh. 50Hichu vaan apata hung kumsuh tanghou, mi’n a neeh a, a sih louh nadiing uh chu ahi. 51Kei vaan apata tanghou hing hung kumsuh chu ka hi, mi koipouh in hi tanghou a neeh inchu kumtuang in a hing diing uh; huleh ka tanghou piah diing chu khovel hinna diing a ka piah diing ka tahsa ahi, a chi a. 52Hujiahin Judate a kinial va, Bangchidana hipa’n a tahsa neeh diing a pe thei diing ahiai? a chi va. 53Huin Jesu’n a kawmvah, Chihtahzetin, chihtahzetin ka hung hilh ahi, Mihing Tapa tahsa na neeh va, huleh a sisan na dawn louh uleh nanguhah hinna na nei sih uh. 54Koipouh ka tahsa ne a, huleh ka sisan dawnin kumtuang hinna a neita; huleh ke’n amah chu ni tawpni chian ka kaithou diing hi. 55Ajiahchu ka tahsa hi an ahitahzet a, huleh ka sisan zong dawn diing tahzet ahi. 56Koipouh ka tahsa ne a, ka sisan dawn chu keiah a um zinga, huleh kei amah ah ka um zing hi. 57Pa hingin ahung sawl a, huleh Pa jiaha ka hin bangmahin koipouh kei hung ne chu kei jiahin amah zong a hing diing. 58Hichu vaan a kipana tanghou hing hung kumsuh chu ahi; na pulepate un manna a neeh va a sih banguh chu ahi sih; koipouh hi tanghou ne chu kumtuang in a hing diing hi, a chi a. 59Hi thute ama’n Kapernaum khua a, a um laiin kikhopna inn ah a soi hi.

Ginglah nungjuite

60Hujiahin a nungjuite tampiin hi thu a jah un, Hichu thu hahsa ahi, kua’n ahiai ngai thei diing? a chi va. 61Huin Jesu’n hi thu ah a nungjuite a phun uh chih a lungsima a heet in, a kawmvah, Hi thuin nanguh ahung lunghilousah maw? 62Mihing Tapa tuma a, a umna ngeiah kaltou mu le u’chin bang na loh diviai? 63Suhingtu chu hagau ahi a, tahsa chu bangmah a phatuam sih; na kawmva ka thusoite chu hagau ahi a, huleh hinna zong ahi. 64Hizongleh na lahvah gingta lou khenkhat na um uh, a chi a. Ajiahchu Jesu’n a tuung apata a gingta loute leh amah mansah diingpa a heetsa ahi. 65Huleh ama’n, Hujiahin ahi, Ka Pa’n ahung piah louhleh koimah ka kawmah ahung thei sih, chia na kawmva ka soi, a chi a. 66Hu huna kipanin a nungjuite tampi a nungpaita va, amah a jui nawnta sih uhi.

Peter in Jesu Khrist a gintaat a phuanna

67Huin Jesu’n sawmlenihte kawmah, Nanguh zong na paimang diing uh maw? a chi a. 68Simon Peter in a dawng a, a kawmah, Lalpa, koi kawmah ahiai ka chiah diing uh? Nang in kumtuang hinna thute na nei hi. 69Huleh nang chu hu Pathian hing Tapa, Khrist chu na hi chih ka gingta va, he zong ka he uhi, a chi a. 70Jesu’n amahuh a dawng a, Nanguh sawmlenihte ka hung teel na hi sih viai mah? huleh na lahva khat diabol ahi, a chi a. 71Ama’n Simon tapa, Juda Iskariot thu a soi ahi; ajiahchu amah hi sawmlenihte laha telve, amah mansah diingpa chu ahi.

Currently Selected:

JOHN 6: SIMTBSI

Highlight

Copy