JOHN 5

Bethesda diil a mizeng suhdamna

1Hi nungin Judate gual vaahna khat a um a, Jesu chu Jerusalem ah a chiahtou a. 2Huleh Jerusalem ah belaam kotkhaah kawmah diil khat, Hebrai haama Bethesda kichi, innliim ngaa nei a um a. 3Hute ah damloute, mittawte, keengbaaite, huleh zengte a tam a tam a lum va, tui kiloh ngaah in. 4Ajiahchu hun chihkhat chiangin angel khat hu diil ah a chiahsuh a, tui a vatoh veu a, huchi'n koipouh tui kitoh nunga luut masapen chu bangchi bang natna nei hizongleh suhdam in a um veu hi. 5Huleh hutah ah kum sawmthum leh giat damlou mi khat a um a. 6Jesu’n amah lum a muh in, huleh hutobangin hun sawtpi um ahita chih a heetin a kawmah, Suhdam na ut ei? a chi a. 7Damloupa’n, Pu, tui kitoh chianga diil a hung koih diing mi ka nei sih; ka chiah chiangin mi dangin ahung makhelh veu hi, a chi a. 8Jesu’n a kawmah, Thou inla, na puanphah la inla, keengin chiahta in, a chi a. 9Huin thakhat in amah chu ahung damta a, a puanphah a la a, keengin a chiahta hi; huleh hu ni chu khawlni ahi hi. 10Hujiahin Judate’n a dampa kawmah, Khawlni ahi a, na puanphah na puaah dan hilou ahi, a chi va. 11Ama’n a kawmvah, Ahung sudampa ngei in ka kawmah, Na puanphah la inla, keengin chiahta in, ahung chi hi, chi'n a dawng hi. 12Huin amahun a kawmah, Na puanphah la inla, keengin chiahta in, hung chipa koi ahiai? a chi va, a dong va. 13Hizongleh a dampa’n koi ahiai chih a he sih a; ajiahchu hu munah mipi tamtah a um a, Jesu laha chiahmangta a. 14A nunglam in Jesu’n amah Pathian biahinnah a mu a, a kawmah, Ngai in, suhdam in na umta hi, sual kiit nawn sin, huchilou inchu sil hoihlou sem na tungah ahung tung kha diing, a chi a. 15Huin hu mipa chu a chiahta a, a sudampa chu Jesu ahi chih Judate a va hilhta hi. 16Hujiahin Judate’n Jesu chu a gawtbawl va, thah a sawmta uhi; hi silte khawlni a, a bawl jiahin. 17Hizongleh Jesu’n amahuh a dawng a, Ka Pain tutanin nna a tong zinga, huleh ke’n zong ka tong zing, a chi a. 18Huchi'n Judate’n amah chu thah a tum sem va, ama’n khawlni a bohsiat chauh hilou a, Pathian ka Pa ahi a chi a, Pathian toh kibanga a kibawl jiahin. 19Huin Jesu’n a dawng a, a kawmvah, Chihtahzetin chihtahzetin ka hung hilh ahi, Tapa in amah thuin bangmah a bawl thei sih, Pain a bawl a muhte loungal; ajiahchu ama’n a bawl photmah, hute chu Tapa in zong a bawl veu hi. 20Ajiahchu Pain tapa a lungsiat a, a silbawl zousiah a kawmah a musah veu hi, huleh thumah na sah diing uh hite sanga na loupizaw a musah diing hi. 21Pain misite a kaihthoh a, a suhhing mah bangin Tapa in zong a ut pouhmah a suhing veu hi. 22Ajiahchu Pain koimah vai a hawmsah sih, hizongleh vaihawmna zousiah Tapa kawmah a pekheta hi, 23Pa a zahbawl bang va mi zousiah in Tapa zong a zahbawl na diingun. Koipouh Tapa zahbawl lou in Pa amah sawlpa zong a zahbawl lou ahi. 24Chihtahzetin chihtahzetin ka hung hilh ahi, Koipouh ka thu ja a, ahung sawlpa gingta in kumtuang hinna a neita; siamlouhtangin a um sih diing a, hizongleh sihna apat hinna ah a luut zawta ahi. 25Chihtahzetin chihtahzetin ka hung hilh ahi, Misite’n Pathian Tapa aw a jah na diing uh hun hung tung diing ahita, tuin zong a tung zing hi; huleh a ja photmah a hing diing uh. 26Ajiahchu Pain amah a hinna a kineih bangin Tapa in zong amah a hinna kineih diingin a peta hi. 27Huleh mihing Tapa ahihjiahin a kawmah vaihawmna thu zong a peta hi.

Thohkiitna nihte

28Hikhu thumah sa sih un; ajiahchu ahun tung diing ahita, hu hun chiangin haana um zousiah in a aw a ja diing va, 29Huleh ahung pawtdoh diing uh; sil hoih bawlte chu kumtuang hinna tangin a thoudoh diing va, huleh sil gilou bawlte chu siamlouh tangin a thou kiit diing uh. 30Ke’n ka thuin bangmah ka bawl thei sih; ka jah bangin vai ka hawm veu hi; huleh ka vaihawm chu a dih hi, ajiahchu keimah deihzawng hawl lou in, Pa ahung sawlpa deihzawng ka bawl zaw hi. 31Keimah tanchin kiheetpih hitaleng ka thu heetpih a dih sih diing. 32Ka tanchin heetpih khat a um; huleh ama’n ka tanchin a heetpih chu a dih ahi chih ka he hi.

Jesu tanchin heetpihtu lite

33Nangun John kawmah mi na sawl uh, ama’n thutah tanchin a heetpih hi. 34Hizongleh mihing thu heetsah ka pom sih; ahihvangin hutdama na um theihna diingun hi silte ka soi ahi. 35John chu mei vaah kuang tah leh taangtah ahi a, huleh nangun a vaah ah tomkhat nopsahtaahdih na ut uh. 36Hizongleh John a sang a heetpihna lian zaw ka nei hi; ka Pa’n ka toh zoh diing a ahung piah ka natohte mahin Pain ahung sawl chih ka tanchin ahung heetpih hi. 37Huleh Pa ahung sawlpa ngei inzong ka tanchin ahung heetpih hi. Nangun bangchihmahin a aw na ja ngei sih va, a meel zong na mu ngei sih uh. 38Huleh a thu na lung sung vah na vom sih uh; amah ahung sawlpa na gintaat louh jiahun. 39Pathian lehkhathu na sim ngun ngeeluh; ajiahchu hute sungah kumtuang hinna nei in na kingaihmah uh; hute chu ka tanchin heetsahna ahi. 40Hizongleh hinna na neihna diingun ka kawmah na hung nuam sih uh. 41Mihing paahtawina ka pom sih hi. 42Hizongleh Pathian lungsiatna nanguh ah a um sih chih ka hung he hi. 43Ka Pa minin ka hung a, nangun na hung kipaahpih sih uh; a dang khat amah minin hung lehlah na kipaahpih diing uh. 44Nanguh, khat leh khat kipaahtawituahna ngaina a, Pathian chauh a kipan a hung pawt paahtawina hawl loute’n bangchi’n na gingta thei diviai? 45Pa kawma nanguh hung heeh diingin hung ngaihtuah sih un; nanguh hung heehtu khat a um, amah chu na tahsan uh Mosi ahi. 46Bang jiahin ahiai i chih leh Mosi ana gingta hitaleh u’chin kei zong na hung gingta diing uh; ajiahchu ama’n ka tanchin ahi ana gelh. 47Hizongleh amah thu gelhte na gintaat louh uleh bangchi'n kei thute na gingta diviai? a chi hi.

Currently Selected:

JOHN 5: SIMTBSI

Highlight

Copy