JOHN 19

1Hujiahin Pilat in Jesu chu a pui a, a jepta a. 2Huleh sepaihte’n linglukhuh a phan va, a khuhsah va, huleh puansandup a silhsah uh. 3Huleh, Chibai, Judate Kumpipa! a chi va, a khut un a beeng uhi. 4Pilat chu a pawt kiit a, a kawmvah, Amah ah dih louhna ka mu sih chih na heet na diingun na kawmvah ka hung puidoh hi, a chi a. 5Huin Jesu chu linglukhuh khuh leh puansandup silhin ahung pawtdoh a, Pilat in a kawmvah, En un, mihing chu a chi a. 6Hujiahin siampulalte leh houtute’n amah a muh tahun, Kros ah kilhbeh in, kros ah kilhbeh in, a chi va. Pilat in a kawmvah, Nangun pui unla, kros ah kilhbeh un; ajiahchu ke’n amah ah dih louhna ka mu sih hi, a chi a. 7Judate’n amah a dawng va, daan khat ka nei uh, Pathian Tapa a, a kibawl jiahin ka daan dungjui un sitaah ahi, a chi va. 8Pilat in hu thu a jahin a lau semta hi. 9Huleh vaihawmna inn ah a luut kiit a, Jesu kawmah, Khoi a hung kuan na hiai? a chi a. Hizongleh Jesu’n a dawng sih hi. 10Huin Pilat in a kawmah, Ka kawmah thu na soi sih maw? Kros a kilhbeh theihna leh hahkhiah theihna nei ka hi chih he lou na hiai mah? a chi a. 11Jesu’n a dawng a, Tunglam a kipana piah hi sih lechin ka tungah bangmah bawltheihna nei sih diing hi; hujiahin na kawma hung pekhepa’n sualna a lian neih zaw hi, a chi a. 12Hu nungsiah Pilat in hahdoh a tum a; hizongleh Judate’n, Hipa na chiahsah a ahihleh Kaisar lawm na hi sih diing; koipouh amah leh amah kumpipa a kibawl chu Kaisar dou ahi, chi'n a kikou va. 13Hujiahin Pilat in hu thu a jahin Jesu ahung puidoh a, huleh vaihawmna touphah, Suanglep Hebrai haama Gabbatha kichi tungah a tou a. 14Huleh hu ni chu chiahkaan kiginni ahi a, daah guupna vel ahi; huleh ama’n Judate kawmah, En un, na Kumpipa uh! a chi a. 15Hizongleh amahuh chu a kikou va, Puimang in, puimang in, kros ah kilhbeh in, a chi uhi. Pilat in a kawmvah Na kumpipa uh ka kilhbeh diing maw? a chi a. Siampu lalpente’n Kaisar loungal Kumpipa dang ka nei sih uh, chi'n a dawng uhi.

Jesu kros a kilhbehna

16Hujiahin ama’n amah chu kros a kilhbeh diingin a kawmvah a pekheta a. Amahun Jesu chu a tu va, a puita uhi. 17Huleh amah chu a kros kipuaahin, Luguh kichi, Hebrai haama Golgotha kichi munah a chiah a; 18Hutah ah amah chu midang nih toh kros ah a kilhbehta va, a gei geelah khat tuaah, Jesu a lai ah. 19Huleh Pilat in lehkha khat a gial a, kros tungah a taah a, A gelh chu, Nazareth Jesu, Judate Kumpipa, chih ahi. 20Hi lehkha chu Judate tampiin a sim va; Jesu a kilhbehna uh khopi kawm naih ahihjiahin. Huleh hichu Hebrai haam leh, Grik haam leh, Latin haama kigial ahi. 21Huin Judate siampulalte’n Pilat kawmah, Judate Kumpipa, chi'n gial sinla, Judate Kumpipa ka hi a chi, chi'n gial zaw in, a chi va. 22Pilat in a dawng a, Ka gelh ka gial zouta, a chi a. 23Huin Jesu kros a a kilhbeh zohun sepaihte’n a puansilhte a la va, khat chiat a a tan diingun phel li a suah va, huleh a puannaah zong a la uh; a puannaah chu a khuina bei ahi a, a ngawng apat a pum a gatveh ahi. 24Hujiahin amahun, I botkeeh sih diing a, kuan tang diing aai i saan diing uh, chi'n a kihou va, Pathian lehkhathuin, Ka puansilhte a kihawm va, ka puannaah diingin aai a saan uh, chih a taangtun na diingin. Hujiahin hi silte sepaihte’n a bawl uhi. 25Huleh Jesu kros kawmah a nu leh, a nu sanggamnu, Kleopa ji Mari leh, Mari Magdalene a ding a. 26Hujiahin Jesu’n a nu leh, nungjui a lungsiatpa a kawma diing a muh in a nu kawmah, Numei, en in na tapa! a chi a. 27Huin nungjuipa kawmah, En in na nu! a chi a. Hua kipanin hu nungjuipa’n amahnu chu a inn ah a puita hi. 28Hi nungin Jesu’n sil bangkim tuin bawl zohveh ahita chih he in Pathian lehkhathu a taangtun na diingin, Ka dang a taah, a chi a. 29Hutah ah beel uain thuuh a dim khat a kitung a, spanji khat uain thuuhin a sudim va, huleh hussop chiangah a taah va, a kam ah a koihtou uhi. 30Huin Jesu’n uain thuuh a dawn zohin, Joh ahita, a chi a; huin a lu a kuun a, hagau a hahta hi.

Jesu sih nunga sil umte leh a kivuina

31Huleh, Judate’n, kiginni ahihjiahin a luang te uh khawlnia kros dawna a um louh na diingin(jiahchu hu khawlni chu ni loupi ahi a). Pilat kawmah a keengte uh suhtahsah a, a luang uh laahmang diingin a ngen va. 32Huin sepaihte a hung va, a kikilhbehpih tuah masatpen leh a khatpa a keeng a suhtansah va. 33Hizongleh Jesu kawm ahung phaah un ana si zouta chih ahung mu va, a keengte a sutan sih uhi. 34Hizongleh sepaihte laha khat in teipiin a naah a sun a, hutah ah sisan leh tui ahung pawtdohpah hi. 35Huleh hikhu mupa’n a heetpihta, a sil heetpih chu a dih ahi; huleh mi gintaat theihna diingun a soi dih hi chih a he hi. 36Ajiahchu Pathian lehkhathu, A guh khat zong suhtan ahi sih diing, chih a taangtun theihna diingin hi silte ahung umta ahi. 37Huleh Pathian lehkhathu dangin, Amahun a sutpa uh a en diing uh, a chi hi. 38Hi nungin Joseph, Arimathiami, Judate lau jiaha a guuh a Jesu nungjuiin Jesu luang a laah theihna diingin Pilat kawmah a va ngen a; Pilat in ana phal a. Hujiahin amah chu a hung a, Jesu luang a lata hi. 39Huleh Nikodem, a tuung a jana Jesu kawma hungpa zong a hung a, murrah leh aloe buuh sawmngaa vel ahung tawi a. 40Jesu luang a la va, Judate kivui ngeina bangin silgimtui toh puanmalngaat in a tuam uhi. 41Huleh kros a a kilhbehna mun vah hu an khat a um a; hu huanah haan thah khat, koimah kivuina ngei louh a um a. 42Hujiahin, Judate kiginni ahihjiahin hutah ah Jesu a sialta uh; haan chu naitah ahih jiahin.

Currently Selected:

JOHN 19: SIMTBSI

Highlight

Copy