JOHN 18

Jesu matsah a a umna

1Jesu'n hi thute a soi zohin a nungjuite toh a pawt va, Kidron luiguam a kaan va; huleh hutah ah hu an khat a um a, huah a nungjuite toh a luut hi. 2Huleh a mansahpa Juda in zong a mun a he a; Jesu a nungjuite toh hulama a vaah veu jiahin. 3Huin Juda in siampulalte leh Pharisaite apat sepaih pawl leh miman houtute pui in, thaumeite leh meiselte leh gaal vante tawi in hutah ah ahung ta uhi. 4Hujiahin Jesu’n a tunga siltung diing zousiah he in a pawtdoh a, a kawmvah, Koi ahiai na hawl uh? a chi a. 5Amahun a dawng va, Nazareth Jesu, a chi va Jesu’n a kawmvah, Kei ka hi, a chi a. Huleh a mansahpa Juda zong a kawmvah a ding hi. 6Huin, Kei ka hi, a chih tahin a nungtawl va, leiah a puuh uhi. 7Huin ama’n, Koi ahiai na hawl uh? chi'n a dong kiit a. Amahun, Nazareth Jesu, a chi va. 8Jesu’n a dawng a, Kei ka hi chi'n ka hung hilhta; hujiahin kei hung hawl na hih uleh hite chiahsah un, a chi a. 9Nang na hung piahte khatmah zong ka mangsah sih, chia ama’n a soi a taangtun theihna diingin. 10Huin Simon Peter in namsaau khat a neih a doh a, siampulal suaahpa a saat a, a bil jiatlam a saatkhiahsah hi. Hu suaahpa min chu Malka ahi. 11Huin Jesu’n Peter kawmah, Na namsaau a paai ah siat in; ka Pa’n nou ahung piah chu ka dawn sih diai mah? a chi a. 12Huin sepaih pawlte leh, houtu lamkai leh, Judate houtute’n Jesu chu a man va, a kaan uh a. 13Amasapenin Ana kawmah a pui uh; ajiahchu amah hu kum a siampulal a pang Kaiapha sungpa ahi. 14Huleh Kaiapha chu, Mipite luang a mi khat sih a hoih hi, chia Judate kawma hilhpa ahi.

Peter kihetmohbawlna

15Huleh Simon Peter in Jesu a jui a, huchi bangmahin nungjui dang khu inzong a jui hi; hu nungjuipa chu siampulal meelheet ahi a, siampulal inn huang sungah Jesu toh a luut khawm a. 16Hizongleh Peter chu polamah kotkhaah bulaha ding a. Nungjui khatpen, siampulal meelheetpa chu a va pawt a, kotkhaah ngaahnu kawmah a soi a, Peter ahung puiluut hi. 17Kotkhaah ngaah nungaahnuin Peter kawmah, Nang zong hipa nungjuite laha khat hilou na hi maw? a chi a. Ama’n, Ka hi sih, a chi a. 18Huleh suaahte leh houtute hutahah a ding va, a vot jiahin hutah ah suang meihol a chih va, a awi uh. Huleh Peter zong amahuh toh ding khawmin mei a awi hi. 19Huin siampulalin Jesu kawmah a nungjuite tungtaang leh a thuhilhna tungtaang a dong a. 20Jesu’n a dawng a, Alangtangin khovel ah thu ka soi a, Judate umkhawm zingna kikhopna innte leh Pathian biahinn ah thu ka hilh zing, a guuh in bangmah ka soi sih. 21Bang diinga kei hung dong na hi viai? A kawmva bang ka soi ka thu jate kawmah dong un; ngai un, amahun ka soi a he uhi, a chi a. 22Hutobanga a soi zohin a kawma ding houtu khat in a khut in Jesu a beeng a, Siampulal bang huchi'n na dawng maw? a chi a. 23Jesu’n a dawng a, Thu gilou ka soi leh ka giitlouhna hung hesah in; hizongleh a hoih ka soi leh bang diinga hung beeng na hiai? a chi a. 24Huchi'n Ana in amah chu kaansain siampulal Kaiapha kawmah a sawlta hi. 25Simon Peter chu ding in mei a awi a. Hujiahin amahun a kawmah, Nang zong nungjuite, laha khat hilou na hi maw? a chi va. Ama’n a kiheetmohbawl a, Ka hi sih, a chi a. 26Huin, Peter in a bil a saatkhiahsahpa sanggam, siampulal suaahte khat in, Hu an a amah toh na umkhawm uh ka hung mu sih eimah? a chi a. 27Peter in a kihetmohbawl kiit a, huleh aah a khuangpahta hi.

Rome gamoptu Pilat ma-a a dinna

28Huin amahun Jesu chu Kaiapha inn a kipanin vaihawmna inn ah a puita va; jingkal matah ahi a; huleh amahuh chu vaihawmna inn sungah a luut sih uh; huchilouin chu a ki subuahkha diing va, chiahkaan gual vaahna a nethei sih kha diing uhi. 29Pilat chu a kawmvah ahung pawta, Hipa heehna bang ahi’ai na neih uhi? a chi a. 30Amahun a dawng va, a kawmah, Amah migilou hi sih leh na kawma hung pekhe hetlou diing ka hi uh, a chi va. 31Huin Pilat in a kawmvah, Pui unla, na dan dungjuiun vaihawmsah un, a chi a. Judate’n a kawmah, Keiuh diingin mi suhlup dan ahi sih hi, a chi va. 32Hichu bangchibanga a sih diing thu Jesu’n a soi a taangtun theihna diingin ahi. 33Huin Pilat vaihawmna inn sungah a luut kiit a, Jesu a kou a, a kawmah, Judate Kumpipa na hi maw? a chi a. 34Jesu’n a dawng a, Hukhu nangmah lungsima suaah na soi ahiai? ahihlouhleh midangin ka tungtaang thu a hi ahung hilh ahiai? a chi a. 35Pilat in a dawng a, Kei Judami ka hiai mah? Na chipihte leh siampulalte’n nang ka kawmah ahung pekhia ahi; bang ahiai na bawltaah? a chi a. 36Jesu’n a dawng a, Ka gam hi khovel a ahi sih; ka gam hi khovel a hitaleh Judate khuta piahkhiah ka hih louh na diingin ka suaahte’n a dou diing uh; hizongleh ka gam chu hi a ahi nai sih hi, a chi a. 37Hujiahin Pilat in a kawmah, Ahihleh Kumpipa na hi maw? a chi a. Jesu’n a dawng a, Kumpipa na chih chu ka hi. Huleh hikhu diing a piang ka hi a, huleh thutah heetpih diing a khovel a hung ka hi. Koipouh thutah a photmahin ka aw a ja uh, a chi a. 38Pilat in a kawmah, Thutah bang ahiai? a chi a. Huleh hikhu a soi zohin Judate kawmah a pawt kiit a, a kawmvah, Amah ah dih louhna ka mu het sih hi. 39Hizongleh chiahkaan ni a mi khat ka hung hahsah diing ahi chih tawndan khat na nei uh; Hujiahin Judate Kumpipa hung hahdohsah leng na ut viai? a chi a. 40Huin a bawnun a kikou va, Hipa hilou in, Barabba zawh, chi'n. Barabba ahihleh suammang ahi.

Currently Selected:

JOHN 18: SIMTBSI

Highlight

Copy