SILBAWLTE 2

Hagau Siangthou piahna

1Huleh, Pentikost ni ahung tunin, a bawnun lungsim mun khat pua in mun khat ah a umkhawm va. 2Huleh, thakhat in vaan a kipanin ging, huihpi nasatah nung bangin ahung um phut a, huleh, huhin chu a touna inn uh a sudim veh a. 3Huleh, leite amah leh amah kihawm in mei bangin a kawmvah ahung kilang a, huleh, a tung chiat vah ahung umta hi. 4Huleh, a bawnun Hagau Siangthou in a dimta va, Hagau in a haamsah bangjelin haam dang in ahung haamta uhi. 5Huleh, vaan nuaia jat zousiah laha kipan Pathian ngaihsah Juda haw Jerusalem khua ah a um va. 6Huleh, hu ging a jah tahun mipi ahung kikhawm va, huleh a haam uh mi zousiah in amahuh haam chiata a jah jiahun a lungsim un ahung buaita va. 7Huleh, a bawnun a mangbang va, thum ah a sa mahmah uh, Endih vua, hi-a haam haw zousiah Galili gam a mi ngen hilou ahi uh maw? 8Bangchidan ahiai i bawnva i pianpih haama i jah chiat uh? 9Khenkhat Parthiate, Medaite, Ela mite huleh khenkhat Mesopotamia gam a um, Kappadosia gam a um, Judia gam a um, Ponta gam a um, Asia gam a um, 10Phrigia gam a um, Pamphilia gam a um, Aigupta gam a um, huleh Cyrene khawkawm vela Libya gam a um i hi va; huleh, khenkhat Rome kho-mikhual, Judahaw leh a biahdan uh juite i hi va, 11Khenkhat Krit gam leh Arab gammi bang i hi ngal va, hizongleh Pathian silbawlloupite a soi uh eimah haam chiat in i ja uh, a chi va. 12Huleh, a bawnun thum ah a sa va, a ngaihna a he sih va, bangchidan ahitai? a chi va. 13Khenkhat in, a nuihsan va, Uain thah kham hi uh e, a chi uhi.

Pentikost ni a Peter thusoi

14Hizongleh, Peter chu sawm leh khatte toh a dingkhawm a, aw ngaihtahin a kawmvah a soi a, Nanguh Judia gam a um mite leh Jerusalem khua a um zousiah haw, Hi thu he unla, ka thu zong ngai un; 15Hihaw na gintaat bangun a kham sih uhi, vaihaamsaang ahi pan hi. 16Hizongleh, hite zawlnei Joel in ana soi chu ahi; 17Pathian in, Ni nunungte ah hichi ahung hi diing, Mi zousiah tungah ka Hagau ka leih diing a; huchi'n, na tapate un kilaahnate a mu diing va, na teehsete un mang a man diing uh; 18Huleh, ka suaahpate leh ka suaahnute tungah zong ka Hagau ka leih diing a ka thu a soi diing uh; 19Huleh, tunglam vaan ah silmahte, nuailam lei ah chiamtehnate ka musah diing a; sisan leh, mei leh meikhuhu toh; 20Lalpa ni loupi leh minthangtah ahung tun ma in, ni mial a suah diing a, ha sisan a suaah diing; 21Huleh, hichi ahung hi diing a, kuapouh Lalpa min lou taphot chu hutdam in a um diing uh, a chi hi, a chih. 22Nanguh Israel mite, hi thute ngai un, Nazareth Jesu chu Pathian in Amah zang a na lahva, silmahte, silloupite leh chiamtehnate a bawlte apatin Pathian mi deih ahi chih a hesah a, huchu nangun zong na he uhi. 23Amah chu Pathian lemguat mawng leh heetlawh bangin piahkhiaha um in na pui va, misualte khut in kros ah na kilhbeh va, na sulumta uh; 24Amah chu Pathian in sihna gaahnate phelsah in, a kaithouta hi; sihna tuuhden gual ahih louh jiahin. 25Ajiahchu, David in a tungthu a soi a, Ka ma ah bangchihlaipouhin Lalpa ka mu zing a, suhliing a ka um louhna diingin ka jiatlam ah a um hi; 26Hujiahin ka lungtang a nuam a, ka lei zong a kipaah a; ka tahsa zong kinemtahin a um nalai diing hi; 27Ka hagau misi khua ah na nuse sih diing a, Na misiangthou zong muatna na musah phal sih diing. 28Nangmah in hinna lampi na hung hesah a; na meel in kipaahin na hung sudim zing diing, chi'n. 29Mite leh unaute, chihaahtu David thu hi lau louin na kawmvah ka soi thei hi, amah zaw a si a, vui zong a vuita va, a haan zong tuin i kawmvah a um nalai hi. 30Hujiahin amah chu zawlnei ahi a, sa dana, a khaalbe a kipanin a laltouphah a tou diing, Khrist, ka hung tungdoh diing chih, Pathian in kichiam in a soi hi chih a he a; 31Ama’n hichu ana heetlawhsa ahih jiahin, Khrist thoh kiit diing thu a soi ahi, amah misi khua ah nuutsiat in a um sih a, a luang zong a muat sih hi, chih. 32Hi Jesu chu Pathian in a kaithou kiitta ngeia, huchu ka bawnun heetpihtute ka hi uhi. 33Hujiahin Pathian khut jiatlam a paahtawi in a um a, huleh, Hagau Siangthou chiam chu Pa kawm apatin a mu a, na muh uleh na jah uh chu ahung leih ahi. 34David chu vaan ah a kaltou sih hi; amah ngei in, Lalpa’n ka Lalpa kawmah, Ka jiatlam ah tou zing in, 35Na gaalte na keengpeeh ngahsan a ka bawl masiah, a chi hi, a chi zaw hi. 36Hujiahin, Jesu na kilhbeh ngei uh chu Pathian in Lalpa leh Khrist hikhawm in a bawlta chih, Israel nam zousiah in chiantahin he uheh, a chi hi.

Israelte’n a bawl diing ngei uh

37Huleh, Hi thu a jah tahun a lungtang va sut bang ahung hita va, Peter leh sawlleh danghaw kawmah, Mite leh unaute, bangchibangin ka bawlta diing viai? a chi va. 38Huin, Peter in a kawmvah, Kisiih in lunghei unla, na sual uh ngaihdam a hihna diingin Jesu Khrist min in baptisma tang chiat un, huchi'n Hagau Siangthou silpiah na tang diing uhi. 39A chiam chu nanguh diing zong, na tate uh diing zong, gamlataha um zousiahte a diingin zong Lalpa i Pathian in a kawma a kouh photmahte a diing zong ahi, a chi a. 40Huleh, thudang tamtah in a hilhchian a, Tulai khang thah giloute lahah kihumbit un, chi’n a hasot hi. 41Huin, a thu pom pouhmah in baptisma a tang va; hu ni in mi saang thum vela behlap in a um uhi.

Khristian masate

42Huleh, sawllehte thuhilh leh kipawlna ah, tanghou balkeeh in haamtei in phatuamngaitahin a um zingzing uhi. 43Huleh, mi zousiah in a lauta va; sawllehte’n silmahte leh chiamchihnate tamtah, a bawl uh. 44Huleh, a gingta zousiah a kipumkhat va, sil bangkim a kikop uhi; 45Huleh, a silneih zousiah uh a zuah va, a kisapna bangun a bawnva lahah a hawm jel uhi. 46Huleh, ni chinin lungsim munkhat in Pathian biahinn ah phatuamngaitahin a um jel va, a inn lam haw vah zong tanghou balkeeh in kipaahtah leh lungkimtahin a an uh a ne jel uh, 47Pathian a paahtawi va, mi zousiah deihsah zawng in a um veu uh. Huleh hutdamna hung mu photmahte Lalpa’n ni chinin a kawmvah a behlapsah jel hi.

Currently Selected:

SILBAWLTE 2: SIMTBSI

Highlight

Copy