SILBAWLTE 1

Thupatna

1Aw Theophil, tuma a lehkhathot masazaw ah, Jesu silbawl leh a thuhilh pat thu zousiah ka gial ahi, 2Hagau Siangthou panpih a, A sawlleh teelte kawma thupiahte A piah zoh a, vaan a puitouh a A um ni tan a thu; 3Hu sawllehte kawmah gentheihna A thuaah nungin heetchi ana zuaulou tamtah in hing in A kiensah a, ni sawmli zet a kawmvah A kilaah a, Pathian lalgam thu A soi zing hi. 4Amah uh toh kipawl jel in, “Jerusalem khua nuse sih unla, hizongleh Pa silchiam Ka soi na jah uh chu na ngaah un,” chi’n thu A pia hi. 5Ajiahchu John in tui in a baptis ngeia; hizongleh nangun chu ni sawtlou sungin Hagau Siangthou in baptisma na tang diing uh, a chi a.

Jesu vaan a kaltouhna

6Huleh, amahun ahung kikhop un, a kawm ah, Lalpa tuin ahiai Israelte kawma lalgam na piah kiit diing? chi’n a dong va. 7Huleh, Ama’n’ a kawmvah, Pa in a hun leh a ni Amah thuthu a um diing a, a guat, nangun na heet diing uh ahi sih hi. 8Hizongleh, na tungva Hagau Siangthou ahung tun chiangin silbawltheihna na nei diing uh; huchi'n Jerusalem khua ah zong, Judia gam leh Samaria gam zousiah ah zong, huleh, kawlmong tanphain zong ka thu heetpihtute na hi diing uh, a chi a. 9Huleh, hi thute a soi zohin, a muh tangpi vah vaan a puitouh in a um a; meiin a muh phah louh vah a puimang touta hi. 10Huleh a paitouh laia, amahun vaan lam a et zing laiun, ngai in, mi nih puanvaam silh in a kawmvah ahung ding va; 11Hute’n chu, Nanguh Galili gam a mite, bang diinga vaan lam en zing a diing na hi viai? Hi Jesu, na kawm vapata vaan a puitouh a um hi, vaan a, a chiah na muh mahbangun, Amah ngei a hung kiit diing hi, a chi uhi.

Sawlleh sawmlehnihna guatna

12Huin, Olive taang a chih vapatin Jerusalem khua ah a kiih kiitta va; huchu Jerusalem kho kawm ahi a, khawlni a chiah theihna tan ahi. 13Huleh, a luut un, Peter leh John, Jakob leh Andru, Philip leh Thoma, Bartholomai leh Matthai, Alphai tapa Jakob leh Simon Zelot leh Jakob sanggampa Juda umna pindan tungnung ah a chiahtou uh. 14Hihaw zousiah chu numeite leh, Jesu nu Mari toh, Jesu unaute toh lungsim munkhat in phatuam ngaitaha haamtei in a um zing uhi. 15Huleh, hu hun laiin Peter chu nungjuite lai ah a ding a, (a bawnun za leh sawmnih vel ahi uh). 16Mite leh unaute, Hagau Siangthou in David kam a, Jesu mantute lamkaipa Juda thu ana soilawh, hu Pathian lehkhathu khuh ahung tung diing mawng ahi. 17Ajiahchu, amah hi i lahva simtel ahi a, hi natohna ah tan a nei ahi. 18Huleh, hipa’n a sualna man in mun khat a lei a; huleh, a bohkhupin a kia a, a lai ah a pawhkeeh a, a gil zousiah a pawt vehta hi. 19Huleh, hu thu chu Jerusalem khua a um haw zousiah in ana he va; huchi'n, hu mun chu amahuh haam in, Akeldama, a chi va, Huchu sisan mun chihna ahi. 20Psalm bu ah hi thu gelh ahi, A umna suhgam in um henla, a sungah kuamah um sih heh; huleh a houtu hihna midang in tang heh, chih hi. 21Huchi’n Lalpa Jesu i lahva luut jel pawt jela awm sung siaha, 22John baptisma a kipana, i lahva apata vaan a puitouh a a um ni tanpha a hung na kithuahpihte laha mi khat, a thohkiitna hung theihpihtu diingin a um ngei diing ahi, a chi a. 23Huin mi nih a guat va, khat chu Joseph Barsaba, (a min dang Justa a chih uh) huleh khat chu Matthia ahi. 24Huleh, a haamtei va, Nang, Lalpa, mihing zousiah lungtang hetu, hi nihte laha kua zaw ahiai na teel, hung hesah in, 25Juda in amah umna mun ngeia chiah diingin hi natohna leh sawlleh hihna a puuhsan, mun luah diingin, a chih va. 26Huleh, aai a saansah va, a aai saan uh chu Matthia tung ah a tu a; huchi’n amah chu sawlleh sawm leh khatte toh simtel ahita hi.

Currently Selected:

SILBAWLTE 1: SIMTBSI

Highlight

Copy