ZEKARIA 7
7
Kaniw tuang Munthianghmei tei Laalou Mak ge
1Darias rui guanghtumei tuang padeihmei kwm bw chakiumei tuang zaeng padeihmei neic (Kislev bw) Ringhpouc rui akhou lat tiguang the. 2Sarezer lev Regemmelek khatni kanei tuang mei nunc ta Bethelmei nunc rui Ringhpouc suaihiam ney khang 3khatni Ravkai khou taanv sw bammei amuh nunc, muhzwng nunc khou kaganv tingsaengcna tatkey bammei kumcna panguhmei bw khou latluna munthiangc nina dai twmei thanv khang thouclou khwan e.
4Mi khou tei Ringhpouc tuang lat akhou tii guangmei kiu mi hei the. 5Kamei rui sa the, “Mi kandic khou lungc bammei nunc khatni amuh nunc khou tei kumna sa tho twmei thu mi tingkwm 70 hei panguhmei khatni chaneimei bw khou munthiangcna latlu guang kanmei tei ata chakhwang swna hamh e. 6Kaniw tuna zangvna bammei tei kaniw ta tipian khang na de.”
7Jerusalem tei lungcgay chingkhiuhna meic rui padikna khatni Jerusalem daeng nkuaymei kaidai guay khou na hamhna dihba ramv khatni neihkeylou biak chyngphay guay khou meic lungc padikna lungc bammei douc Ringhpouc rui kahu nungc tuang muhzwng nunc khou sa kanmei tei mi hei the.
Latliammei Zaeng rui Meicbangc Bamtatmei
8 Ringhpouc rui mi lat hei Zekaria khou tiguang dat re: 9“Reynungc ai rui mi latdanv hei amei nunc khou kumna tii kan the: ‘nangniw nchumhmei taanc nina e, khatni khat lev khat ta nzian thay nina e. 10Amaypui nunc, nrunac nunc, nangniw pang khou lungc bammei gin-ga nunc, thow thow pwni lungcsi lungcroucmei ta sintu riu. Khat lev khat ta sw kasic khang sw riu.’
11“Tiki amei nunc kaniw nu tancna nking nii mak khe. Kaniw lung mbangh the, 12kumna kaniw lung ntauh kumc tanc the. Kalam thu reynungc lungc guangmei atuang muhzwng nunc khou ai rui tii guangmei alatdyn guay tei kaniw nkinglou mak ge. Hei zaeng rui ai kaniw ta lunghpuamc the. 13Ai rui sa khou tei kaniw rui chulou makmei zaeng rui, kaniw huayney pwkhou ai chulou mak ge. 14Ai rui kaniw ta pwanzingh kumcna ginramdic thangc phungc ganclou the. Mi gaymei kandic hei meic gaanv khat na sini lungh makna karaeng kandic tiswlou the.”
Currently Selected:
ZEKARIA 7: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
