ZEKARIA 6
6
Takuanh Gari Padeih Ndawman
1Ai ndawman akhat ni how dat re. Mi khou tei tanzinc tuang luangcbut kanei kak khou rui takuanh gari padeih patmei ta ai how the. 2Reymei tei takuanh haenghmei rui, kaneimei tei takuanh miwmei rui,#Nda 6.4; Nda 6.5 3Kathumhmei tei takuanh mphwanmei rui khatni padeihmei tei takuanh nziuhmei rui zay e.#Nda 6.2 4“Mi takuanh gari guay kabac hei tabui cho?” twna ai rui baanchara khou tei thanv the.
5Kamei rui daw the, “Mi hei bumaengh padeih the; mi nunc hei kandih kapwm kaipouc khou rui guang rapmei tuang the.”#Nda 7.1
6Takuanh miwmei rui zaymei gari tei dihpy biak Babilon thangc tat kan e, mphwanmei tei neihkey thangc tat kan e, takuanh nziuhmei tei dihba kandih thangc tat kan e. 7Nziuhmei takuanc kanei tei pat the, kumna kanei tei kandih khou tatna kandih lwnlung zauh khang nkhwan liat lak bam the. Baanchara tei rui sa the, “Tat lana kandih lwnlung tei zauc tho.” Kaney tatna zauc the. 8Khoutei baanchara tei rui akhou kumna kauc pat the, “Dihpy biak Babilon twn tat kanmei takuanc tei rui Ringhpouc lungpuamh ti-nchu keylou the.”
Joshua khang Guangh Pyrun
9 Ringhpouc rui akhou mi lat hei tiguang the. 10Kamei rui sa the, “Meicbangc bam tatmei nunc, Heldai, Tobija khatni Jedaia tuang daandi, kachaekc kaipat tei laana katumcna Zephania nac mpouh Josia kai thangc tat tho. Mi nunc tei Babilon thangc meicbangc bam tatmei khou rui guang dat the. 11Kaniw rui tiimei kaphut, kachaekc tei rui guangh pyrun kasiamh lana Jehozadak nac mpouh Tingkuh Joshua khou runlou tho. 12Ngamparymei Ringhpouc rui kumna sa e twna kakhou salou o, ‘Kazanc Kachy twna sameipu tei kamei bammei bamv khou tei kamei daicthau puni khatni kamei rui Ringhpouc tuang Ravkai kasiamh thau puni.#Jer 23.5; 33.15; Zek 3.8 13Kamei rui Ravkai tei kasiamh thau puni khatni guangh khou swlou nimei chakhwang tei kakhou swlou puni, kumna kamei rui kamei nunc ta sin puni. Amuh tei kaguangc bamvpaeng daeng khou ding bam puni, kumna kaney tei lungchamc chwnchamcna nchu-nzaenghna taanvtaanc kariu bam puni.’ 14Mi guangh pyrun tei Heldai, Tobija, Jedaia khatni Josia ta chakhwang champouh swmei tuang ningtowmei tuang swna Ringhpouc tuang Ravkai khou nai bam puni.”
15Duh duh thangc bammei nunc ni guangna Ringhpouc tuang Ravkai tei kasiamh nkhav puni. Hei tei kasiamh thau dat pwkhou, Ngamparymei Ringhpouc rui ata nang khou thouc guangmei tuang e twmei nang thay puni. Ringhpouc nang Racguangc latdanv guay tei nang piu nthuihna piu pwkhou mi hei guangtangc puni.
Currently Selected:
ZEKARIA 6: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
