METTHIU 8

Mphaanhmeipu ta Tigayloumei

(Mrk 1.40-45; Luk 5.12-16)

1Jisu luanghbut thangc tei rui key dat khou, meic kangdai kathei lay key khwan e. 2Khoutei mphaanhmeipu gaanv khat guangna kahu khou khuksun keyna “Poubauhmei, nang rui nuh e thei, ata sw nthanlou#sw nthanlou: Mi ravpuat phunghmei nunc ta nthan makmei nunc e twna laa bam tina e. ngam e,” twna sa the.

3Jisu kabaanc haamv patna mi pu ta tei kahilouna, “Ai nang ta sw nthanlou nii the, nthan tho,” twna sa the. Mi dyng khou tei mi pu tei mphaanhmei gay dat kan the. 4Khoutei Jisu rui kakhou sa the, “Nang meic gaanv khat na khou sini mi hei salou nuh mak ge. Tiki amuh khou tei lyan tat tho, kumna nang gay dat the twmei meic guayna thay khang, Mousi tuang latdanv thei layna khaengmei taanv tei taanc tho.”#Lev 14.1-32

Rihpy Gaanv Khatpu Bangc ta Tigayloumei

(Luk 7.1-10)

5Jisu Kapharnahum khou gut pwkhou, Rommei rihpy gaanv khat kadaeng khou guangna kakhou huaychana, 6“Poubauhmei, abangc gaanv khat kapaek theicna ryanra sihna kai thangc zip bam e,” twna sa the.

7Khoutei, “Ai guangna tigaylou puni,” tuna Jisu rui sa the.

8Mi pu tei rui mundawna sa the, “Poubauhmei, nang guanglou bam khang akai kumhmei hei thu biuh mak ge. Nang tuang latkaeng na sa patlou o, kum e thei abangc tei gay dat puni de. 9Kalam thu, ai hei ngamv naimei bangc khou bammei akhat re, khatni abangc khou ni rihmei nunc nai e. Ai rui rihmei gaanv khat ta ‘Tat ro’ tw ti thei kamei tat re, khatni rihmei gaanv khat ta ‘Guang o’ tw ti thei kamei guang e. Ai rui abangc ta ‘Mi hei taanc o’ tw ti thei kamei taanc e.”

10Jisu rui hei tei chu la khou, kakhang kadath dat the, kumna kathei lay bammei nunc khou tei sa the, “Ai nangniw khou kaling siakna sa tuang e: Mi pu hei kumcna lwmmei Isaraelmei pang khou nganvna ai gaanv khat na sini ariw mak ge. 11Ai rui nangniw khou samei hei e: Tingkauh guangcdic tuang ngai khou neihpat neihkey thangc rui meic mpeyna guangna Abraham, Isak, khatni Jakob lev dungc nchamc puni.#Luk 13.29 12Mi ganv khou kiu guanghdic nac nunc ta tei kapaengc zinghmei khou phaiclou tina, mi khou tei kapna huh khaic ndyang kariak riak bam puni.”#Met 22.13; 25.30; Luk 13.28

13Khoutei Jisu rui Rommei rihpypu khou tei sa the, “Tat tho, nang rui lwmmei thei layna tigaylou puni the.” Mi dyng khou tei kabangc tei gay dat kan the.

Jisu rui Meic Mpeyna ta Tigayloumei

(Mrk 1.29-34; Luk 4.38-41)

14Jisu Pitar kai khou guang pwkhou, Pitar now pui ravmancna kalaeng khou zip bammei ta how the. 15Jisu rui mi pui baanc tei kahilou tina ravmanhmei tei gay dat kan the, kumna kamei thauna Jisu siamruai sw the.

16Mi nungc zingbangc tei, ravsic gutmei meic mpeyna ta kadaeng khou laaguang khwan e. Jisu rui ravsic nunc ta tat pat khang latdanv patna alay ganclou khwan e, khatni nnaumei guay ta tigaylou khwan e. 17Mi hei “Kamei rui aniu tuang sunu guay laa ganclou the khatni aniu tuang ravpuat guay phungc ganclou the” twna muhzwng Isaia rui saloumei tei guang tangh khang the.#Isa 53.4

Jisu Thei Laymei Thukh

(Luk 9.57-62)

18Jisu rui meic kangdai kadaeng khou bammei ta how lana, zeihlat paengc akhat thangc pat khang kaziap nunc khou sa the. 19Khoutei Riakdanv dinhpouc gaanv khat kadaeng khou guangna, “Dinhpouc, nang tatpui bamv kathuic ai nang thei lay ni,” twna sa the.

20Jisu rui kakhou sa the, “Asacsi nunc khang kakai nai e, kauh samhmei nruayna nunc khang ni kabou nai e, tiki Meic Nac Mpouh khang thu kapy mbaeng keyna zaengswloupui bamv maek ge.”

21Baihmei ziap gaanv khat rui Jisu khou, “Poubauhmei, ai akai tatna apu ta mbeihlou rey ni he,” twna sa the.

22Tiki Jisu rui, “Athei lay o, theihmei ta thu theihmei nunc rui mbeih khang ganclou ti tho.” twna sa the.

Jisu rui Puanzingh Khaamloumei

(Mrk 4.35-41; Luk 8.22-25)

23Khoutei kamei hih akhat khou gut the, kumna kaziap nunc kathei lay tat the. 24Zeihlat khou tei puanzingh tanhmei guang the, kumna hih tei dui luat rui liak bin guang the; tiki Jisu thu zipri bam khwan e. 25Ziap nunc tei kadaeng khou guangna kata nchyang thauna, “Poubauhmei, aniu ta kanlou o! Aniu theic puni the!” twna sa the.

26Kamei rui kaniw khou sa the, “Lwmmei nthyammei nunc, tabui swna nangniw heidi ping bam tu cho?” Khoutei kamei thauna puanzingh khatni dui luat ta tei luh the. Khoutei rimh rim key kan the.

27Khoutei kaniw tei ngak the. Kumna, “Puanzingh khatni duipui rui nganvna kalat piu bammeipu hei akumhpui mei lana cho?” twna kaniw rui sa the.

Ravsic Gutmei Nei ta Tigayloumei

(Mrk 5.1-20; Luk 8.26-39)

28Jisu zeihlat paengc akhat thangc, Gadaramei ramv khou guang pwkhou, ravsic gutmei gaanv nei taroulang khou rui patna kata ariw khwan e. Kaney tei heidikamv kheih si e, twmei thu, mi chaeng tei meic tat ruan bauh mak bam khwan e. 29Zauclo, kaney rui kaucna sa the, “Ravguangc Nac Mpouh, nang aney ta tabui sw nina cho? Kaganv tangh mak khou aney ta dandi tii ni the twna guang tu cho?”

30Kaniw khou rui duc hak mak thangc guak kangdai akhat kataek mpac bam khwan e. 31Ravsic nei tei rui Jisu khou huaychana, “Nang rui aney ta nthau pat re thei, guak nunc khou tei ndiulou o,” twna sa the.

32Khoutei, “Tat tho,” twna Jisu rui kaney khou tei sa the. Kumna patna guak nunc khou tei gut kan the. Guak pang tei dui khuangc khou saeng keyna zeihlat khou tei saenglouna theic ngam kan the.

33Guak gaenghmei nunc tei mi kaidai thangc tei pak tatna guak nunc khou khatni ravsic gutmeipu nei khou tei pat kanmei guay tei poulou the. 34Khoutei mi kaidai mei guay tei Jisu ta ariw khang pat the. Kaniw rui kata ariw pwkhou kaniw tuang ramv khou tei rui tat pat kan khang huaycha the.

Currently Selected:

METTHIU 8: RONGBSI

Highlight

Copy