METTHIU 7

Meickai ta Latzan Sw Riu

1“Nangniw ta ni latzan sw mak khang, nangniw meickai ta latzan sw riu. 2Kalam thu nangniw rui meickai ta swmei latzan tei rui nangniw ta ni sw dat puni, khatni nangniw rui ndatmei dath tei rui nangniw ta ni ndat dat puni.#Mrk 4.24 3Tabui swna nangniw mik khou naimei thing dangv ta tei kakhanh makna nangniw chana mik khou naimei nrouc ta tei how bam tu cho? 4Nang mik khou thing dangv nai lana, nang chana khou ‘Nang mik khou nrouc naimei tei laa ganclou pumc e’ twna nang akumhna sa ngamna cho? 5Gaylwn swmei nang, nang mik khou naimei thing dangv tei laa ganc rey o, kum e thei nang chana mik khou naimei nrouc tei laa ganh khang nang mik how nthan puni.

6“Nthanmei puat tei si nunc khang tii riu; karih patna nangniw ta nkay puni. Khatni nangniw tuang kaphut tei guak kui nunc hu khou phaiclou riu; kaniw rui hei tei ni binna nangniw ta sow puni.

Ney o, Phu o, Nchow o

(Luk 11.9-13)

7“Ney o, tii puni; phu o, mphang puni; kaikhamv nchow o, laanclou puni. 8Kalam thu, neymei kathuic laatow e, phumei kathuic phu tow e, kaikhamv nchowmei kathuic khang laanclou puni. 9Kanac rui ntyan ney tina ntauh tii nimei thow naina cho? 10Khatni khav ney tina nrui tii nimei thow naina cho? 11Kumna meicsimei nangniw sini nangniw nac nunc khang gaymei puat tii thay e thei, tingkauh thangc bammei nangniw Pu rui thu, mi khang suangc mbuna, kakhou neymei kathuic khang gaymei puat tii pu lak nah cho?

12“Hei zaeng rui, nangniw khou swlou pw tu laa niimei tei nangniw rui meic nunc khou swlou tio. Riakdanv khatni muhzwng nunc tuang latdyn kiu mi hei the.#Luk 6.31

Nrummei lev Hamei Chaengmun

(Luk 13.24)

13“Nangniw nrummei chaengmun khou gut ro. Kalam thu maanmei khou zaylou nimei chaengmun tei thu ha e, kachaeng ni daic e. Kumna mi khou tei gutmei meic geic e. 14Tiki ringhmei khou zayloumei chaengmun tei nrum e, kachaeng ni nthyam e, kumna hei tei laatowmei meic rau e.

Kabang khatni Kathai

(Luk 6.43-44)

15“Guatmei muczwng nunc khou rui ramhthay o; kaniw tei lauziu gic runna nangniw khou guang e, tiki kalungc khou thu nrammei angiw nunc e. 16Kaniw tuang thai khou rui nangniw rui kaniw ta thay puni. Sauh luai khou rui drakha thai nthai mak ge; raengtaw sauc bang khou rui Olive thai nthai mak ge. 17Hei tei kumcna, karav gaymei bang rui kathai gaymei nthai e; karav simei bang rui kathai simei nthai e. 18Karav gaymei thing bang rui kathai simei nthai mak ge; karav simei thing bang rui ni kathai gaymei nthai ngam mak ge. 19Kathai gaymei nthai makmei thing bang guay ta tei gai bauna mai khou phaiclou e.#Met 3.10; Luk 3.9 20Mi kumna, kaniw ta tei kaniw thai khou rui nangniw thay puni.#Met 12.23

Ai Nang ta Thai Mak ge Tw Nimei

(Luk 13.25-27)

21“Ata ‘Poubauhmei, Poubauhmei’ twna kawmei kathuicna tei tingkauh guangcdic khou gut rap ni tu hamh e; tiki tingkauh thangc bammei apu rui ningmei khou tatmei kamei na tei rui gut khang de. 22Mi nungc kiu meic mpeyna rui ‘Poubauhmei, Poubauhmei, aniw nang zanc khou ravmundinc kan tu hamhna cho, nang zanc khou ravsic nunc ta nthau ganc kan tu hamhna cho, khatni nang zanc khou charynmei taanv mpeyna taanc kan tu hamhna cho?’ twna sa puni. 23Mi khou kiu, ‘Ai nangniw ta thay mak ge, nangniw latliammei nunc, akhou rui tat kan o’ twna ai rui kaniw khou sa puni.#Kal 6.8

Ningtyngmei khatni Mpangmei

(Luk 6.47-49)

24“Hei zaeng rui, alat guay hei chuna piupui mei tei ntauh ruc khou kakai swmei ningtyngpui mei tei kumhmei tuang e. 25Ting bun keyna dui daic key the, pwanzingh guangna kai ta tei guang thui the; tiki kai tei bow mak ge, kalam thu hei tei ntauh ruc khou lingclouna swlou the.

26“Tiki alat guay hei chu lana piu makpui mei tei thu sypung ruc khou kakai swmei mpangpui mei tei kumhmei tuang e. 27Ting bun keyna dui daic the, pwanzingh guangna mi kai ta tei thui the. Mi kai tei pun kasic karoucna pun kan the.”

Jisu Ngamv

28Jisu rui mi guay hei sa luai key pwkhou, katuang latdyn tei meic nunc khang tei charyn sih the. 29Kalam thu kaniw tuang Riakdanv dinhpouc nunc tei kumh makna, ngamv naimei gaanv khat kumcna kamei rui nchamlou khwan e.#Mrk 1.22; Luk 4.32

Currently Selected:

METTHIU 7: RONGBSI

Highlight

Copy