METTHIU 25

Tuna Gaanv Ruh Latgiam

1“Mi khou kiu tingkauh guangcdic kiu, tunac gaanv ruh kaniw tuang thauh mairam sinna nowpouc ta riu khang patmei kumc puni.#Luk 12.35 2Kaniw pang khou gaanv panguh rui mpangmei e, gaanv panguh rui ningtyngmei e. 3Mpangmei nunc tei thauh mairam thu sin the tiki thauh phungh mak khe. 4Tiki ningtyngmei nunc tei thu kaniw tuang thauh mairam khang tei thauh haan khou thauh sin tat the. 5Nowpouc tei guang nyan tina kaniw guay tanguih the, kumna zipri tat kan the.

6“Mi khou kiu zipchwng ganv khou ‘Nowpouc guang the! Pat riw tho!’ twna kauc the. 7Khoutei tunac guay tei zipthau lana kaniw tuang mairam ntou the. 8Khoutei mpangmei nunc tei rui, ‘Nangniw tuang thauc aniw khang ni tiilou na ro, aniw tuang mairam amit puni the,’ twna ningtyngmei nunc khou tei sa the. 9Tiki, ‘Tii mak khe. Aniu meic guayna khang thu biuh mak ge. Zuanhmei bamv thangc nangniw khang liu tat tho,’ twna ningtyngmei nunc tei rui sa the. 10Kaniw liu khang tat kan khou rui nowpouc tei guang the, kumna chamdaanvmei nunc tei nowpouc thei nowsuanh ngai bamv khou tei gut kan the; kumna kaikhamv mbangh kan the.

11“Katang thangc baihmei tunac gaanv panguh tei guangna, ‘Kaipouc, kaipouc, aniw khang kaikhamv laanclou o,’ twna sa the.#Luk 13.25 12Khoutei, ‘Ai nangniw ta khat sini thay mak ge,’ twna kamei rui mundawna sa the.

13“Hei zaeng rui nangniw nkhwanna bam o, kalam thu nangniw katingmik khatni kaganv tei thay mak ge.

Bangh Gaanv Thumh Latgiam

(Luk 19.11-27)

14“Mi hei kumc puni, twmei thu, gaanv khatpu rui kamei nggin tat kan ni khou kabangc nunc ta kaw guangna katuang lanv kaniw khou nsinlou the.#Luk 19.11-27 15Kamei rui gaanv khat khou talent#Mi hei syan zanc e panguh, gaanv khat khou kanei, khatni baihmei gaanv khat khou akhat twna kamei kamei rui ngam nimei thei layna tiilou lana kakai khou rui tat kan the. 16Talent panguh laameipu tei kaluak kalat lanvguanh tat lana talent panguh tuangc guang the. 17Hei tei kumc muayna talent kanei laameipu tei ni kanei tuangc muay the. 18Tiki talent akhat laameipu tei thu tat pat lana kakaipouc tuang syan tei chau phuplou the.

19“Kaganv tingsaengc sihmei tangv, mi bangc nunc kaipou tei guang datna kaniw khou tiilou kanmei syanchakh tei chak the. 20Khoutei talent panguh laamei bangc tei talent ruh phungc guangna, ‘Kaipouc, nang rui akhou talent panguh tiilou the, ai rui guanh tuangc patmei panguh lou nkuanna laa guangmei tuang the,’ twna sa the. 21Khoutei kakaipouc tei rui kakhou sa the, ‘Taanc chuy the, gaymei khatni lwmnuhmei bangc. Katitna nsinloumei khou lwm nuhmei taanv taanclou the. Nang khou mpeyna nsinlou puni the. Nang kaipouc tuang neihlamei bamv khou gut tho.’ 22Talent kanei laameipu tei ni guangna, ‘Kaipouc, nang rui akhou talent kanei tiilou e, ai talent kanei guanh tuangc patna phungc guangmei tuang e,’ twna sa the. 23Kaipouc rui kakhou sa the, ‘Taanc chuy the, gaymei khatni lwmnuhmei bangc. Katitna nsinloumei khou lwmnuhmei taanv taanclou the. Nang khou mpeyna nsinlou puni the. Nang kaipouc tuang neihlamei bamv khou gut tho.’ 24Talent akhat laameipu tei ni guangna, ‘Kaipouc, nang hei thu nang rui lingclou makmei thai reimei, nang rui phunclou makmei lau taymei, meic ta nzian thay makmei mei e twmei ai thay e. 25Kumna ai ping thena, nang tuang syan tei kandih khou chau phuplou tuang the. Zauclo, mi hei nang tuang tei the.’ 26Khoutei kaipouc tei rui kakhou sa the, ‘Simei khatni aliauhmei bangc, ai hei ai rui lingclou makmei thai reimeipu khatni ai rui phunclou makmei lau taymeipu e twmei nang thay la bu dyng the. 27Kum e thei, nang rui mi syan tei syanthuay khang tiilou e thei, ai guang dat khou kathuay kazauhna laa dat ni tuang e.’ 28Hei zaeng rui, talent akhat tei kakhou rui laa lana talent ruh naimeipu khang tei tii tio. 29Kalam thu, naipui mei khang tei tiilou nkuan puni, kumna kakhang mbu nlaina nai puni, tiki maekpui mei khou tei rui kakhou katitna naimei tei sini laa tat kan puni.#Met 13.12; Mrk 4.25; Luk 8.18 30Mi gaeng makmei bangc ti hei nymna kapaengc zinghmei khou phaic pat the. Khoutei puihuayna huh nkay ndyang kariak riak bam puni.#Met 8.12; 22.13; Luk 13.28

Nkhamhmei Latzan

31“Meic Nac Mpouh tei kauh baanchara guay ta nduanghna kahym daicna guang pwkhou, kamei katuang hymdaihmei guangc bamvpaeng khou dungc puni.#Met 16.27; 19.28 32Kumna zaatc guayna ta kahu khou khuam guang kaduai puni. Mi khou kiu lauziu gaenghmeipu rui kalauziu ta ziuh pang khou rui gaengc langc patmei kumcna kaniw ta tei kakang kanei khang khak langc pat puni. 33Mi khou kiu lauziu ta katuang baanzat thangc, khatni ziuh ta katuang baandaw thangc lou puni. 34Mi khou kiu, guangh tei rui katuang baanzat thangc bammei nunc khou tei mi kumcna sa puni, ‘Guang tho, apu rui suaihiamloumeithiu, mbaanv damclou rap khou rui nangniw khang chamdaanvloumei guangcdic tei guang laa tho. 35Kalam thu ai ndaapc khou nangniw rui ata titulou khwan e, ai tari khou nangniw rui ata tizangvlou khwan e, ai gin swna guang khou nangniw rui ata laalou khwan e, 36ai pumtang bam khou nangniw rui pheybaan tiilou khwan e, ai nnau bam khou nangniw zauclou khwan e, khatni ai kangkai khou bam khou nangniw adaeng khou guang khwan e.’

37“Khoutei, ravchaptatmei nunc tei rui sa puni, ‘Kaipouc, tabui nungc nang ndaapc bammei ta howna aniw titulou kanna cho, khatni nang tari bammei ta howna tizangvlou kanna cho? 38Khatni tabui nungc nang gin swna guangmei ta howna laalou kanna cho khatni nang pumtang bamna pheybaan tiilou kanna cho? 39Hamh e thei, tabui nungc nang nnau bammei khatni kangkai khou bammei ta howna zauclou kanna cho?’ 40Tiki, ‘Ai rui nangniw khou kaling siakna sa tuang e: chana pang khou nthyam liangmei gaanv khat khou nangniw rui swloumei tei akhou swlou tu the,’ twna guangh tei rui daw puni.

41“Khoutei katuang baandaw thangc bammei nunc khou tei ni mi kumna sa puni, ‘Siangloumei nunc, akhou rui tat pat kan o. Ravsic lev katuang baanchara nunc khang chamdaanvloumei tingsaeng mai thangc tat kan o. 42Kalam thu ai ndaapc bam khou nangniw ata titulou mak ge, ai tari bam khou nangniw ata tizangvlou mak ge, 43ai gin swna guang khou nangniw ata laalou mak ge, ai pumtang bam khou akhang phey tiilou mak ge, nnau bam khou khatni kangkai khou bam khou ata zauclou mak ge.’ 44Khoutei kaniw rui ni mundawna sa puni, ‘Kaipouc, tabui nungc nang ndaapc bammei ta, tari bammei ta, gin swna guangmei ta, pumtang bammei ta, nnau bammei ta, khatni kangkai khou bammei ta aniw howna nang tuang siamruai swlou mak kanmei tuang naina cho?’ 45Khoutei mundawna, ‘Ai rui nangniw khou kaling siakna sa tuang e: Mi nthyam liangmei nunc pang khou gaanv khat khou nangniw rui swlou mak kanmei tei akhou swlou kan makmei tuang e,’ twna sa puni. 46Mi nunc hei tingsaeng dandi khou tat puni, tiki ravchaptatmei nunc tei ringcsuangmei khou tat puni.”#Dan 12.2

Currently Selected:

METTHIU 25: RONGBSI

Highlight

Copy