METTHIU 24

Ravkai Swmaan Nimei lam khou Dincloumei

(Mrk 13.1-2; Luk 21.5-6)

1Jisu Ravkai mpatlouna tat pat pwkhou kaziap nunc kadaeng khou guangna Ravkai tuang kai guay tei kata tiphaengc khwan e. 2Khoutei Jisu rui kaniw khou sa the, “Mi kai guay hei nangniw how bo? Ai rui nangniw khou kaling siakna sa tuang e: mi khou hei ntauh akhat ruc khou ntauh akhat nsaplou bam dat ni tu hamh the; pangv key makmei nai dat ni tu hamh the.”

Ryanramei khatni Rairiumei

(Mrk 13.3-13; Luk 21.7-19)

3Jisu Olive Chyng khou dungc bam khou, kaziap nunc kadaeng khou kaniw rana guangna sa the, “Mi guay kiu tabui ganv khou pat puni cho? Khatni nang guang puni the khatni zuk luai puni the twmei thay nuhmei tuang tabui tuang pat puni cho? Aniw khou dinclou o.”

4Khoutei mundawna Jisu rui kaniw khou sa the, “Nangniw ta meic gaanv khat na rui sini zay mbiangh mak khang suriak thay o. 5Kalam thu, ‘Ai Khrista the’ twna meic mpeyna azanc khou guang puni, kumna meic mpeyna ta zay mbiangh puni. 6Nangniw rih khwan khatni rih chamv chu puni; tiki nangniw ping riu. Mi kumhmei guay hei pat puni, tiki hei tei luai nimei hamh e. 7Kalam thu zaatc khat rui zaatc khat ta khatni guanghdic khat rui guanghdic khat ta rih sw puni, nap nkowmei guang puni khatni kabamv kathuic khou baengla zay puni. 8Tiki mi guay hei narui kahouhmei di he.

9“Mi ganv khou kiu nangniw ta nymna rai khang tii pat puni, kumna swluai puni. Azaeng khou rui nangniw ta zaatc guayna rui karaeng puni.#Met 10.22 10Mi khou kiu meic mpeyna athei lay taan puni, kaniw khat khat ta tinym kary puni, kumna khat khat ta karaeng puni. 11Mi khou kiu kaling hamhmei muhzwng mpeyna pat puni, kumna meic mpeyna ta zay mbiangh puni. 12Mi kumna simei hei mbu thau tina meic mpeyna nzianmei nchu key puni. 13Tiki katwan nganvna akhaengvpui mei ta tei kanlou puni.#Met 10.22 14Zaatc guayna thay lik khang mi guanghdic tuang gaychamv hei kandih kapwm khou dinc lik puni. Mi tangv thu zuk luaimei kiu guang puni the.

Ravchabamv Sw Mphuammei tuang Meic Ping Karaengmei

(Mrk 13.14-23; Luk 21.20-24)

15“Muhzwng Daniel rui saloumei ‘sw kamut kamaimei tuang sw mphuammei puat tei nthanmei bamv khou ding bammei ta nangniw how puni. (Pahpui mei tei rui kabah thay kan diu.)#Dan 9.27; 11.31; 12.11 16Mi khou kiu Judia khou bammei rui chyng thangc pak tat tho. 17Kainam khou bammei rui kainung khou naimei puat laa khang key dat ri tho.#Luk 17.31 18Laupuk khou bammei rui phey laa khang hanc guang dat ri tho. 19Mi ganv khou kiu kapumc nritmei pui nunc khatni nah puanc nouc bammei pui nunc tei sansi e dav! 20Tingsei khou hamh e thei Sabbathneic pak mak khang huayney o. 21Mi khou kiu mbaanv nai thau rap khou rui pat zat kan makmei, pat ni pat dat lakmei ryanramei ariw puni.#Dan 12.1; Nda 7.14 22Mi ganv dak tei tiduilou mak khwan e thei, meic gaanv khat na sini ringc pat ni tu hamh e; tiki kapahloumei nunc khang rui mi ganv dak tei tiduilou puni.

23“Mi ganv khou kiu ‘Zauclo, mi khou hei Khrista bam the,’ hamh e thei ‘mi thangc tei bam the,’ twna thowkumhmei rui sa pwsini lwm riu. 24Kalam thu guatmei Khrista nunc khatni guatmei muczwng nunc pat puni. Nuh e thei kapahloumei nunc ta nganvna zay mbiangh khang sw-nchinmei khatni charynmei taanv daih mpeyna taanc puni. 25Chu la tho, mi hei ai rui nangniw khou sa kasuakcloumei tuang e.

26“‘Kamei tazikramv khou bam the’ twna meic nunc rui sa pwsini nangniw tat riu; ‘Kamei kainung khou bam e’ twna sa pwsini lwm riu.#Luk 17.23-24 27Kalam thu, Meic Nac Mpouh guang nimei hei neihpat thangc tingpalik tina neihkey thangc gaanc tanghmei tei kumc puni de. 28Charumc naimei bamv khou tei moucphou guang kaduai puni de.#Luk 17.37

Meic Nac Mpouh Guangmei

(Mrk 13.24-27; Luk 21.25-28)

29“Mi ryanramei tingmik guay tei luai rappui lev neihmik tizingc puni, bw gaanc dat lak khe, gaanchuangcna guay tingkauh thangc rui taek key puni, khatni tingpuk tuang ngamv guay ta kanuk puni.#Isa 13.10; 34.4; Eze 32.7; Jol 2.10,31; 3.15; Nda 6.12-13 30Mi tangv Meic Nac Mpouh guang nimei tuang kiu tingpuk khou lyan pat puni. Mi khou kiu kandihmei zaatc guayna ngaengv kazwmna kap puni khatni Meic Nac Mpouh tei ngamv phungcna hymdaicna muangh khou tuangcna keymei ta kaniw how puni.#Dan 7.13; Zek 12.10-14; Nda 1.7 31Kauh baanchara akhat rui bianggun daihmei muanna kamei rui katuang baanchara nunc ta kandih kwn padeih khou ndiulou puni. Kumna kamei rui kapahloumei nunc ta kaniw rui kandih kapwm khou rui khuam kariu puni.

Tadut Bang khou rui Thay khang

(Mrk 13.28-31; Luk 21.29-33)

32“Tadut bang khou rui nangniw latgiam akhat thay o. Hei tei kazik kasatna kanuy thanh pat dat re thei laylum ana the twmei nangniw thay e. 33Hei tei kumcna mi guay hei nangniw how pwkhou kamei kaimun daeng khou na bam the#kamei kaimun daeng khou na bam the; hamh e thei kaganv ana the, kahouh puni the. twmei nangniw thay o. 34Ai rui nangniw khou kaling siakna sa tuang e: Mi guay hei pat mak saanv mi meikin hei maan ni tu hamh e. 35Tingpuk kandih thu maan puni, tiki atuang lat thu maan dat ni tu hamh the.

Gaanv Khat na Sini Kating Kaneic tei Thay Mak ge

(Mrk 13.32-37; Luk 17.26-30,34-35)

36“Tiki mi tingmik khatni khuangh ganv tei thu gaanv khat na sini thay mak ge, Pu na tei hamhna tingkauh baanchara guay ni, Nah Mpouh#Baanhhy baibal asaekc khou thu Nah Mpouh twmei hei maek ge. hei ni thay mak ge. 37Meic Nac Mpouh guang nimei hei Nouha hak khou pat kanmei tei kumc puni e.#Tha 6.5-8 38Mi ganv khou tei dui daih makmei hu khou, Nouha hy lungc khou gut kan mak saanv, meic nunc tei tuna zangvna, nowkawna, micna lungc bam khwan e. 39Dui daic guangna kaniw ta nzuan ganh mak saanv, tabui pat puni cho twmei kaniw thay mak khwan e. Meic Nac Mpouh guang khou ni hei tei kumc puni.#Tha 7.6-24 40Mi khou kiu laupuk khou gaanv nei bammei khou gaanv khat ta laa tat puni, gaanv khat ta ganclou duc puni; 41gaanv nei nap riakpaan riak bam khou gaanv khat ta laa tat kan puni, gaanv khat ta ganclou duc puni. 42Hei zaeng rui nangniw nkhwan bam o, kalam thu nangniw tuang Kaipouc tabui nungc guang puni cho nangniw thay mak ge. 43Zingbangc akumhmei ganv khou kaihouhmei guang puni cho twmei kai kaipouc tei rui thay khwan e thei, kamei zip makna nkhwanna kakai tibiu lak ni tuang e twmei nangniw thay e.#Luk 12.39-40 44Hei zaeng rui nangniw ni chamdaanv bam o. Kalam thu Meic Nac Mpouh tei nangniw ning makmei ganv khou guang puni

Lwm Nuhmei khatni Lwm Nuh Makmei

(Luk 12.41-48)

45“Kakai tuang bangc guay khang kaganv chana titu tizangv bam khang thouh nsinloumei bangc khou thow tei lwm nuhmei khatni ningtyngmei cho? 46Kakaipouc tei guang datpui ganv khou kathouc taanc bammei bangc tei sangaymei e. 47Ai rui nangniw khou kaling siakna sa tuang e: Kaipouc tei rui katuang naimei kapwm kakhou nsinlou puni. 48Tiki meicsimei bangc tei rui ‘akaipouc guang riu ni tu hamh e’ twna ningna, 49kapammei bangh guay ta baina, zouh mbamei nunc lev tuna zangvna bam khou, 50kamei ning makmei nungc, kamei thay makmei ganv khou kakaipouc tei guang nangc e thei, 51kata dan puat paruatlou puni#dan puat paruatlou puni; hamh e thei phaic pat puni. khatni gaylwn swmei nunc lev nchamcna dandi mphang puni. Mi khou tei kapna kahuc nkay ndyang kariak riak bam puni.”

Currently Selected:

METTHIU 24: RONGBSI

Highlight

Copy