METTHIU 23

Riakdanv Dinhpouc nunc khatni Pharisimei nunc khou rui Suriak Thay o

(Mrk 12.38-39; Luk 11.43,46; 20.45-46)

1Khoutei Jisu rui meic kangdai khatni kaziap nunc khou sa the, 2“Riakdanv dinhpouc nunc khatni Pharisimei nunc hei Mousi bamv khou dunghmei nunc e. 3Hei zaeng rui kaniw rui samei guay tei taanc o khatni ngaek go, tiki kaniw rui taanhmei tei thu lay taanh riu. Kalam thu kaniw hei sa e tiki taanh mak ge. 4Kaniw hei rui puat nritmei bang lana meic nunc bou khou tipuanclou e, tiki kaniw baanc zung na rui sini hei tei kapuang nkhavlou nii mak ge. 5Kaniw rui sw bammei guay hei meic nunc how khang na sw bam tuang de. Kaniw sanpiang khatni kaniw baanc pwam khou kamclou bammei phulaktari ramdai tei khatni kaniw tuang pheychuanh phaan ramsaeng tei!#Mi hei kaniw ravning nthukmei e twmei lyan khang piupui tuang e (Sin 15.37-41 tei zauc o). #Met 6.1; Sin 15.38; Ria 6.8 6Kaniw hei khumngai bamv khou chakhwang bamv khou khatni sinagog khou bamvdaih khou dungc nii e. 7Kaithyan bamv bamv khou chakhwang sw lyanloumei ta khatni meic nunc rui ‘Rabbi’ twna kawloumei ta kaniw kahaw e. 8Nangniw ta thu ‘Rabbi’ twna tikaw riu. Kalam thu nangniw tuang kaipouc akhat nai e, nangniw thu chana nunc de. 9Kandih maansei gaanv khat na ta sini ‘Pu’ twmei zancphuakh hei kaw riu, kalam thu tingkauh thangc bammei nangniw ‘Pu’ akhat na nai e. 10Nangniw ta ‘Zayloumeipu’ twna ni tikaw riu, kalam thu nangniw ta Zayloumeipu akhat na naimei kiu Khrista hei e. 11Nangniw pang khou daic liangmei kamei tei nangniw tuang siamruaimei sw nina e.#Met 20.26-27; Mrk 9.35; 10.43-44; Luk 22.26 12Karana kata tidaihpui mei ta tiliw keylou puni, khatni niamhpui mei ta tidaiclou puni.#Luk 14.11; 18.14

Kaniw tuang Gaylwn Swmei ta Nuh Makmei

(Mrk 12.40; Luk 11.39-42,44,52; 20.47)

13“Gaylwn swmei Riakdanv dinhpouc nunc khatni Pharisimei nunc, nangniw sansi e dav! Kalam thu nangniw rui meic nunc gut mak khang tingkauh guangcdic kaikhamv mbangh the. Nangniw ni gut mak khe, gut nimei nunc ta ni nangniw rui thingc the. 14(Gaylwn swmei Riakdanv dinhpouc nunc khatni Pharisimei nunc, nangniw sansi e dav! Nangniw rui maypui nunc tuang asut tu e, kumna nangniw tuang ravsuai saenghpui lwn sw e. Mi rui nangniw khuay daic the.)#Baanhhy baibal asaekc khou thu kathaek 14 tuang lat hei maek ge.

15“Gaylwnswmei Riakdanv dinhpouc nunc khatni Pharisimei nunc, nangniw sansi e dav! Kalam thu meic gaanv khat ta Jihudimei tiguanhlou khang nangniw duipui ramkiang ruan likna tat the, kumna kamei Jihudimei sw pwkhou nangniw rui kata nangniw maikwam key guay khou key liang kanei biuhmei nac tiswlou the.

16“Mik tiatmei chaengzaymeithiu, nangniw sansi e dav! ‘Ravkai ta zay saancna latryan swmei tei thu ramhkhat sini hamh e, tiki ravkai tuang kachaekc ta zay saancna sw kanmei tei thu kuak dat mak khe,’ twna nangniw rui sa e. 17Mpangmei mik tiatmeithiu, kachaekc tei nthuk ni, kachaekc ta tei nthanmei tiswloumei ravkai tei nthuk cho? 18‘Ravchabamv tei zay saancna latryan swmei tei thu ramhkhat sini hamh e, tiki mi khou tei katloumei ravcha ta tei zay saancna swlou kanmei tei thu kuak dat mak khe,’ twna ni nangniw rui sa dat re. 19Mik tiatmeithiu, puatkat tei nthuk ni puatkat ta tei nthanmei tiswloumei ravchabamv tei nthuk cho? 20Hei zaeng rui, ravchabamv ta zay saancna latryan swmei hei ravchabamv ta ni ravcha ta ni zay saancna swmei tuang di the. 21Ravkai ta zay saancna latryan swmei hei ravkai khatni mi khou tei bammeipu ta zay saancna swmei tuang di the; 22khatni tingkauh ta zay saancna latryan swmei tei Ravguangc tuang guangh bamvpaeng khatni mi khou tei dungc bammeipu ta zay saancna swmei tuang di the.#Isa 66.1; Met 5.34

23“Gaylwn swmei Riakdanv dinhpouc nunc khatni Pharisimei nunc, nangniw sansi e dav! Nangniw rui riangtu, makikhuamc, khatni backhuanh tuang kadam ruh khou akhat tii lana Riakdanv tuang nthuk dianghmei nchumhmei, zauzian thaymei khatni lwm nuhmei ta ntaamvlou the! Kadam ruh tuang tiimei tei ni ntaamv makna mi guay hei nangniw piu ni tuang e.#Lev 27.30 24Mik tiatmei chaengzaymeithiu, simangna ta sini singc gancna zangv lana guaikuan zangv binmei thiu!

25“Gaylwn swmei Riakdanv dinhpouc nunc khatni Pharisimei nunc, nangniw sansi e dav! Nangniw tuang buangc khatni nkuakc guay tei kapaengc thu nthanna kalungc khou tei thu asut guangmei khatni agaamvna laa guangmei tuang rui padik ge. 26Mik tiatmei Pharisimei! Buangh lungc tei sw nthan rey o; kum e thei, kapaengc tei ni nthan puni.

27“Riakdanv dinhpouc nunc khatni Pharisimei nunc, gaylwn swmeithiu, nangniw hei sansi e dav! Nangniw hei thut mphwanloumei tarou kumhmei e. Hei tei mpaeng khou thu how gay e, tiki kalungc khou thu meic rou khatni rumh rianghmei rui padik ge.#Lat 23.3 28Hei tei kumcna, kapaengc khou thu nangniw hei meic kathuic khou ravchap tatmei kumc dyng the; tiki kalungc khou thu nangniw hei saraamhmei khatni nkhuaimei rui padik ge.

Kaniw tuang Dandi lam Sa Kasuakcmei

(Luk 11.47-51)

29“Riakdanv dinhpouc nunc khatni Pharisimei nunc, gaylwn swmei thiu, nangniw hei sansi e dav! Nangniw rui muhzwng nunc tarou kasiamh e, kumna ravchap tatna lungcloumei nunc ta ningtowpui kai guay tei kapwan swlou e. 30Kumna nangniw rui, ‘Rey nungc aniw pupouc nunc hak khou tei aniw lungh tu khwan e thei, aniw rui kaniw taanc kanmei tei khatni muhzwng guay ta swluai kanmei tei taanc lak ni tuang e,’ twna sa e. 31Kumna nangniw hei muhzwng nunc ta dowluaimei nunc kikta e twmei nangniw ruc khou nangniw kahak rui sakhi e. 32Taanc key tho, kumna nangniw pupouc nunc rui taanc thaulou kanmei tei taanc suak key tho! 33Nruithiu khatni nrui nacthiu! Maikwam gut nimei khou rui duak khang tu kumhna nangniw ning lana cho?#Met 3.7; 12.34; Luk 3.7 34Hei zaeng rui ai nangniw khou sa tuang e: i rui nangniw khou muhzwng nunc ta, ningtyngmei nunc ta khatni Riakdanv dinhpouc nunc ta ndiu guang puni. Nangniw rui kaniw gaanvsaekc ta swluai puni, gaanvsaekc ta kros khou hian bin puni, gaanvsaekc ta nangniw tuang sinagog khou kathamv kasiclou puni. Kaniw ta rai kasic khang kaidai akhat khou rui akhat khou nthau tat puni. 35Mi thai kiu, ravchaptatmei Abel ta dowluaimei khou rui thauna nangniw rui Ravkai tuang Nthanmei Bamv lev ravchapaeng kak khou Barakia nac mpouh Zekaria ta dowluai kanmei nganvna, ravchaptatmei kapwmna ta dowluai kanmei zei tei nangniw ruc khou keylou puni.#Tha 4.8; 2 Ki 24.20-21 36Ai rui kaling siakna nangniw khou sa tuang e: mi lam kapwmna hei mi meikin ruc khou hei keylou puni!

Jisu Jerusalem ta Nzianmei

(Luk 13.34-35)

37“He Jerusalem, Jerusalem! Nang rui muhzwng guay ta swluai e khatni Ravguangc rui nang khou ndiu guangmei latdiu tatmei guay ta ntauh kwamluai e! Nruay kui rui kaswkaeng bangc khou kanac nunc ta gungcloumei kumcna, abaanc pwam rui nang mei kapwmna ta pamclou nii e, tiki nang rui ata nuhlou mak khe! 38Zauclo, nang kai ta ganclou the, kumna kairaeng ganclou puni the.#Jer 22.5 39Ai rui nangniw khou kadyloumei tuang e: ‘Poubauhmei zanc khou guangmeipu kamei hei sangaymei e,’ twna nangniw rui sa mak saanv ntaw khou rui thauna nangniw ata how dat ni tu hamh the.”#Kal 118.26

Currently Selected:

METTHIU 23: RONGBSI

Highlight

Copy