LUK 9
9
Jisu rui Kaziap Ruhna Kanei ta Ndiuloumei
(Met 10.5-15; Mrk 6.7-13)
1Jisu rui gaanv ruhna kanei ta tei kaw guang kaduaina ravsic nthau ganh khang khatni ravpuat guay tigaylou khang pumtan khatni ngamv tiilou the. 2Kumna Ravguangc guangcdic dinc ndauh khang khatni su numei ta tigaylou khang kaniw ta ndiu pat the. 3Kumna kamei rui kaniw khou sa the: “Chaeng khou sinsw khang nangniw ramhkhat sini phungc riu—builwang ni, khau ni, ntyan ni, syan ni, thiula saplai ni phungc riu.#Luk 10.4-11; Lat 13.51 4Nangniw gutloumei kai khou tei, nangniw mi kaidai khou tei rui tat dat mak saanv bam o. 5Tiki nangniw ta laalou makmei nunc ruc khou tei thu, kaniw tuang kaidai khou tei rui tat pat dat ni khou, kaniw ruc khou sakhi khang, nangniw tuang phaypav niang tei kadiw keylou duc tio.” 6Kumna kaniw tat patna, namv namv khou tatlouna, tatloupui bamv kathuic khou gaychamv dinclou the khatni su numei nunc ta tigaylou the.
Herod Jisu ta Thay Makmei
(Met 14.1-12; Mrk 6.14-29)
7Mi kumna sw bammei guay hei guangh Herod chu lana, kamei ramh sw la khang thay mak khe. Kalam thu, “Jahon ta tiringcthaulou dat tina di the,” twna meic gaanvsaekc rui sa the.#Met 16.14; Mrk 8.28; Luk 9.19 8“Elija lungc guang lana di the,” twna gaanvsaekc rui sa the. Baihmei gaanvsaekc rui, “Reynungc muczwng ringcthau dat lana di the,” twna sa the. 9Tiki, “Jahon ta thu ai rui kapy dangv kan the. Mi kumna sw bam e twna sabammeipu kiu thow lana cho?” twna Herod rui sa the. Kumna kata ariw khang phu the.
Jisu rui Meic Ching Panguh ta Tituloumei
(Met 14.13-21; Mrk 6.30-44; Jhn 6.1-14)
10Kumna latdiutatmei nunc tei hanc guang datna kaniw rui taanc kanmei guay tei Jisu khou raclou the. Khoutei Jisu rui kaniw ta nduanghna kaphwng kaphaw makna, Bethsaida twna kawmei kaidai thangc tat the. 11Tiki meic kangdai tei hei tei thay lana kathei lay guang the. Khoutei Jisu rui kaniw ta riulouna Ravguangc guangcdic lam raclou the khatni tigaylou khang kage naimei guay ta tigaylou the.
12Tiki tingzyn neih key pwkhou, ziap ruhna kanei tei guangna Jisu khou sa the, “Meic kangdai ti hei ndiu ganclou ti tho. Kaniw ana khou naimei namv khatni laumangh namv guay khou bangv bamv khang khatni tu zangv khang kaphianh tat kan di tho. Aniu bampui bamv hei thu tazikramv di the.”
13Khoutei, “Kaniw tu khang nangniw tii tio,” twna Jisu rui kaniw khou sa the.
Khoutei kaniw rui sa the, “Aniw khou naimei thu ntyan dwm panguh lev khav kanei na de. Aniw tatna liu mak ge thei meic heizumei khang maek ge.” 14(Kalam thu mi khou tei nggaanvmei meic ching panguh dou bam khwan e.)
Tiki, “Meic riakngu dou dou tuang phwam phwam swna tidungc key tho,” twna Jisu rui kaziap nunc khou tei sa the. 15Ziap nunc tei rui meic guay na ta hei tei kumcna tidungc key the. 16Khoutei ntyan dwm panguh lev khav kanei tei laana tingkauh thangc zauc kuna suaihiamlou lana by baklou the. Kumna meic heizumei khou tei nzanhlou khang kaziap nunc khou tiilou the. 17Khoutei meic guay na tu ngguna tu the, kumna tu nsaekcloumei giupaekc ruhna kanei khuam guang the.
Pitar rui Khrista ta Dinc Ndauhmei
(Met 16.13-19; Mrk 8.27-29)
18Zaeng neih khat Jisu karana huayney bam khou, kaziap nunc ni kadaeng khou bam khwan e. Khoutei kamei rui kaziap nunc khou, “Ai hei thow e twna meic nunc rui sa bam bu cho?” twna thanv the.
19Kaniw rui mundawna, “Duiluploumei Jahon tei e twna sa e; tiki gaanvsaekc rui thu, ‘Elija e,’ baihmei gaanvsaekc rui ‘reydouc muczwng pang khou rui gaanv khat ringcthau dat lana e,’ twna sa bam e,” twna sa the.#Met 14.1-2; Mrk 6.14-15; Luk 9.7-8
20Khoutei Jisu rui, “Nangniw thu ai hei thow e twna laa tu cho?” twna kaniw khou sa the.#Jhn 6.68-69
Khoutei Pitar rui mundawna, “Ravguangc tuang Khrista the,” twna sa the.
Jisu Kamei Theic Nimei lam khou Saloumei
(Met 16.20-28; Mrk 8.30—9.1)
21Hei tei meic gaanv khat na khou sini salou nuh mak ge twna kaniw khou kakhimlouna sa the, 22“Meic Nac Mpouh hei ryanra ryanriumei mpeyna ariw puni; gaanvthaih nunc, amuh daihmei nunc khatni Riakdanv dinhpouc nunc rui kata nuh makna ganc pat puni khatni swluai puni. Tiki zaeng neih thumhpui nungc ringcthau dat puni.”
23Khoutei Jisu rui meic guayna khou tei sa the, “Thow pw ni athei lay nii e thei, karana kata nuh makna, tingmik pum katuang kros phungcna athei lay nina e.#Met 10.38; Luk 14.27 24Thow pw ni karingcpaan kan niina ning e thei, hei tei swmaan puni; tiki thow pw ni akhang rui karingcpaan maanlou e thei, hei tei kanlou puni.#Met 10.39; Luk 17.33; Jhn 12.25 25Thow pw ni, mbaanv kapwm hei kakhang laatow sini, kamei kahak maanlou e thei, hamh e thei kapumc thuanlou e thei, kakhang tabui gaengna cho? 26Thow pw ni, alam khou khatni alat lam khou zakpui mei ta tei, Meic Nac Mpouh hei rui ni, kamei kahym khou, kaPu hym khou khatni nthanmei baanchara nunc hym khou key pwkhou, kamei e twna sa khang zak puni. 27Ai rui nangniw khou kaling samei tuang e, mi khou ding bammei nunc pang khou kaniw theih mak khou, Ravguangc guangcdic how nimei nunc nai e.”
Jisu Kalwn Gwanlihmei
(Met 17.1-8; Mrk 9.2-8)
28Mi guay hei saloumei tangv zaeng tachat dou tangv, Pitar, Jahon khatni Jakob ta nduanghna, huayney khang Jisu chyngbut thangc ku the.#2 Pi 1.17-18 29Khoutei kamei huayney bam khou kazawpaanv kalaic pat the khatni katuang pheybaan mphwan ti tah ta pat the. 30Thaymak lyangna meic gaanvnei rui kata pary rac bam khwan e. Kaney tei Mousi lev Elija khwan e, kumna 31hymdaicna guangna, Jisu kamei Ravguangc tuang raeng ti-nthuihna Jerusalem khou theiclou nimei lam khou kamei lev kachuc bam khwan e. 32Khoutei Pitar lev kapammei nunc tei zip nii langvna zip tat the. Kumna kaniw mphaengv pat dat pwkhou, Jisu tuang hymdaihmei khatni kadaeng khou Mousi lev Elija ding bammei ta kaniw how the. 33Mi nei tei tat dat kan pwkhou, Pitar rui Jisu khou sa the, “Kaipouc, aniu mi khou hei bammei gay the. Kumna aniw nang khang, Mousi khang khatni Elija khang zypui kai kathumh swlou ni the.” Hei tei kamei tabui sa bam tu cho twmei thay makna sa bam tu khwan e. 34Kamei hei tei sa bam khou, muangh guam guangna kaniw ta tuk liam the. Khoutei kaniw ping the. 35Kumna, “Mi hei ai rui kapahloumei Anac Mpouh the, nangniw kalat chu o!” twna muangh khou tei rui kauc pat the.#Isa 42.1; Met 3.17; 12.18; Mrk 1.11; Luk 3.22 36Mi khwan tei sa pat pwkhou, Jisu karana bam dat khwan the. Ziap nunc tei kaniw rui how kanmei tei gaanv khat na khou sini, mi douc tei sa pat makna bam khwan e.
Ravsic Gutmei Alauc Khat ta Tigayloumei
(Met 17.14-18; Mrk 9.14-27)
37Nthuanh thauna, kaniw chyngbut thangc tei rui key dat pwkhou, meic kangdai rui kata ariw the. 38Khoutei meic kangdai khou tei rui gaanv khat rui kaucna sa the, “Dinhpouc, anac ta zauclou o; kamei hei kalu akhat namei nac mpouh e. 39Bumaengh akhat rui kata sinswna, kadyng khou kamei kauc thauna kandih khou kasaanv keylouna savbwam patna bam raph rap the. Kumna sw kasic karouclouna ganclou raph rap the. 40Mi ti hei nthau ganclou khang nang ziap nunc khou zaenghuay the, tiki kaniw ngam mak khe.”
41Khoutei mundawna, “Lwm makmei khatni chaeng maanvmei nunc, ai nangniw lev asaanh khaengv bam ho twna cho? Nang nac ta kiu mi khou hei laaguang o,” twna Jisu rui sa the.
42Mi nac tei Jisu daeng nzwan guangmei dyng khou tei ravsic tei rui kata titheilanc keyna kandih khou saanv keylou the. Khoutei Jisu rui nthan makmei bumaengc ta tei mphut the, kumna mi nac ta tei tigaylouna kapu khou nsinlou dat the. 43Khoutei meic guay tei Ravguangc tuang ngamv daihmei ta tei ngak the.
Jisu Kamei Theic Nimei lam khou Sa Datmei
(Met 17.22-23; Mrk 9.30-32)
Mi kumcna kamei rui swloumei guay khou tei meic guayna ngak sakh sakna bam khou, Jisu rui kaziap nunc khou sa the, 44“mi hei nangniw nukuanc khou chu gutlou la tho: Mi kiu thu, Meic Nac Mpouh ti hei meic nunc baanc khou tii patlou puni the.” 45Mi lat kabac hei kaniw thay mak khe, kalam thu kaniw kabah thay mak khang, hei tei gumbinlou kan the. Mi kabac tei kaniw thanv khang ni ping the.
Thow tei Daic liangmei Puni Cho?
(Met 18.1-5; Mrk 9.33-37)
46Kaniw pang khou thow tei daic liang puni cho twna kaziap nunc tei kaphianh thau the.#Luk 22.24 47Kaniw khou mi kumhmei lungning nai bammei tei thay lana, Jisu rui alauc gaanv khat ta kaw guangna kadaeng khou tidinglouna, 48kaniw khou sa the, “Thow pw ni, mi nac ti hei laaloupui mei tei ata laalou tu e, khatni ata laaloupui mei tei ata ndiu guangmeipu ta laalou tu e. Kalam thu nangniw pang khou nthyam liangpui mei tei daic liangpui mei e.”#Met 10.40; Luk 10.16; Jhn 13.20
49Khoutei Jahon rui sa the, “Kaipouc, meic gaanv khat nang zanc khou ravsic nthau ganc bammei ta howna hei tei sw riu twna aniw rui khaamlou kan e. Kalam thu kamei aniu thei lay kazauhpui mei hamh e.”
50Khoutei, “Kata khaam nangh e; kalam thu nangniw ta akhangv makpui mei tei thu nangniw biak lianghpui mei de,” twna Jisu rui kakhou sa the.
Samariamei rui Jisu ta Laalou Makmei
51Kumna kata tingkauh thangc laa thau nipui ganv guang pwkhou, Jerusalem thangc tat khang Jisu dinglou the. 52Kumna Jisu khang bangvbamv chamdaanv khang meic gaanvsaekc ta ndiulou the. Khoutei kaniw Samariamei kaidai akhat khou gut the. 53Tiki kamei Jerusalem thangc key nina tat bam tu de twpui zaeng rui, kaniw rui kata laalou mak khe.
54Hei tei how lana, kaziap Jakob lev Jahon rui, “Poubauhmei, tingkauh thangc rui mai tii keyna#Elija rui sw kanmei kumcna tingkauh thangc rui mai tii keyna twna baanhhy baibal asaekc khou hylou e. kaniw ti hei swmaan di kho cho?” twna sa the.#2 Ki 1.9-16 55Khoutei karih patna Kaniw ta luh the.#Baanhhy baibal asaekc khou Nangniw hei tabui kumhmei bumaengc tuang cho twmei nangniw thay mak ge; kalam thu Meic Nac Mpouh hei meic nunc panty swmaan khang guang tu hamh e; kaniw ta kanlou khang de twna mi khou hei hy nsuklou e. 56Kumna kaniw namv baih thangc tat dat kan the.
Jisu Thei Laymei Thukh
(Met 8.19-22)
57Kaniw tat bammei chaenglwan khou tei, “Nang tat tatpui bamv khou ai nang thei lay ni,” twna gaanv khat rui Jisu khou sa the.
58Khoutei, “Asacsi nunc khang kaniw kai nai e, nruayna nunc khang ni kaniw bou nai e, tiki Meic Nac Mpouh khang thu kapy mbaeng keyloupui bamv khang na sini maek ge,” twna Jisu rui kakhou daw the.
59Meic baihmei gaanv khat khou, “Nang athei lay o,” twna Jisu rui sa the.
Tiki, “Ai apu ta mbeih tat rey ni he,” twna mi pu tei rui daw the.
60Khoutei, “Theihmei ta thu theihmei nunc rui mbeih bam kan di tho; nang thu Ravguangc guangcdic chamv dinc tat tho,” twna Jisu rui kakhou sa the.
61Khoutei baihmei gaanv khat rui, “Poubauhmei, ai nang thei lay ni; tiki ai akai thangc tatna kaikhunhmei nunc khou kadylou ni he,” twna sa the.#1 Gu 19.20
62Khoutei, “Guaihphu sinna thei zauc karihpui mei tei thu Ravguangc guangcdic khang biuh mak ge,” twna Jisu rui sa the.
Currently Selected:
LUK 9: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
