LUK 10

Jisu rui Gaanv Riakchaneina Kanei ta Ndiu Patmei

1Mi tangv, Poubauhmei rui baihmei gaanv riakchaneina kanei#Baanhhy baibal asaekc khou thu riakchanei twna hylou e. ta kadah patna kamei guang nimei kaidai khatni namv guay khou gaanv nei gaanv nei ndiulou hu the. 2Kumna Jisu rui kaniw khou sa the, “Lautay khang geic the, tiki tay nipui mei thu rau the. Hei zaeng rui lautay nipui mei ndiulou geih khang laupouc khou ney o.#Met 9.37-38 3Tat tho! Ai rui nangniw ta, lauziunac nunc ta angiw pang khou ndiulou kumc ndiulou tuang e.#Met 10.16 4Khau, syankhau, khatni phaythuapc phungh riu; chaengkui khou meickai ta kachucna kaganv sw chanah tat rio.#Met 10.7-14; Mrk 6.8-11; Luk 9.3-5

5“Nangniw gaanv khat kai khou gut pwkhou, rey liangmei khou, ‘Mi kai khou hei chuzaenghmei nai diu,’ twna salou o. 6Chuzaenghmei guanglou nuhpui mei, mi khou tei bam khwan e thei, nang rui tiimei chuzaenghmei tei kakhou nai bam kan ni the; kumh mak ge thei, nang khou hei tei guang bam dat puni. 7Nangniw khang kakai rui tii tiimei tei tu zangvna mi kai khou tei bam o. (Kalam thu taanv taanhpui mei thu kaphy laa biuc e); nangniw kaibang kalaic kalw tat riu.#1 Ko 9.14; 1 Ti 5.18

8“Nangniw kaidai akhat khou gut pwkhou, nangniw ta laalou e thei, nangniw khang tii tiimei tei tu o. 9Mi khou tei nnaumei ta tigaylou tio, khatni ‘Ravguangc guangcdic nangniw daeng khou ana guang the,’ twna kaniw khou dinclou tio. 10Tiki kaidai akhat khou nangniw guang pwkhou, nangniw ta laalou mak ge thei, mi kaidai tuang chaengluang guay khou tatna,#Lat 13.51 11‘Aniw phay khou khuaploumei nangniw kaidai tuang niang nganv nangniw ruc khou sakhi khang kadiw keylou kan the. Tabui pw ni Ravguangc guangcdic ana the twmei na thu thay o,’ twna salou tio. 12Ai rui nangniw khou sa tuang e; Latzan nungc kiu, mi kaidai ta tei suangc thu Sodom ta nzianlou kan ni de!#Tha 19.24-28; Met 11.24; 10.15

Lwm Makmei Kaidai nunc

(Met 11.20-24)

13“Korazin, nang hei sansi e dav! Bethsaida, nang hei sansi e dav! Kalam thu nangney khou taanclou kanmei charynmei taanv guay tei Tur lev Sidon khou taanclou bam khwan e thei, pheyga piuna khatni mbut lowna theidouc rui lungh laic kan ni tuang di the.#Isa 23.1-18; Eze 26.1—28.26; Jol 3.4-8 14Latzan nungc kiu nangney ta suangc Tur lev Sidon ta zauc nzianlou mbu kan ni de. 15Kapharnahum, nang ta tingpuk puanc ku tangclou puni twna ningna cho? Hamh e, nang ta taruaih khou zay keylou puni.#Isa 14.13-15

16“Nangniw lat nkingmei nunc tei alat nking tu the; nangniw ta laalou makmei nunc tei ata laalou mak tu the; khatni ata laalou makmei nunc tei ata ndiu guangmeipu ta laalou mak tu the.”#Met 10.40; Mrk 9.37; Luk 9.48; Jhn 13.20

Riakchaneina Kanei tei Guang Datmei

17Gaanv riakchaneina kanei#10.1 tei zauc o tei neihlana hanc guang datna, “Poubauhmei, nang zanc saanc pwkhou ravsic nunc nganvna aniw kut gut the,” twna sa the.

18Khoutei Jisu rui kaniw khou sa the, “Seitaan tingkauh thangc rui tingpalik kumcna taek key kanmei ta ai how the. 19Nrui ta ni, ravga ta ni ni bin khang khatni zauczihmei ngamv guay ta ngam khang nangniw khou ngamv tiilou kan the. Ramh khat na rui sini nangniw ta kabiu lak ge.#Kal 91.13 20Tiki simei bumaengc nunc ta nangniw ngam the twna neihla nangh e, tiki nangniw zanc tingkauh thangc hylou the twna neihla o.”

Jisu Neihlamei

(Met 11.25-27; 13.16-17)

21Mi dyng khou tei, Jisu Bumaengh Nthanmei#Baanhhy baibal asaekc khou Bumaengh twna hylou e; baihmei asaekc khou rui kabumaengc neihlamei padikna twna ni hylou e. paan rui neihlamei padikna sa the, “He, aPu, tingpuk kandih kaipouc, nang ta thuanc e, kalam thu nang rui mi guay hei ningtyng ntakmei nunc khou nkamhlouna alauc nunc khou lyanlou the. Ngguay, aPu, mi hei nang rui ningmei e.

22“APu rui abaanc khou ramh guayna tiilou the. Pu na tei hamhna gaanv khat na sini Nah Mpouh hei thow cho twmei thay mak ge, khatni Nah Mpouh lev Pu lam khou kakhou ndauhlou khang Nah Mpouh hei rui kadahloupui mei na tei hamhna gaanv khat na sini Pu hei thow cho twmei thay mak ge.”#Jhn 3.35; 10.15

23Khoutei Jisu kaziap nunc biak thangc karih patna kaniw khou na sa the, “Nangniw mi kumhmei hei how towmei hei nangniw sangay e! 24Ai rui nangniw khou sa tuang e: muhzwng khatni guangh mpeyna ni nangniw howmei hei how nii khwan e, tiki kaniw how tow kan mak khe, khatni nangniw chumei hei chu nii khwan e, tiki chu tow kan mak khe.”

Meicgaymei Samariameipu Latgiam

25Zauclo, Riakdanv dinhpouc gaanv khat dingthauna Jisu ta nchanvna, “Dinhpouc, ringcsuangmei laa khang ai tabui taanc nina cho?” twna sa the.#Met 22.35-40; Mrk 12.28-34

26Khoutei, “Riakdanv khou tei tabui hylou bu cho? Mi khou tei nang akumhna pac tow bu cho?” twna Jisu rui sa the.

27Mundawna kamei rui sa the, “‘Nang lung kapwm rui, nang tuang ringhpaan kapwm rui, nang pumtan kapwm rui, khatni nang lungning kapwm rui Poubauhmei nang Racguangc ta nzian nina e,’ khatni ‘Nang kai kaining kaigeimei ta nang rana nang ta nzianmei kumcna nzian nina e,’ twna hylou e.”#Lev 19.18; Ria 6.5

28Khoutei, “Nang daw nchumh the; hei tei sw tho, kum e thei nang ringc puni the,” twna Jisu rui daw the.#Lev 18.5

29Khoutei karana kata ti-nzih nii lana, “Akai kaining kaigeimei kiu thow tei cho?” twna mi pu tei rui sa the.

30Hei tei mundawna Jisu rui sa the, “Meic gaanv khat Jerusalem khou rui Jeriko thangc key the. Mi khou tei kwamtumei nunc baanc khou kamei keylou the. Kumna kaniw rui kaphey kabaan asut ngam the kumna bailuai dunna ganclou ducna tat kan the. 31Khoutei, amuh gaanv khat mi chaeng tei tat key nangc the, kumna kamei mi pu ta tei how lana chaeng naek akhat thangc ley tat kan the. 32Hei tei kumc muayna Levimeipu gaanv khat ni kamei mi bamv khou tei guang pwkhou, mi pu ta tei how lana, chaeng naek akhat thangc ley tat kan the. 33Tiki Samariameipu gaanv khat ni nggin keyna mi pu bamv khou tei key the. Kamei mi pu ta tei how pwkhou, kata nzian the.#2 Ki 28.15 34Kumna kamei mi pu daeng khou tei guangna, kazam kazei khou thau khatni drakha zouc lou the, kumna duamlou the. Kum lana, katuang takuanc khou tidungclouna ginbangvkai khou nduangh guangna kasiamruai swlou the. 35Nthuanh thauna, daandi paek kanei laa patna ginbangvkai kaipouc khou tiilouna, ‘Kati hei zauclou bam khwan o; nang rui kakhou gut mbulou kanmei nai e thei ai guang dat pwkhou tiilou dat puni,’ twna sa the.

36“Mi nunc gaanv thumh khou hei, thow tei mi kwamtumei nunc baanc khou keyloumei pu tuang kaining kaigeimei e twna nang ning tu cho?”

37“Kata zauc nzianloumei pu tei the,” twna Riakdanv dinhpouc tei rui daw the.

“Nang ni hei tei kumcna taanc tho,” twna Jisu rui kakhou kadylou the.

Jisu Martha lev Meri Kai khou

38Jisu Kaziap nunc lev nggin tat bammei chaenglwan khou, namv akhat khou guang khou, kazanc Martha twna kawmeipui rui kata kakai khou tibangvlou the.#Jhn 11.1 39Kaswanrey Meri twna kawmeipui nai khwan e. Kamei tei Poubauhmei daeng khou dungcna kalat nking bam khwan e. 40Tiki Martha thu siamruai sw khang tynna dwan manc bam khwan e. Khoutei kamei Jisu daeng khou guangna, “Poubauhmei, akainac rui taanv heizumei akhang na ganclou bammei hei nang thaylou makna cho? Ata nkhav khang kakhou salou o!” twna sa the.

41Khoutei Poubauhmei rui sa the, “Martha, Martha, kalam mpeyna khang nang dwan mancna ningsumc bam e, 42tiki kage nai liangmei akhat nai e. Meri thu kakhou rui laa pat dat ngam lak nimei gaymei dam laa kan the.”

Currently Selected:

LUK 10: RONGBSI

Highlight

Copy