LUK 13

Lungh Laic o

1Mi dyng khou tei meic gaanvsaekc guangna, Galilimei nunc ta kaniw ravkhaeng bam khou, Pilat rui dowluai kan e, twna Jisu khou poulou khwan e. 2Khoutei Jisu rui dawna sa the, “Kaniw mi kumna theihmei hei, Galilimei baihmei guay suangc kaniw hei siliangmei paapcmei nunc tina the twna nangniw ningna cho? 3Kiuc hamh e! Ai rui nangniw khou samei tuang e: Nangniw ni lungh laih mak ge thei, hei tei kumcna theic puni. 4Hamh e thei, Siloam khou kai pangv binna theic kanmei gaanv ruhna tachat tei, Jerusalem khou lungc bammei guay khou rui kakhuay daic ranvmei nunc tina e twna nangniw ningna cho? 5Kiuc hamh e! Ai rui nangniw khou samei tuang e: Nangniw ni lungh laih mak ge thei hei tei kumcna theic puni.”

Kathai Nthai Makmei Tadut Bang

6Khoutei Jisu rui mi latgiam hei sa the: “Meic gaanv khat rui katuang pikwan khou tadut bang akhat lingclou the. Kumna kamei kathai nai bw ni zauh khang guang pwkhou, kathai khat sini maek khe. 7Khoutei, ‘Mi tadut bang hei kathai nai bw ni twna guang zauc bammei tingkwm kathumh tangc the. Tiki kathai khat sini how mak khe. Mi hei dow ganc tho! Tabui sw khang mi hei rui kandih swmaan bam nina cho?’ twna pikwan taanhmeipu khou tei sa the.

8“‘Kaipouc, aseic kwm hei na thu bam kan di ho. Kabang daeng chau haengvna chaba louna ai kasiamh ni he. 9Nkun kiu nthai pw e thei gay the! Nthai mak ge thei gai ganc tho,’ twna mi pu tei rui daw the.”

Jisu rui Suan Baengmeipui ta Sabbathneic Tigayloumei

10Sabbathneic Jisu sinagog akhat khou nchamlou bam khwan e. 11Mi khou tei bumaengh akhat rui tingkwm ruhna tachat ti-nnauna, kangumc nkuanna ding ntyng dat ngam makna bammeipui ni bam khwan e. 12Jisu rui kata how lana kaw guangna, “Tanpuile, nang tuang ravpuat khou rui nang ta tiduaklou kan the,” twna kakhou sa the. 13Kumna Jisu mi pui ruc khou tei kabaanc bouclou the. Khoutei kadyng khou kamei ding ntyng thauna, Ravguangc ta thuancku the.

14Khoutei, Sabbathneic tigaylou e twpui zaeng rui, sinagog kapypu tei Jisu ta kalung puamcna, meic kangdai khou tei sa the, “Taanv taanh khang zaeng charuk nai e. Sabbathneic hamhna, nangniw mi tingmik guay khou tei guangna tigay damc bu cho!”#Tat 20.9-10; Ria 5.13-14

15Khoutei Poubauhmei rui kakhou mundawna sa the, “Gaylwn swmeithiu, nangniw guaic khatni kuanniam ta tei Sabbathneic riclouna, kakuanc khou rui gaengc patna dui tizangv tu hamhna cho? 16Kum e thei, tingkwm ruhna tachat Seitaan rui bangclou bammei, mi Abraham nac aluhpui ti hei, Sabbathneic riclou nina hamhna cho?”

17Hei tei sa pwkhou, kata akhangv bammei nunc tei zak the; tiki meic nunc tei thu kamei rui charynmei taanv taancloumei tei howna neihla the.

Gannaeng Thw khatni Khay Latgiam

(Met 13.31-32; Mrk 4.30-32)

18Khoutei Jisu rui sa the, “Ravguangc guangcdic hei tabui lev nchamc cho? Mi hei tabui lev kida kho cho? 19Mi hei gaanv khat rui katuang pic khou lingcloumei gannaeng thw tei kumhmei tuang e. Hei tei thau patna daic thau the, kumna nruayna nunc mi khou tei kaniw bou dwan the.”

Khay Latgiam

(Met 13.33)

20Jisu rui sa dat re, “Ravguangc guangcdic hei tabui lev kida kho cho? 21Mi hei meic nunc rui gehu buay giupaekc kathumh laana kanilou tina puang padik patmei khay tei kumhmei tuang e.”

Nrummei Chaengmun

(Met 7.13-14,21-23)

22Jisu Jerusalem thangc keymei chaenglwan khou, kaidai kaidai khatni namv namv khou tatlouna nchamlou bam khwan e. 23Khoutei meic gaanv khat rui, “Poubauhmei, kanloumei laa nimei hei meic katitna di nah cho?” twna thanv the.

24Jisu rui kaniw khou sa the, “Nrummei kaimun khou tei gut khang karamc o. Kalam thu mi khou tei gut khang meic mpeyna karamc puni, tiki gut ngam mak puni. 25Kai kaipouc tei thauna kaikhamv mbangh kan pwkhou, ‘Poubauhmei, aniw khang kaikhamv laanclou o,’ twna kaizaeng khou dingna kaikhamv hiwna huaycha puni.

“Tiki, ‘Nang tabui thangc rui guang tu cho? Ai thay mak ge,’ twna kamei rui daw puni.

26“Mi khou kiu, ‘Aniw nang lev tu nchamc zangv nchamc kan dyng e cho khatni nang rui chaengdai chaengdai khou nchamlou kan dyng e cho,’ twna nangniw rui sa puni.

27“Tiki, ‘Ai nangniw ta thay mak ge; nangniw tabui thangc rui guang tu cho, ai thay mak ge. Akhou rui tat kan o, taanvsic taanhmei nunc!’ twna kamei rui daw puni.#Kal 6.8

28“Nangniw ta kapaengc thangc ganc patloupui ganv khou kiu, Abraham, Isak, Jakob khatni muhzwng guay ta Ravguangc guangcdic khou how pwkhou, nangniw kapna huh khaic ndyang kariakh riak bam puni.#Met 22.13; 25.30 #Met 8.11-12 29Kumna Ravguangc guangcdic ngai khou, neihpat, neihkey, dihpy, dihba thangc rui meic guay guangna dungckey puni. 30Zauclo, ntaw nkhamhmei sw bammei nunc hei reymei sw puni, khatni ntaw reymei sw bammei nunc hei nkhamhmei sw puni.”#Met 19.30; 20.16; Mrk 10.31

Jisu Jerusalem khang Kapmei

(Met 23.37-39)

31Mi ganv khou tei, Pharisimei gaanvsaekc guangna, “Nang kabamv baih thangc tat kan tho. Herod nang ta swluai niina bam the,” twna Jisu khou sa the.

32Khoutei Jisu rui daw the, “Nangniw tat lana, ‘Ai aseic lev nthuanh hei ravsic nthau ganc puni khatni nnaumei ta tigaylou puni, kumna kadouh rui atuang taanv taanc suaklou puni,’ twna mi angiw khou tei sa ti tho. 33Tabui bui pw ni aseic, nthuanh khatni kadouh nganv thu mi kumcna tat key bam puni de. Muhzwng thu Jerusalem paengc thangc theiclou nuh mak ge!

34“He Jerusalem! Jerusalem! Muhzwng nunc ta swluaimei khatni nang khou ndiu guangmei nunc ta ntauh kwamluaimei nang! Nruay kui rui kanac nunc ta gungclou kumcna, nang nac nunc ta gungclou timc e tiki, nang nuh mak khe! 35Zauclo, nang tuang Ravkai ta ganclou puni the. ‘Poubauhmei zanc khou guangmeipu kamei tei sangaymei e!’ twna nang rui sa mak saanv nang ata how dat pw lak khe.”#Kal 118.26; Jer 22.5

Currently Selected:

LUK 13: RONGBSI

Highlight

Copy