LUK 12

Gaylwn Swmei nunc khou rui Swriak Thay o

(Met 10.26-27)

1Meic aching aching guang kaduaina khat khat ta sini ni luai ni tiat khang thay makna bam khou, reymei khou Jisu rui kaziap nunc khou sa the, “Pharisimei nunc tuang khay, mi kiu gaylwnswmei khou tei rui swriak thay o.#Met 16.6; Mrk 8.15 2Ndauh pat makna gumbinlou bam nimei tuang khatni meic thay makna nkamhlou bam nimei tuang ramhkhat sini maek ge.#Mrk 4.22; Luk 8.17 3Nangniw rui zingh khou salou kanmei tei kalaanv gaanh khou chu puni, kaikhamv mbanghlouna nukuanc khou suaina saloumei tei kainam khou rui kauc pat dat puni.

Nang Thow ta Ping Nina Cho?

(Met 10.28-31)

4“Achampanvthiu, ai rui nangniw khou sa tuang e: Meic pumc ta swluai lana mi tangv ramh sw dat kadai ngam lakmei nunc ta tei ping riu. 5Tiki thow ta ping nina cho twmei ai rui dinclou puni. Mi kiu nangniw pumc ta swluai lana maikwam khou phaiclou ngammeipu ta tei ping o. 6Nangniw tingkavna panguh tei paic kanei na khang zuanh mak nah cho? Tiki Ravguangc thu tingkavna akhat na ta sini amuclou mak ge. 7Nangniw samlu nganvna kasing phuclou bam tuang e. Ping riu. Nangniw thu tingkavna mpeyna suangc kunghmei de.

Jisu Mei e hamh e thei Jisu Mei Hamh e Twna Samei

(Met 10.32-33; 12.32; Mrk 10.18-20)

8“Thow pw ni kamei athei laymei e twna meic nunc hu khou sa ndauhpui mei ta tei, Meic Nac Mpouh ai rui ni kata amei e twna Ravguangc tuang baanchara guay hu khou sa ndauh puni. 9Thow pw ni, kamei athei laymei hamh e twna meic nunc hu khou sa ndauhpui mei ta tei, Ravguangc baanchara guay hu khou amei hamh e twna sa puni. 10Meic Nac Mpouh ruc khou sina sapui mei ta tei thu kuaklou puni de, tiki Bumaengh Nthanmei ta ramh sak makna sapui mei ta tei thu kuaklou dat mak khe.#Met 12.32; Mrk 3.29

11“Nangniw ta sinagog khou, dihsinpouc nunc khatni ngamv sinmei nunc hu khou zay guang pwkhou, akumhna daw nina cho khatni tabui lat sa nina cho twmei lungh katuakc riu.#Met 10.19-20; Mrk 13.11; Luk 21.14-15 12Kalam thu tabui lat sa nina cho twmei mi dyng khou tei Bumaengh Nthanmei rui dinclou puni de.”

Lungcgaymei Mpangmeipu Latgiam

13Meic kangdai khou tei rui gaanv khat rui, “Dinhpouc, akai tuang lanv achaic aney khang nzanh khang achaic khou salou o,” twna Jisu khou sa the.

14Khoutei, “Meicpule, thow rui ata latzanpouc khang hamh e thei nangney khang tampy lanv nzanhlou khang kapahlou thena cho?” twna Jisu rui sa the. 15Khoutei Jisu rui kaniw khou sa the, “Nangniw agaamv agah mak khang ramhthay o. Kalam thu maansei panty hei lungcgaymei khou rui ringh tuang hamh e.”

16Kumna Jisu rui kaniw khou mi latgiam hei sa the: “Lungcgaymeipu gaanv khat lau nap gay khwan the. 17Khoutei, ‘Ai tabui sw kho cho? Nap hei lou chan ni tu hamh the,’ twna kamei kakhanh the.

18“Khoutei kamei rui sa the, ‘Asaamc guay hei ra key dat lana, daih daihmei kasiamh dat ni the, kumna mi khou tei nap bi guay khatni khiu khingh guay lou ni the. 19Kumna, “Nang khang, tingkwm mpeyna ringc biuh khang chamdaanvlou kan the. Lungh geic dat ri tho; tu tho, zangv tho, kumna neihla tho,” twna ai rui akhou sa ni the.’

20“Tiki Ravguangc rui kakhou sa the, ‘Mpangmei! Aseic zingbangc hei nang panty laa puni the. Nang rui nang khang chamdaanvloumei guay tei thow khang cho?’

21“Kakhang thu khuam padiklou la ki, Ravguangc khang thu lungcsi bammei nunc tei mi hei kumc puni.”

Lungh Katuakc Rio

(Met 6.25-34)

22Khoutei Jisu rui kaziap nunc khou sa the, “Nangniw ringh khang tabui tu nina cho, hamh e thei nangniw pumc khang tabui tuang nsuay mbaanv nina cho twna lungh katuakc nangh e. 23Nangniw pumc ringhmei hei taektw suangc nthuk ge, khatni nangniw pumc hei pheybaan suangc nthuk ge. 24Agaekc guay ta tei kakhanh zauh o: Kaniw lau taanh mak ge, kaniw saamh ni maek ge, tiki Ravguangc rui kaniw ta makuatlou bam de. Nangniw thu nruayna guay khang suangc adih kungc kanmei nunc cho? 25Nangniw thow tei lungh katuakcmei paan rui kapanty chowbuk akhat na sini tisaengc mbu#hamh e thei nangniw hyang tikauh mbu ngammei naina cho? 26Mi kumhmei na hei sini nangniw sw ngam mak ge thei, tabui swna baihmei guay khang tei thu lungh katuakc bam tu cho?

27“Lili pwang guay ti hei kakhanh zauc o. Kaniw taanv taanh mak ge, langh ni ruaih mak ge. Tiki Solomon sini karam lunggai karin khou nganvna hei tei kumcna karuh tangc kan mak ge.#1 Ki 10.4-7; 2 Ki 9.3-6 28Aseic na ringclou lana, nthuanh mai khou phaiclou kan nimei bang ta sini, Ravguangc rui mi kumcna karuhlou e thei, he lwmmei nthyammeithiu, nangniw ta thu tabui swna karuhlou mak nina cho? 29Kumna nangniw tabui tuang tu nina cho khatni tabui tuang zangv nina cho twna phu bam nangh e; mi khang rui lungh ryanra nangh e. 30Kandihmei maansei guay rui mi khang hei phu e, tiki mi guay hei nangniw khang kage nai e twmei nangniw Pu rui thay bam tuang de. 31Tiki Ravguangc guangcdic tei phu o, kum e thei mi guay hei ni nangniw khang tiilou puni.

Tingkauh Thangc Lanv Rymei

(Met 6.19-21)

32“Ping riu, nangniw lauziu pang nthyammeithiu, kalam thu nangniw khang guanghdic tiiloumei hei nangniw Pu rui kahawmei e. 33Nangniw tuang naimei guay tei zuancna lungcsimei nunc khang tii tio. Kumna sw nchamv dat makmei, kaihouhmei nai dat makmei khatni nthumc rui sw kasic dat makmei tingkauh thangc, nangniw tuang syankhau rylou o. 34Kalam thu nangniw tuang lanv naipui bamv khou tei nangniw lung ni nai puni.

Chamdaanvna Nkhwan Bam o

35“Nangniw sianlangv langvna, maibungc nchoulouna bam o.#Met 25.1-13 36Nowsuanh ngai khou tat kanmei kaniw kaipouc tei guang datna kaikhamv nchow pwkhou laanc rap khang nkhwan bammei nunc tei kumncna nkhwan bam o.#Mrk 13.34-36 37Kaniw nkhwan bam khou kakaipouc guang ariwmei bangc nunc tei sangaymei nunc e. Ai rui nangniw khou kaling siakna sa tuang e: Kamei rui kaniw ta tu zangv khang tidungc keylouna, kamei rui siangiat giatna, kaniw siamruai swlou puni. 38Kaipouc zipchwng pw ni, khwanpaengc pw ni guang pwkhou nkhwan bammei bangc nunc tei sangaymei e. 39Kaihouhmei tei tabui ganv khou guang puni cho twmei kai kaipouc tei thay khwan e thei, kakai tei tihouc ni tu hamh e twmei nangniw thay e.#Met 24.43-44 40Hei tei kumcna, nangniw ni chamdaanv bam o, kalam thu nangniw ning makmei ganv khou Meic Nac Mpouh guang puni.”

Lwmnuhmei khatni Lwmnuh Makmei Bangc

(Met 24.45-51)

41Khoutei Pitar rui, “Poubauhmei, mi latgiam hei aniw khang sa tu ni, meic guayna khang sa tu cho?” twna thanv the.

42Khoutei Poubauhmei rui daw the, “Kaipouc gaanv khat rui katuang tamthiwmeipu khou kabangc guay khang kaganv chana tu zangv khang kaniw dam nzanhlou bam khang nsinlou pwkhou, thow tei ningtyngmei bangc sw puni cho? 43Kakaipouc tei guang dat pwkhou kamei rui kadyloumei kumcna taanc bammei bangc tei sangaymei bangc e. 44Ai rui nangniw khou kaling siakna sa tuang e: Kaipouc tei rui kabaanc khou katuang naimei guay nsinlou puni. 45Tiki, ‘Akaipouc guang dat riu ni tu hamh e,’ twna mi bangcpu tei ningna kabangc guay ta tei—ntumei ta ni, nggaanvmei ta ni baina, tw mba zangv mbana bam khou; 46kamei ning makmei ganv khou kakaipouc tei guang nangc e thei, kata tei dan puat paruatlou puni,#hamh e thei kata ganc pat puni. kumna lwm makmei nunc bamv khou lou puni.

47“Kaipouc rui ningmei tei thay, tiki chamdaanv mak, hamh e thei kamei ningmei tei taanh mak twmei bangc ta tei thu bai ranvna bai puni. 48Tiki thay makna bai biuc rappui taanv taancloupui mei ta tei thu bai rau maih puni. Kumna tiilou geih kanmei nunc khou tei laa dat geic puni khatni nsinlou geic kanmei khou tei ney dat geic puni.

Maneic khang Hamh e, Sw Ntamv khang de

(Met 10.34-36)

49“Ai hei kandih khou mai phaiclou khang guang tuang e. Mi hei ntoulou bam khwan e thei gay ni tuang the twna ning e. 50Ata lup nimei tuang akhat nai e, hei tei luai kan mak saanv alung ryanra e.#Mrk 10.38 51Ai guangmei hei kandih khou maneicmei phungc guang khang e twna nangniw ningna cho? Tiki ai rui nangniw khou sa tuang e, kiuc hamh e, kalangv tipat khang de. 52Ntaw khou rui thauna gaanv panguh naimei kaikhunc khou tei meic guayna ntamv puni. Gaanv thumh lev gaanv nei ntamv puni khatni gaanv nei lev gaanv thumh ntamv puni. 53Kapu lev kanac mpouh, kanac mpouh lev kapu; kapui lev kanac aluh, kanac aluh nunc lev kapui; Kaneic lev kamauc khatni kamauc lev kaneic ntamv puni.”#Mai 7.6

Kaganv tei Chak Thay o

(Met 16.2-3)

54Jisu rui meic kangdai khou tei sa the, “Neihkey biak thangc muangh kumei ta how e thei, ‘tingdai riu puni the,’ twna nangniw sa e. Kumna riu changh e. 55Dihba pwan aliu ngangh ti thei, ‘neih tanc puni the,’ twna nangniw sa e. Kumna tanc changh e. 56Gaylwnswmeithiu! Nangniw tingpuk kandih zaw zauc pat thay e thei, akumhna ntaw pat bammei ti hei thu zauc pat thay makna cho?

Guatc Sw Dat Zaic o

(Met 5.25-26)

57“Tabui swna nangniw si gay kakhanh thay makna cho? 58Thowkumhmei rui nang ruc khou lat phungclou e thei, latzanpouc bamv tangh mak khou nangney guatc sw dat ro. Hamh e thei, kamei rui nang ta latzanpouc khou zaylou kan e thei, latzanpouc rui kangkai sinmeipu khou tiilou puni, kumna kamei rui nang ta kangkai khou bangclou puni. 59Mi khou kiu thu paic akhat na sini tii ntangh ti mak saanv tipat dat ngam pw lak khe.”

Currently Selected:

LUK 12: RONGBSI

Highlight

Copy