THAUREYMEI 41

Izipmei Guangc Mang

1Tingkwm kanei tangv Izipmei guangc tei mang akhat manv khwan e. Kamang thangc kiu kamei Nail duithuak paengc khou ding bam khou 2kameigaymei, ndiau dikh dikmei guaituam chanei Nail duithuak khou rui patna ntou say binc tu bam khwan e. 3Hei tangv kangh kangmei karou ranamei guaituam chanei ni Nail duithuak khou rui patna baihmei guaituam nunc daeng khou tei ding bam khwan e. 4Kumna kanghmei guaituam nunc tei rui kameigaymei guaituam nunc ta tu kan the. Hei tangv tei Pharao tei rak pat the. 5Kamei zip key dat pwkhou mang akhat manv dat re. Napguy chanei nappiw akhat khou naimei ntakmei nap thai minc nzinh zin bam khwan e. 6Hei tangv nggung thuaph thuapmei, neihpat ramvkaeng mpwan rui hunc mphwan phumloumei nap gung guy chanei ni kari pat khwan e, 7kumna napgung gui tei rui nap tak gui ta tei aluakc kan the. Pharao tei rak pat pwki hei tei kamang bam khwan the. 8Tinggaanc pat pwkhou Pharao tei kalung katuakc the, kumna Izip kandic khou naimei ningtyngmei khatni duaih sinmei mangmuh ta kaw guang the. Kamei rui kamang tei kaniw khou raclou the tiki meic gaanv khat na rui sini kabah dinclou ngam mak khe.#Dan 2.2

9Khoutei zouh sinmei kapypu tei rui guangh khou sa the, “Ai aseic hei akhuay ningtow the. 10Guangh rui nap sinmei kapypu lev aney ta lungpuamcna rigaanvmei nunc rihpy kai khou tei naimei kangkai khou tei bangclou the. 11Neih khat zingbangc aney mang akhat akhat manv khwan e khatni aney mang tei kabah baic baic khwan e. 12Rigaanvmei nunc rihpypu bangc Ibrimei nggaanv akhat mi bamv khou tei bam kariu khwan e. Aney mang kiu kakhou raclou tina kamei rui hei tei hanclou the. 13Kamei rui saloumei guang tangcna guangh rui ata ataanv bamv khou lou dat the, tiki nap sinmei kapypu ta guangh rui thaengcluai kan the.”

14Guangh rui Josep ta kaw khang thouclouna kata tei kangkai khou rui katumcna nduangh guang the. Kamei kamwanghiw guatna kapheybaan kalaicna guangh hu khou guang the. 15“Ai mang akhat manv khwan e hei tei meic gaanv khat na rui sini kabah dinclou ngam mak khe. Nang mang kabac dinc thay e twna akhou salou the,” twna guangh rui kakhou sa the.

16“Guanghle, ai thu dinc thay mak ge, tiki Ravguangc rui dinc chuyna dinclou puni e” twna Josep rui daw khwan the.

17Pharao tei rui sa the, “Amang thangc ai Nail duithuak paengc khou ding bam khwan e. 18Kameigaymei, ndiau dikh dikmei guaituam chanei Nail duithuak khou rui patna ntou say binc tu bam khwan e. 19Hei tangv kangh kangmei karou ranamei guaituam chanei ni Nail duithuak khou rui pat khwan the. Mi guaituam nunc tei kumc kanghmei Izip kandic khou how zat mak ge. 20Kanghmei guaituam nunc tei rui kameigaymei nunc ta tei tu kan the. 21Tiki mi nunc tei baihmei nunc ta tu kan the twmei how pat mak ge, mi nunc tei kangc tan bam de. Khoutei ai zip chyang thau the. 22Ai mang akhat ni manv dat re. Nappiw akhat na khou napguy naimei nap gui khou ntakmei nap thai minc nzinh zin bam khwan e. 23Hei tangv nggung thuaph thuapmei neihpat ramvkaeng mpwan rui hun mphwan phumloumei napgung guy ni kari pat khwan e, 24kumna nap gung gui tei rui nap tak gui ta tei aluakc kan the. Ai rui mi mang tei duaih thaymei mangmuh nunc khou raclou the tiki meic gaanv khat na rui sini mi kabac tei dinclou ngam mak khe.”

25Josep rui Pharao khou tei sa the, “Mang kanei tei kabah akhat na de; Ravguangc kamei rui taancpw nimei tei nang khou dincloumei tuang the. 26Kameigaymei guaituam chanei tei tingkwm chanei the, khatni ntakmei nap thw chanei tei tingkwm chanei muay de; mi kanei tei kabah akhat na de. 27Pat nkhamhmei kanghmei guaituam chanei khatni neihpat ramvkaengv mpwan rui hunc nggung thuaph thuaploumei napgung guy chanei tei nap nkow pw nimei tingkwm chanei the. 28Ai rui sa kanmei tei kumcna Ravguangc kamei rui taanc pw nimei tei guangh khou lyanloumei tuang the. 29Izip kandic kapwm khou hei tingkwm chanei nap-bi nthuih ku puni the. 30Mi tangv tei tingkwm chanei nap nkow dat puni the. Mi nap nkowmei tei ranv langv tina tingkwm gaymei chanei ta tei amuc kan puni the. 31Guang nimei nap nkowmei tei si langv tina nap-bi nthuihmei kwm guay ta tei ningtow dat ni tuang hamh the. 32Guangh mang khou manv kaluaih datna manvmei kabac kiu thu mi hei pat khang Ravguangc rui dinglou tang the asaanh makmei lungc khou pat puni the twmei tuang e.

33“Ntaw thu guangh rui ningtyng ntakmei thowkumhmei ta kadah lana Izip kandic khou hei kaipouc akhat lou tho. 34Kumna guangh rui baihmei tamvthiwmei nunc khang ni kadanna nap-bi thuih nimei tingkwm chanei khou tuang nap-bi laaguangmei guay tuang kadam panguh khou akhat thu khuamlou la mei gay the. 35Guang nimei tingkwm gay nimei chanei khou tei laaguangmei nap-bi guay khou tei rui tikhuamna kaidai guay khou guangh ngamv bangc khou rylou tho. 36Hei tei Izip khou tingkwm chanei nap nkow guang nimei ganv khou kiu ndaapcna theic changh mak khang mi kandic kapwm khang nzanh khang e.”

Josep ta Izip khou Guanghkhyn Tiswloumei

37Pharao khatni katuang meicdaihmei nunc tei Josep lat tei laa the. 38Kumna Pharao rui kabangc nunc khou sa the, “Ravguangc bumaengc kakhou naimei Josep kumhmei meic baihmei aniu phutow dat pu lak khe.” 39Guangh tei rui Josep khou sa the, “Mi guay hei Ravguangc rui nang khou lyanlou the, kumna meic baihmei nunc khou suangc nang khou ningting takh mbuna nai the twmei nthanna thay the. 40Nang rui kaphianhlou khang ai rui akandih hei nang khou nsinlou puni the, kumna amei nunc rui nang tuang latdanv piu puni the. Abangc khou ngamv daic liangmei thu nang di the.#Lat 7.10 41Ntaw ai rui nang ta Izip kandic kapwm tuang guanghkhyn tiswlou puni the.” 42Pharao tei rui kabaanc khou nai bammei guangh ngamv baanrwn tei laa patna Josep baanczung khou runlou the. Kamei rui aniang nuaih nuaimei linen thiula saenghmei kakhou piulou the, khatni kachaekc tucriang kakhou aleilou the.#Dan 5.29 43Guangh tei rui Josep ta katuang kaneimei takuanh gari khou tidungclouna kata karuhmei rigaanvmei nunc rui “Nkhum keyna kalum o!” twna kaucna tat the. Heikumna Josep ta Izip tuang guanghkhyn tiswlou the. 44Pharao rui Josep khou kumna sa dat re, “Ai hei Izipmei guangc e nang rui nuhloumei tuang maekna meic gaanv khat na sini Izip kandic khou hei kanyng sw nuh mak ge.” 45Guangh tei rui Josep zanc khang Zaphenat Panea twna Izipmei zanc phuaklou the. Kanow khang Heliopolis kaidai tuang amuh Potiphera nacpui kazanc Asenat twna kawmeipui ta tii the. 46Josep kamei Izipmei guangc tuang taanvtaanc kahouh khou tei katingkwm 30 tangc khwan the. Kamei guanghkai tei ganclouna kandih kapwm khou tei ruan thau the. 47Tingkwm chanei lungc khou tei nap-bi nthuih the. 48Mi guay tei Josep rui khuam lana kaidai guay khou rylou the. Bam nkuaymei ramv guay khou tei rui nap-bi guay tei khuamna kaidai kathuic khou rylou the. 49Laaguangmei nap tei geic langv tina Josep tei ndath taanc the duipui syniang zu khuam kaduailou the.

50Nap nkowmei tei guang makmei hu khou kanow Asenat khou rui nggaanvmei nac gaanv nei lungc guang khwan the. 51Kamei rui akhang ryanramei guay akhat ni kapu kai ta Ravguangc rui ti-amuclou the twna kamei rui nareimeipu zanc tei Manase twna phuaklou the. 52Kamei ryanrana lunghmei kandic khou tei Ravguangc rui kakhang nah tiilou the twna kamei rui kaneimeipu zanc tei Ephraim twna phuaklou the.

53Josep rui saloumei kumcna Izip kandic khou nap nthuihmei tingkwm chanei tei luai guang the, 54Kumna tingkwm chanei nap nkow nimei tei kahouh the. Baihmei kandic guay khou tei thu nap nkow bam the, tiki Izip khou thu taektw nai khwan the.#Lat 7.11 55Izipmei nunc tei tu khang maek guang pwkhou kaniw rui guangh khou nap ney thau the. Guangh tei rui meic nunc ta Josep daeng thangc tatna Josep rui sa samei tei taanh khang thouclou the.#Jhn 2.5 56Nap nkowmei tei charit guangna mi kandic kapwm khou tei lik guang pwkhou, Josep rui saamh guay tei laancna nap tei Izipmei nunc khang tei zuanclou the. 57Nap nkowmei tei kabamv kathuic khou charit guang tina Josep khou nap law khang kandih kabamv kathuic khou rui Izip khou guang the.

Currently Selected:

THAUREYMEI 41: RONGBSI

Highlight

Copy