THAUREYMEI 42

Josep Chaic nunc Izip khou Nap Law Keymei

1Izip kandic khou nap nai e twmei Jakob rui chu lana, “Tabui swna nangniw khat khat ta phaengc bam tu cho? 2Izip khou nap nai e twmei ai chu e, aniu ndaapcna theic changh mak khang nangniw hei thangc kiu nap law khang tat tho,” twna kamei rui kanac nunc khou sa the.#Lat 7.12 3Kumna Josep chaic gaanv ruh tei nap law khang Izip khou key the. 4Tiki simei pat pu khang pingna Jakob rui Josep kainac Benjamin ta thu kachaic nunc thei ndiulou mak khe.

5Kanaan kandic khou nap nkow tithena Jakob nac nunc tei nap law khang meic baihmei nunc lev twna Izip khou key the. 6Josep tei Izip kandic tuang guanghkhyn swna, kandih kabamv kathuic khou rui guangmei nunc khang tei nap zuanc bam khwan e. Josep chaic nunc tei guangna kaniw zaw kandih khou nkhum key tangcna kata kalum the. 7Josep tei kachaic nunc ta how pwkhou kamei kaniw lwn thay the, tiki kamei kaniw ta thay makpui lwn swna “Nangniw tabui thangc rui guangmei nunc cho?” twna lat tancna kamei rui kaniw khou sa the.

“Aniw nap law khang Kanaan kandic thangc rui keymei tuang de,” twna kaniw rui daw the.

8Josep rui kachaic nunc ta thay sini kaniw rui thu kata thay dat mak khe. 9Kaniw lam khou kamei manv kanmei mang guay tei kamei ningtow the, kumna “Nangniw gwanrummei nunc de; Izip kandic tuang suanmei ta zauh khang nangniw guangmei tuang de” twna kamei rui sa the.#Tha 37.5-10

10“Kiuc hamh e, kandih kaipoucle, nang bangc aniw nap law khang keymei tuang de. 11Aniw hei pu akhat na nac nunc de. Aniw hei gwanrummei nunc hamh e; aniw rouh simei nunc hamh e,” twna kaniw rui daw the.

12“Kiuc hamh e! Akandih tuang suanmei ta rup khang nangniw keymei tuang de,” twna Josep rui kaniw khou sa the.

13“Nang bangc aniw hei Kanaan kandic khou bammei pu akhat na nac chana gaanv 12 e. Gaanv khat thu theic kan the, kumna alauc liangmeipu thu aniw pu daeng thangc bam duc kan e,” twna kaniw rui daw the.

14Josep rui daw the, “Ai rui samei tei de, nangniw gwanrummei nunc de. 15Heikumna nangniw ta nchanv puni the: Guangh zanc pancna samei tuang e- alauc liangmeipu ta kiu khou hei nduangh guang mak saanv nangniw tat dat nuh mak khe. 16Nangniw gaanv khat tatna nduangh guang nina the. Nangniw sa bammei hei nchumh e twmei thay nthan mak saanv baihmei guay thu kangkai khou bam nina the. Kumh mak ge thei, Izip guangc hei nai bam changhmei kumcna, nangniw gwanrummei nunc de!” 17Heikumna kamei rui kaniw guay ta zaeng neih thumh kangkai khou lou the.

18Neih thumhpui nungc Josep rui kaniw khou sa the, “Ai Ravguangc ta ping e; nangniw ringc nuh khang mi hei sw tho. 19Nangniw lung nthanmei nunc de twmei lyan khang rui, nangniw gaanv khat thu kangkai khou bam ducna, baihmei guay thu nangniw rui liuloumei nap guay tei phungcna ndaapcna bam duc kanmei nangniw kai thangc kiu tat tho. 20Alauc liangmeipu ta kiu khou hei nduangh guang tho, heikumna nangniw rui sa bammei hei nchumh de twmei lyan e thei nangniw ta swluai lak khe.” Kaniw mi hei nuh the. 21Kaniw khat khat khou sa the, “Aniu kainac khou aniu rui taanclou kanmei nwan tei ntaw aniu ryanra bammei tuang di the. Aniu rui nzianlou pu diu khang kamei rui sa bam khou tei kalung heidi ryanrana bammei tei aniu howna chulou makmei nwan tei ntaw ryanra bammei tuang di the.”

22“Kata heikumna changh swluai mak khang ai rui sa khou tei nangniw chulou mak khou rui dyng the cho. Kazei nwan tei ntaw aniu ruc khou keylou bam tuang the,” twna Reuben rui sa the.#Tha 37.21,22 23Josep rui lat hancna kaniw ta kachuc bam tina kaniw rui sa bammei tei kamei thay e twmei kaniw thay mak khwan e. 24Josep tei kaniw khou rui tat patna kap the, kumna kamei kaniw daeng khou guang datna kaniw ta kachuc dat the. Kamei rui Simeon ta zay patna kaniw hu khou rui karak the.

Josep Chana nunc Kanaan khou Guang Datmei

25Kachaic nunc khau guay khou tei nap lou padiklou khang kumna kaniw tuang syan tei katuang katuang nap khau khou lou dat khang khatni chaeng khou puktaek khang ni kaniw khang tiilou khang Josep rui sa tina hei tei taanclou the. 26Kaniw tuang kuanniam nunc puat tei sw lana kaniw tatpat the. 27Mi nungc zingbangc ziploumei bamv khou tei kaniw khou gaanv khat katuang kuanniam khang kataek tii khang kakhau laanc pat pwki khau lungc khou tei katuang syan tinc binlou bammei ta ariw the. 28“Atuang syan hanclou bam dat di ke cho, mi khau py khou hei tinc binlou bam khwan the!” twna kachaic nunc khou sa the. Kaniw lung ryanra the, kaniw ping kadunhna sa the, “Ravguangc rui aniu khou swlou bammei hei tabui tuang sih cho?”

29Kanaan khou kaniw pu Jakob daeng khou guang datna pat kanmei guay tei kakhou raclou the: 30“Izipmei dihsinpouc rui aniw ta gwanrummei nunc khang nkhamlouna aniw khou lat tancna sa khwan the. 31‘Aniw gwanrummei nunc hamh e, aniw lung nthanmei nunc de. 32Pu akhat na nac aniw chana gaanv 12 nai khwan e chana akhat thu theic kan the, alauc liangmeipu thu aniw pu daeng khou Kanaan kandic thangc bam duc kan e’ twna aniw rui daw the. 33Tiki mipu tei rui sa the, ‘Nangniw hei lung nthanmei nunc ny nthanmei nunc hamh ny twmei hei zauc puni the: nangniw gaanv khat adaeng khou bam duc nina the; baihmei guay rui ndaapcna bam duc kanmei nangniw kaikhuncmei nunc khang nap hei phungcna tat tho. 34Nangniw kainac alauc liangmeipu ta kiuc adaeng khou nduangh key o. Kum pw e thei nangniw hei gwanrummei nunc hamh the; lungning nthanmei nunc bu de twmei ai thay puni the; kumna nangniw kainac ta ni tiipat dat puni the, kumna nangniw mi kandic khou hei lanvguanh-lanvdaengh bam nuh puni the.’ ”

35Kaniw tuang nap khau tei kathanh nsa pat pwki kaniw meic guayna khau khou tei katuang katuang syan dwam nai bam dat khwan the. Syan tei how pwkhou Jakob kai punav nunc tei ping the. 36Jakob rui sa the, “nangniw anac guay ta swmaanlou nina sw bam tu cho? Josep tei maek khe, ntaw Simeon ni bam mak khe; ntaw Benjamin ta nduangh tat dat khang sa bu di he. Mi ryanra guay hei aruc khou keylou the.”

37Reuben rui kapu khou sa the, “Ai rui Benjamin ta nang daeng khou nduangh guang dat mak ge thei, anac mpouh gaanv nei ta tei swluai la tho. Kata akhou nsinlou o, ai kata nduangh guang dat puni de.”

38Tiki Jakob rui sa the, “Anac ta nangniw thei titat ngam mak ge; kachaic tei theic kan the, ntaw karana ta ganclou duc the. Chaengkui chaengdak khou siroucmei kakhou ariw nangc e thei karapouc ata zaengsina tarou thangc tikeylou me twna sw bammei tuang di the.”

Currently Selected:

THAUREYMEI 42: RONGBSI

Highlight

Copy