THAUREYMEI 38

Juda khatni Tamar

1Mi douc tei Juda tei kachana nunc ta mpatlou ducna Adullam kaidai khou bammei kazanc Hira twna kawmeipu daeng khou lungc tat the. 2Hei khou tei kamei Kanaanmei luc kazanc Shua twna kawmeipui ta ariwna kanow khang kaw the. 3Mi pui tei rui kanac mpouh gaanv khat puanc the. Kazanc Er twna phuaklou the. 4Mi pui tei kapumc nrit datna nah mpouh gaanv khat puanc datna kazanc Onan twna kaw the. 5Nah mpouh akhat ni puanc datna Kazanc Shela twna phuaklou the. Mi nac tei puanhmei ganv khou Juda Akzip khou bam khwan e.

6Kanac gaanvthaihmeipu Er now khang Juda rui Tamar twna kawmeipui ta phulou the.

7Er tei kakhei kaliak si khwan e, kum tina Ringhpouc rui kata pian makna swluai the. 8Khoutei Juda rui Onan khou kumna sa the, “Nang rui nangchaic now khou tatlou nimei thouc ti-nthuihmei swna nangchaic now khou tatlouna kikta tinailou tho.” 9Tiki Onan tei mipui khou rui puanc patmei nac nunc tei kanac sw ni tuang hamh e twmei thay lana, kamei rui kachaic now khou tei tatlou bam sini mpaeng thangc ganclou the. 10Kamei rui sw bammei tei Ringhpouc rui pian makpui zaeng rui kata ni swluai the. 11Khoutei Juda rui kamauc liuchy Tamar khou sa the, “Nang pu kai thangc tat datna anac Shela meicpha mak saanv amay swna lungc bam khwan o.” Mi hei kachaic nunc ta swluai kanmei kumcna Shela ta ni swluai pwng e twmei kamei ping lana samei tuang e. Kumna Tamar tei kakai tat dat kan the.

12Kanakmei tangv Juda now theic the. Latlumei tuang ganv tei luailouna, kamei kapam Adulammeipu Hira lev kalauziu hiw tiap bammei bamv Timna thangc tat the. 13Kapouc Juda tei kalauziu hiw tiap khang Timna khou guang puni twna Tamar khou meic gaanvsaekc rui dinclou the. 14Khoutei kamei piu bammei amaypui pwan tei kalaicna, kazaw phey rui gum binlouna Timna chaeng khou naimei Enaim kaidai gut nimei raengcmun khou dungc bam khwan e kalam thu Juda nac alauc liangmeipu Shela tei ntaw thu meicpha the tiki kata tikakhauh nii mak ge twmei kamei thay the.

15Juda rui kata how pwkhou kamei tei kapumc zuanhmeipui khwang e twna ning the, kalam thu kamei kazaw gumbin bam khwan e. 16Kamei rui chaeng daeng khou tei kadaeng khou guangna kata kachucna sa the, “Ai nang ta zip kariulou ni the.” (Kamaucpui e twmei kamei thay mak khwan e.)

Kamei rui sa the, “Nang akhou tatlou e thei tabui tuang tii nina cho?”

17Juda rui daw the, “Ai rui alauziu pang khou rui ziuh launa akhat tii puni e.”

Kamei rui sa the, “Gay the, nang rui ziuh kiu tii guang mak saanv ramh akhat ganclou duc o.”

18“Khoutei tabui tuang lou duc o twna cho?” twna kamei rui thanv the.

Kamei rui daw the, “Nang tuang sil tei kariang kazauhna khatni nang sin bammei builwang tei lou duc o.” Kamei rui mi kanei tei kakhou tiilou the. Kumna Juda rui mi pui khou tei tatlouna mi pui tei kapumc nrit the. 19Tamar rui kakai thangc guang datna kazaw gumphey tei laa ganc datna amaypui pwan tei piu dat the.

20Juda kamei rui tiilou kanmei puat nei tei laa dat khang kachamvpanv Adulammeipu Hira ta ziuh tiilouna thouclou the, tiki Hira rui kata phutow mak khe. 21“Chaeng daeng khou bammei kapumc zuanhmeipui tei tabui thangc tat kanna cho?” twna Hira rui Enaimmei nunc khou thanv the.

“Mi khou hei kapumc zuanhmeipui bamv mak ge,” twna kaniw rui daw the.

22Kamei rui Juda khou guang datna sa the, “Ai mi pui ta tei phutow dat lak khe. Hei khou tei kapumc zuanhmeipui bam e twmei ta thay mak ge twna mi khou bammei nunc rui sa the.”

23Juda rui sa the, “Mi puat tei kakhou lou bam kan di tho. Meic nunc rui anei ta nuicloumei ta kahaw mak khe. Ai thu tii khang karamc the tiki nang rui phutow makna di the cho.”

24Bw thumh tangv meic gaanv khat rui “Nang maucpui tei kapumc zuanhmeipui thak sw lana, ntaw thu kamei kapumc nrit bam the,” twna Juda khou raclou the.

“Kata kiuc zay patna mai ntei luai o.” twna Juda rui latdanv dan pat the.

25Kata tei zay pat pwkhou, kamei rui kapouc khou kumna salou tio twna sa guang the, “Mi puat nei kaipouc rui apumc ti-nritlou the. Mi kariang naimei sil khatni builwang hei thow tuang cho zauc o.”

26Juda rui hei tei how lana sa the, “kamei nzih dyng the, ai rui kakhou taanclou nimei thouc taanclou mak dyng the-ai rui anac Shela ta kata tikakhauh nimei tuang dyng the.” Kumna Juda rui kakhou tatlou dat zat mak khe.

27Kamei tei nah bam nimei ganv guang pwkhou, kamei tei naphinc the twmei thay the. 28Kamei tei naruina bam khou, gaanv khat rui kabaanc kari pat the; nahpuanhpeic rui kabaanc tei sinna kabaanc daeng khou langhriang haenghmei ntalou the, kumna “Mi hei nareimei the,” twna salou the. 29Tiki mi nac tei kabaanc tei sat gut dat kan the kumna kakai nac tei puanc rey the. Khoutei nahpuanhpeic tei rui kumna sa the, “Nang hei nang chaeng ran pat bu the!” Kumna kazanc Perez twna phuaklou the. 30Kachaic rui kabaanc khou langhriang haenghmei ntalouna puanc pat the, kumna kazanc Zera twna phuaklou the.

Currently Selected:

THAUREYMEI 38: RONGBSI

Highlight

Copy