THAUREYMEI 37

Josep khatni Kachana nunc

1Jakob tei kapu nggin swna lungcloumei kandic khou lungc bam khwan e. 2Mi hei Jakob kai lwanry e, tingkwm 17mei nggaanv launa Josep hei nkhamhmei swna kapu laamvnow Billa khatni Zilpa rui puanhmei kachaic nunc lev lauziu pang gaengc tat bam khwan e. Kachaic nunc rui simei taanc bammei guay tei kamei rui kapu khou poulou khwan e.

3Jakob tei karapouc key khou puanhmei nac Josep ta kanac baihmei nunc ta suangc kungc mbu khwan e. Kumna kapu rui kakhang kahiak gaymei thiula saenghmei kasiamhlou khwan e. 4Kaniw pu rui kaniw ta suangc Josep ta kungc e twmei kachaic nunc rui how pwkhou kaniw Josep ta heidikamv karaengna kata lat gay kachuclou mak bam khwan e.

5Neih khat Josep tei mang akhat manv khwan e, kumna kamei rui mi mang tei kachaic nunc khou raclou pwkhou kaniw kata karaeng ranv khwan the. 6“Amang hei nkinglou o. 7Kamei rui heikumna sa khwan e. Aniu meic guayna laupuk khou napchu bang bam khou atuang napchu ding thau khwan the. Kumna nangniw tuang kiu atuang daeng khou guang ding nkuayna nkhum keyna mi ta tei kalum bam khwan e,”

8“Nang guangh swna aniw ta sin me twna nang ningna cho?” twna kachaic nunc rui sa the. Kamang zaeng khou tei rui khatni mi lam khou tei kamei rui samei zaeng khou tei rui kaniw rui kata karaeng hay hay khwan the.

9Mi tangv Josep tei mang akhat manv dat khwan e. Hei tei kachaic nunc khou raclou khwan e, “Ai mang akhat manv dat re. Mi mang khou kiu neih, bw, khatni gaanchuangcna 11 rui nkhum keyna ata kalum bammei ta ai how khwan e.”

10Kamei rui mi mang tei kapu khou raclou tina “Mi kiu tabui kumhmei mang lana cho? Nang pui, ai khatni nang chaic nunc rui nang khou guangna nkhum keyna nang ta kalum puni e twna ningna cho?” twna kapu rui kata luh khwan e. 11Kachaic nunc rui Josep ta mamav khwan the tiki kapu thu mi lam khou tei kakhanh bam khwan e.#Lat 7.9

Josep ta Zuanhmei khatni Izip thangc Phungc Tatmei

12Zaeng neih khat Josep chaic nunc tei kaniw pu tuang lauziu pang gaengh khang Sekem thangc tat kan the. 13“Nang chaic nunc rui lauziu pang gaengc bammei Sekem ramv thangc tei tat ro,” twna Jakob rui Josep khou sa khwan e. “Nuh de” twna Josep rui daw khwan e.

14“Nang chaic nunc khatni lauziu pang tei gayna bam di ny tatna zauc lana akhou guang poulou dat ro” twna kapu rui kakhou kady khwan the. Kumna kapu rui kata Hebron nzaengc khou suanc patlou khwan the. Josep tei Sekem guang tangcna 15mi ramv khou tei ruan bam khou meic gaanv khat pu rui kata howna “Nang tabui tuang ta phu bam tu cho” twna kakhou thanv tina

16“Lauziu pang gaengc tat kanmei achaic nunc ta phu bam tu e. Kaniw tabui thangc bam cho twmei nang thay bw cho? twna kamei rui thanv the.

17“Kaniw mi bamv khou rui tat dat kan the. Dothan thangc tat ni twna kaniw sa bammei ta ai chu e” twna mipu tei rui daw khwan e. Kumna Josep tei kachaic nunc ta suic nganghna Dothan khou kaniw ta ariw khwan the.

18Josep ta duh thangc rui kaniw how lana kata swluai khang kaniw chamvbui the. 19“Mang manvmeipu tei guang pu the. 20Kata swluaina khunh khou phaiclou di kho. Khouringh rui kata swluailouna the twna sa nuh de. Kum e thei kamang kiu tabui pat puni cho twmei aniu zauc di kho” twna kaniw rui kaphianh the.

21Hei tei Reuben rui chu lana Josep ta gulou khang karamc the. “Aniu swluaimei changh thu swluai nangh e,” 22“Mi tazikramv khunckai khou hei phaiclou di kho, karuc khou changh baanh keylou nangh e” twna kamei rui sa the. Kata kaniw baanc khou rui gulouna kapu daeng thangc thouclou dat khang rui kachaeng phuna kamei rui mi hei samei tuang e. 23Josep tei kachaic nunc daeng khou ngangh tangc pwkhou, katuang thiula saenghmei tei kathangv ganc the. 24Kaniw rui kata nym lana dui maekmei khunhkai khou phaiclou the.

25Kaniw tuzangv khang dungc key bam khou zauc pat pwki Ismaelmei kang akhat Gilead thangc rui Izip thangc tat keymei ta how khwan e. Kaniw tuang guaikuan pang tei maruai, puc, khatni agaw rui puatc sw khwan the. 26Khoutei Juda rui kachaic nunc khou sa the, “Aniu kainac ta swluaina nkamh bammei ruina aniu khang tabui tuang gaengmei naina cho? 27Aniu baanc changh karuc khou keylou nangh khe; Ismaelmei nunc khang hei zuanclou di kho. Tabui bui sw bam sini kamei hei aniu kainac de, aniu zanc de khatni aniu zei de.” Kachaic nunc tei nuh the. 28Kumna Midianmei lanvguanhmei nunc tat ruan guang pwkhou, kaniw rui Josep ta khunh khou tei rui zay patna Ismaelmei nunc khang tei daandi paek 20 khang zuanclou tina Izip thangc phungc tat kan the.#Lat 7.9

29Reuben tei khunh khou tei guang zauc dat pwkhou Josep tei bam timak khena kazaengsina kaphey siatkaek the. 30Kamei kachana nunc daeng khou guang datna “Josep tei bam mak khe! Ai akumh nina cho ni!” twna sa the.

31Kaniw rui ziuh akhat swluaina zei khou tei Josep tuang thiula saenghmei tei kani the. 32Kaniw rui thiula saenghmei tei kaniw pu khou phungc guangna sa the, “Mi hei aniw khuaictow tuang e. Mi hei nang nac tuang cho?”

33Kamei hei tei kalwn thay lana “Ngguay, mi hei anac mpouh tuang the. Nwm khouringc rui kata swluai lana khuan the. Anac Josep ti hei siat puat paruat key lana bu di the ni!” twna sana 34kazaengsina Jakob tei kaphey siatkaek gancna zaengsiphey nsuayna kaganv tingsaengcna kanac ta huayna bam khwan e. 35Kanac mpouh nunc khatni aluh nunc rui guangna kata swm the tiki swmgay ngam mak khe. “Huayna huayna theihmei dic thangc anac daeng thangc key kan nina di the” twna sana Josep ta huayna kap bam the.

36Mi ganv khou tei Josep ta Izip khou phungc guangna Izipmei guangc tuang meicdaihmei, guanghkai ricmei rihpy Potiphar khang Midianmei nunc tei rui zuanclou kan the.

Currently Selected:

THAUREYMEI 37: RONGBSI

Highlight

Copy