THAUREYMEI 28

1Isak rui Jakob ta kaw guangna kakhou suaihiamlouna kumna sa the, “Nang Kanaanmei luc ta kaw riu. 2Mesopotamia thangc nangpouc Bethuel kai thangc tatna nangpouc Laban nac aluh akhat ta kaw tho. 3Ngamparymei Ravguangc rui suaihiamlouna nang hei nangkik nangta kingckiuc diu khatni zaatc mpeyna tuang pu sw diu. 4Abraham ta suaihiamloumei kumcna kamei rui nang ta khatni nang kikta ta suaihiamlou diu, kumna ntaw nang nggin swna lungc bammei khatni Ravguangc rui Abraham khou tiilou kanmei mi kandic hei nang tuang sw diu!”#Tha 17.4-8 5Heikumna Isak rui Jakob ta thouc ganclou kan the. Kumna Jakob rui Bethuel nac mpouh Laban kapui chaicbungc daeng thangc tat kan the.

Esau Now Kathanh Kaw Datmei

6Kapu Isak rui Jakob ta suaihiamlouna kanow phu khang Mesopotamia thangc thouclou kan the khatni Kanaanmei luc ta thu kaw nuh mak ge twna kadylou kanmei ta Esau rui thaylou khwan the. 7Jakob tei kapui kapu lat piuna Mesopotamia thangc tat kan the twmei Esau thay the. 8Kapu Isak rui Kanaanmei luc ta kahaw mak ge twmei Esau rui thay lana 9kamei Abraham nac mpouh Ismael daeng thangc tatna kanac aluhpui Mahalat twmeipui, Nebaiot tanpui ta kaw dat the.

Bethel khou Jakob Mang Manvmei

10Jakob tei Beersheba ta mpatlouna Haran nzwanna tat kan the. 11Neihkey pwkhou kamei kabamv akhat khou guang tangcna khou tei ziplou the. Ntauhbut akhat khou kapy mbanna kamei zipri tat the. 12Khoutei kamang thangc kailaak akhat kandih khou rui tingkauh phian tangclouna mi khou tei baanchara nunc key key ku kuna kalw bammei ta how the.#Jhn 1.51 13Kailaak twan khou tei Ringhpouc, ding bam khwan e. Kamei rui sa the, “Ai hei Ringhpouc, nangpu nangpouc khatni Isak Racguangc e. Ai rui nang zip bammei kandic hei nang khang khatni nang tuang kikta khang tii puni.#Tha 13.14,15 14Kaniw tei kandih khou naimei taniang thw zu lungckingc kiuc pat puni. Kaniw ramv tei kakwn padeih daic pat puni, kumna nang khatni nang tuang kikta paan rui ai rui zaatc kaguayna ta suaihiamlou puni.#Tha 12.3; 22.18 15Zauclo, nang tatloupui bamv kathuic khou ai rui nang ta lamluailou puni khatni gaeklou puni, kumna ai rui nang ta mi kandic khou hei nduangh guanglou dat puni. Ai rui nang khou nrianhloumei guay hei taanclou mak saanv ai rui nang ta mpatlou lak ge.”

16Jakob rui zip thauna kumna sa the, “Mi khou hei Ringhpouc bam e! kamei mi bamv khou hei bam e twmei ai thay mak khwan e!” 17kamei ping the kumna sa the, “Mi hei adihkamv kha meic pingpui bamv cho! Mi hei Ravguangc kai kan di the; mi hei tingkauh raenghmun kan di the.”

18Jakob tei lauthwan thwanzingh zip thauna katuang pyban tauhbut tei laana kamei rui hei tei ningtow tauc swna lingclou the. Kamei rui mi khou tei Olive thauc liclouna hei tei Ravguangc khou kat gutlou the. 19Kamei rui mi bamv zanc tei Bethel twna kaw the. (Hei tei rey khou Luz twmei kaidai tei e.) 20Khoutei Jakob rui Ringhpouc khou latdyng akhat swlou the: “Ai rui tat bammei chaengkaamv khou hei nang rui lamluailouna ata gaeklou e thei khatni tuzangv khang khatni nsuay mbaanv khang tiilou pw e thei, 21ai gayna apu kai khou guang dat tangc e thei nang ta aRavguangc sw puni the. 22Mi ningtow tauc lingcloumei bamv hei nang ta kalummei bamv sw puni the, kumna nang rui akhang tiiloumei kapwm tuang kadam ruh tuang akhat tei nang khang tii puni the.”

Currently Selected:

THAUREYMEI 28: RONGBSI

Highlight

Copy