THAUREYMEI 27

Isak rui Jakob khou Suaihiamloumei

1Isak tei ntaw thu karapouc keyna kamik how mak khe. Kanac gaanvthaihmeipu Esau ta kadaeng khou kaw guangna sa the “Anac mpouhle.” “Ai bam e” twna kamei rui daw the.

2Isak rui sa the, “Ntaw thu ai hei karapouc di the, tabui nungc ai theic puni cho thay mak khe. 3Nang sauhpai sinna nwmbangc tatna khouringh laaguang o. 4Kumna ai rui kahawmei gan thiak suangcna akhang laaguang o. Ai hei tei tuna ai theih mak khou nang khou tii nimei nkhamhmei suaihiam tii puni the.”

5Isak rui Esau khou kumna sa bammei tei Rebekka rui nking bam khwan e. Kumna Esau tei nwm thangc asanh alay tat khang tat kanmei tangv, 6kamei rui Jakob khou sa the, “Nang pu rui Esau khou sa bammei tei ai chu the 7Asanh laaguangna akhang suangclou o. Kumna hei tei tu lana ai theih mak khou Ringhpouc hu khou nang khang atuang suaihiam tii puni the,” 8Kumna abungle, ai samei hei nking o, kumna hei tei taanc o. 9Ziuh pang thangc tei tatna kameigaymei kanei nym guang tho, kumna nang pu kahaw liangmei gan thiak ai rui suangclou puni the. 10Hei tei nang rui kakhou laaguang titho, kumh e thei kamei theih mak khou katuang suaihiam nang khang tii puni the.

11Jakob rui kapui khou sa the, “Esau thu kahiw thungh thung dai, ai thu ahiw maek. 12Apu rui ata kathupcna ai rui kata guat bam tu e twmei thay pat pwng de; kumna apu rui Suaihiamloumei phaan sianglou pwng de.”

13Kapui rui daw the, “Abungle, nang khou siangloumei syang guay tei akhou keylou kan diu, ai rui samei hei taanc rap do, ziuh kiu nym tat tho.” 14Kumna kamei rui tatna ziuh kanei laaguang the. Kumna kapu rui kahaw liangmei gan thiak kapui rui suangclou the. 15Hei tangv tei Esau tuang pheybaan gay liangmei kapui kamei rui kai khou loumei tei Jakob khou piulou the. 16Kapui rui ziuhgic tei laana kabaancpwam khatni kahiw maekmei kaguang khou tei thuaplou the. 17Kamei rui suangc chuyloumei gan khatni kamei rui kasiamhloumei ntyan tei kakhou tiilou the.

18Khoutei Jakob tei kapu daeng khou guangna “Apule” twna kaw the. “How, nang thow cho?” twna kapu rui daw the.

19Jakob rui daw the, “Ai hei nang nac gaanvthaihmei Esau tei the; nang rui samei tei taanclou the. Thau dungcna nang khang suangcloumei asanh zanc gan hei tu tho, kumna nang tuang suaihiam akhou tiilou tho.”

20Isak rui sa the, “Anac mpouhle, adih katumcna nang khang mi kiu ariwna cho?”

“Ringhpouc nang Racguangc rui nkhavlou tina the,” twna Jakob rui daw the. 21Isak rui Jakob khou sa the, “Guang ana maih o, nang kiu Esau changh di ny kahi zauc nii e.” 22Jakob tei kadaeng khou guang ana pwkhou, kamei rui kata kathupc lana sa the, “Nang khwan hei thu Jakob khwan kumh e, tiki nang baancpwam hei thu Esau baancpwam kumc e.”

23Kabaancpwam tei Esau baancpwam kumcna kahiw thungh thung tina kamei tei Jakob ta thay pat ngam mak khe. Kamei suaihiam tii puni the, 24tiki “Nang hei Esau changh dai cho?” twna thanv dat re.

“Ai kiuc de” twna kamei rui daw the.

25Isak rui sa the, “Gan kiu laaguang tho. Tu lana atuang suaihiam tiilou puni the.” Jakob rui hei tei kakhou laaguang the, kumna kamei tu the. Zangv khang ni drakhadui laaguang the kumna kamei zangv the 26Mi tangv tei kapu rui kakhou sa the, “Anac mpouhle, guang anana ata kaput ro.” 27Kumna kata guangna kaput the. Khoutei Isak rui kapheybaan rym tei huy the kumna kamei rui katuang suaihiam tiilouna sa the, “Anac mpouh rym hei Ringhpouc rui suaihiamloumei nwmbangc rym namh the.#Ibr 11.20 28Ravguangc rui tingpuk thangc rui zikdui tiikeyna, nang tuang ramvdui tigaylouna, nang khang nap-bi tithuihlou diu tho! 29Zaatc baihmei nunc rui nang siamruai sw diu, meic nunc rui nang hu khou nkhum key diu. Nang hei nang chana nunc ruc khou kaipouc sw di tho, khatni nang pui nac nunc rui nang hu khou nkhum key diu tho. Nang ta siangloumei nunc ruc khou tei syang keylou kan diu tho, khatni nang ta suaihiamloumei nunc tei suaihiam laatow kan di tho.”#Tha 12.3

Esau rui Isak tuang Suaihiam Neymei

30Isak rui suaihiam tiilou tangna Jakob tei tatpat rap kanpui lev, kachaic Esau tei khouringh alay tatmei khou rui guang dat the. 31Kamei ni tugay zangvgaymei suangcna kapu daeng khou laaguang the. “Apule, thau dungcna ai rui nang khang suangc guangmei asanh zanc gan hei tu zauc tho,” twna kamei rui sa the. Kumna nang tuang suaihiam kiu tiilou tho.

32“Nang thow cho?” twna kapu Isak rui thanv the.

“Nang nac nareimei Esau the,” twna kamei rui daw the.

33Isak tei kadunh kathanh thau the, kumna sa the, “Kum e thei, khouringh swluaina akhang laaguangmeipu tei thow dina cho? Ai hei tei nang guang nimei hu khou na tu tang rap di the. Atuang nkhamhmei suaihiam tei kakhang tii kan the, kumna tingsaengzaeng hei tei kakhang di the.”

34Esau rui hei tei chu pwkhou, kapranv sihna kalung kabiuna kap the, kumna sa the “Apule, nang tuang suaihiam tei akhang ni tiilou o!”

35Tiki Isak rui sa the, “Nang kainac rui guangna ata guat the. Nang tuang suaihiam tei kamei rui laa kan the.” 36Esau rui sa the, “Kamei rui ata guatmei mi hei rui kaneimei the. Kazanc Jakob twna kawmei hei nchumh rap di the. Nareimei ai rui laa nimei dam tei kamei rui laa kan the, ntaw ni kamei rui atuang suaihiam laa dat kan the. Akhang suaihiam daekloumei tuang maek khena cho?”#Tha 25.29-34

37Isak rui daw the, “Ai rui kata nang ruc khou kaipouc tiswlou tang the, khatni ai rui kachana nunc ta tei kabangc tiswlou tang the. Ai rui kakhang nap-bi ni tiilou tang the. Anac mpouhle, ai rui nang khang tiilou dat khang ramh baihmei maek khe cho!”

38Esau rui kapu khou huayna sa dat re, “Apule, nang tuang suaihiam akhat na dina cho? Apule akhou ni suaihiamlou o” twna kamei kahik kahikna kap the.#Ibr 12.17

39Khoutei Isak rui kakhou sa the,

“Nang khang thu tingpuk tuang tingdui maek khe,

taanctu ruaictu simei bamv khou nang lungc puni the.#Ibr 11.20

40Nang tuang buy-baeng paan rui nang lungc puni the,

tiki nang hei nang kainac siamruai sw puni the,

kum sini nang rui rih thau pwkhou kangamv bangc khou rui nang duak puni.”#Tha 36.8; 2 Gu 8.20

41Kapu rui Jakob khang suaihiamlou kan tina Esau rui Jakob ta zauczih the. “Apu khang rui zaengsi nimei tingmik ana the; mi tangv kiu rui Jakob ta ai swluai puni” twna kamei kakhanh the.

42Rebekka khou rui Esau tuang lat tei chu pwkhou, kamei rui Jakob ta kaw guangna sa the, “Zauc lo, nang chaic Esau rui nang ta swluai khang sw bam the. 43Kumna abungle, ai rui samei kumcna sw tho. Katumcna Haran thangc apuningc Laban daeng thangc tat tho. 44Nangchaic hei kalungpuam nchu key datna nang rui kakhou taancloumei tei amuc kan mak saanv kadaeng khou bam kanak tho. 45Nang ta kawdat khang ai meic thouc guangdat puni e. Tabui swna nangney neih khat na khou rui theic nchamc bam nina cho?”

Jakob ta Laban Daeng Thangc Thoucloumei

46Rebekka rui Isak khou sa the, “Mi Esau now, zaatc baihmei luc zaeng khou hei rui ai hei lungc sini lungc bam ni mak khe. Jakob hei rui ni Hittimei luc ta kaw dat re thei mu ai akumhna lungc nina cho!”

Currently Selected:

THAUREYMEI 27: RONGBSI

Highlight

Copy