THAUREYMEI 26

Isak Gerar khou Lunghmei

1Abraham ganv khou guangmei tei hamhna baihmei nap nkowmei akhat ni mi kandic khou guang dat khwan e. Isak rui Gerar khou bammei Philistinmei guangc Abimelek daeng thangc tat the. 2Khoutei Ringhpouc rui Isak khou guangna sa the, “Izip thangc tat riu; ai rui bam o twna saloumei kandic khou hei lungc bam o. 3Mi khou hei bam o, kum e thei ai rui nang ta lamluailou puni khatni suaihiamlou puni. Ai rui mi ramv kaguay hei nang khang khatni nang kikta khang tii puni. Ai rui nang pu Abraham khou swlou kanmei latdyng tei ti-nthuihlou puni.#Tha 22.16-18 4Nangkik nangta tingpuk khou nai bammei gaanchuangcna zu tigeiclou puni kumna mi kandic kapwm hei ai rui kaniw khang tii puni. Nangkik nangta paan rui kandihmei zaatc guay rui suaihiam laatow puni. 5Abraham rui alatdyn khatni alatdanv guay piumei zaeng rui suaihiamlou puni the.”

6Kumna Isak Gerar khou lungc bam khwan e. 7Mi ramcmei tei rui kanow lam khou thanv pwkhou, kakainac de twna daw khwan e. Meic nunc tei rui Rebekka ta laa khang rui kata swluai pwng e twmei ping lana Rebekka ta kanow e twna kamei sa mak ge. Kalam thu Rebekka tei kalwn kachav gay khwan e.#Tha 12.13; 20.2 8Isak khoutei lungc kanak bammei tangv, guangh Abimelek rui katuang kailat khou rui zauc pat pwki Isak lev Rebekka nzianna bammei ta how the. 9Abimelek rui Isak ta kaw guangna sa the, “Kamei nang now diki, tabui swna kamei nangtanpui de twna sa tu cho?” “Kamei anow e twna sa ti thei ata swluai pwng e twmei ningmei zaeng rui the,” twna Isak rui sa the.

10Abimelek rui sa e, “Nang rui aniw khou sw bammei hei tabui tuang cho? Amei nunc rui nang now ta lungcmaanvlou e thei mi khuay tei nang rui aniw ruc khou tiguang nimei tuang e.” 11Abimelek rui meic guayna khou latdanv swna sa the, “Thow pwni mipu hamh e thei kanow ta kahiloupui mei ta tei swluai puni.”

12Isak rui mi kandih khou tei nap-bi lingckeyna mi kwm tei lingc keyloumei dam 100 tay guang the. Kalam thu Ravguangc rui kata suaihiamlou the. 13Kamei lungcku hay hayna lungcgay sihmeipu sw the. 14Katuang lauziu pang, guaih pang, khatni katy-kabangc mpeyna nai timei zaeng rui Philistinmei nunc rui kata mamav the. 15Kumna Abraham ringc bammei douc, Abraham bangc nunc rui khiaucloumei duikhunc guay tei zu tu nuh mak khang Philistinmei nunc rui kakuam diatlou the.

16Khoutei Abimelek rui Isak khou sa the, “Aniw kandic khou rui tatpat kan tho, nang aniw ta lungczyn guang the.” 17Isak khou tei rui tatpatna Gerar tuang nzaengc khou lungc khanvlou the. Hei khou tei kamei lungc kanaklou the. 18Abraham rui khiauclou duhmei, Abraham theic kanmei tangv Philistinmei nunc rui thingclou datmei duikhunc guay tei kamei rui khiauc dat the. Mi duikhunc guay zanc tei kapu rui phuakloumei zanc guay tei kamei rui phuaklou dat the.

19Isak bangc nunc rui mi nzaengc khou tei duikhunc akhat khiaucna dui ariw the. 20Gerarmei lauziu gaenghmei nunc lev Isak lauziu gaenghmei nunc rui “Mi dui hei aniw tuang de,” twna agay the. Kumna Isak rui mi duikhunc zanc tei “Esek” twna phuaklou the. Kalam thu kaniw rui kamei lev agay the.

21Isak bangc nunc rui duikhunc akhat ni khiauc dat re kumna mi duikhunc lam khou tei ni kaniw agay dat re. Kum tina kamei rui mi zanc tei “Sitna” twna phuaklou the. 22Kamei mi bamv khou tei rui tat datna duikhunc baihmei akhat khiauc dat the. Mi khou tei thu lat geic dat mak khe, kum tina kamei rui mi zanc tei “Rehobot” twna phuaklou the. “Ntaw thu Ringhpouc rui mi ramv khou hei latlu maekna lungh khang tiilou the, kumna khou hei aniu lungcgay chingkhiuhna lungc bam puni muay the,” twna kamei rui sa the.

23Isak mi bamv khou tei rui Beersheba thangc tat dat the. 24Mi nungc zingbangc tei Ringhpouc rui kakhou guangna “Ai hei nang pu Abraham Racguangc e. Ping riu; ai nang ta lamluailou bam e. Abangc Abraham khou ai rui nrianhlou kanmei zaeng rui ai rui nang ta suaihiamlou puni khatni nangkik ticha padiklou puni.” 25Hei khou tei Isak rui ravchabamv kasiamh thauna Ringhpouc ta kalum the. Khoutei kaniw lungc khanvlou the, kumna kabangc nunc rui duikhunc akhat khiauclou the.

Isak lev Abimelek kak khou Latdyng Swmei

26Mi dak khou tei Abimelek katuang latdinhpouc Ahuzaat khatni katuang rihpy Phikol ta nduanghna Gerar thangc rui Isak ta ariw khang guang the.#Tha 21.22 27Khoutei Isak rui thanv the, “Nangniw ata karaengna nangniw kandic khou rui ata nthau gancna tabui sw niina ntaw ata ariw khang guang tu cho?”

28Kaniw rui daw the, “Ravguangc rui nang ta lamluailou bam e twmei ntaw thu aniw thay the, kumna nang lev aniw kak khou tanhmei latdyng sw khang nai e twmei aniw ning the. 29Aniw rui nang ta sw kasiclou makmei kumcna nang rui ni aniw ta sw kasic lak ge twmei latdyng swloumei ta laa nii e. Aniw nang ta nzianlouna nang ta nchu-nrina titat dat kan tuang de. Ntaw thu Ravguangc rui nang ta suaihiamlou dyng the.” 30Isak rui kaniw tu zangv khang kasiamhlouna tu zangv nchamc the. 31Nthuanh tinggaanc pat pwkhou kaniw syangdyng swna latdyng sw the. Isak rui kaniw ta suanc patlouna kaniw neihlana ntamv the.

32Mi nungc tei duikhunc khiauc tatmei “Dui ariw the” twna guangna sa the. 33Kamei rui mi duikhunc zanc tei “Shiba” twna phuaklou the. Heikumna hei khou tei rui Beersheba kaidai zanc hei phuakloumei tuang the.

Esau Now Nei

34Esau katingkwm 40 khou Hittimei luc gaanvnei, Beeri nacpui Judit lev Elon nacpui Basemat ta kaw e. 35Kaney rui Isak lev Rebekka ta tiryanra sihlou khwan e.

Currently Selected:

THAUREYMEI 26: RONGBSI

Highlight

Copy