LATDIUTATMEI 3

Kaphay Chuanchaymeipu ta Tigayloumei

1Pitar lev Jahon, tingzyn huayneypui ganv ganvdak kathumh khou, Ravkai khou guang khwan e. 2Mi khou tei Howgaymei Chaengmun twna kawmei bamv khou, kapui bungpuak khou rui kaphay chuanchaymei bam khwan e. Kamei Ravkai khou guangmei guay khou rui ney tu bam kan khang tingmik pum mbamlou bammeipu khwan e. 3Kamei Pitar lev Jahon ni gutmei ta how lana, kaney khou ni ney the. 4Kaney rui kata zauc ndyangna, “Aney ta zauc o!” twna Pitar rui kakhou sa the. 5Khoutei ramhkhat tii pungh the twna kaney ta zauc the. 6Tiki Pitar rui, “Akhou daandi kachaekc maek ge; tiki akhou naimei ai rui nang khang tii tuang e: Nazarethmeipu Jisu Khrista zanc khou rui tat tho!” twna sa the. 7Kumna Pitar rui katuang baanzat baanc sinna kata zay thaulou the. Mi dyng khou tei kaphay khatni kaphaytyang rou titanclou the. 8Kamei ding laaph laap thauna ding the, kumna tat thau the. Kamei Ravguangc ta thuancna kachakna kaney thei Ravkai lungc khou tei lay gut the. 9Mi pu tei Ravguangc ta thuancna tat bammei tei how pwkhou, 10kamei hei Howgaymei Chaengmun khou dungcna ney tu bammeipu tei e twmei thay lana, kaniw khang tei charynmei khatni ngakmei rui padik the.

Pitar rui Ravkai khou Chamvdinhmei

11Solomon Kaisangc twna kawmei bamv khou, mi pu tei rui Pitar lev Jahon ta biancna bam khou, meic nunc tei ngak sakh sakna kaniw daeng khou pak guang the. 12Meic nunc ta tei how lana, Pitar rui kaniw khou sa the, “Isaraelmeithiu, tabui swna nangniw ngakna aney ta zauc bam tu cho? Aney pumtan rui hamh e thei aney ravning nthukmei paan rui mi pu ti hei titatlou dat tuang e twna nangniw ning nah cho? 13Abraham, Isak, khatni Jakob Racguangc, aniu pupouc nunc Racguangc rui kabangcpu Jisu tik hym tidaiclou kan the. Nangniw rui kata kandih kaipouc nunc khou tii pat kan the. Pilat rui kata mpatlou nii khwan sini, nangniw kata laa zihna kata Pilat hu khou ganc pat kan the.#Tat 3.15 14Kamei hei Nthanmeipu e khatni Ravchaptatmeipu e; tiki nangniw rui kata ganc pat lana, meicdowmeipu ta mpatlou khang nangniw rui Pilat khou ney kan the.#Met 27.15-23; Mrk 15.6-14; Luk 23.13-23; Jhn 19.12-15 15Ringhmei tiiloumeipu ta nangniw rui swluai kan the; tiki Ravguangc rui tiringcthaulou dat kan the. Hei tei thaymei nunc kiu aniw hei the. 16Mi kaphay chuanchaymeipu ti hei tigaylou datmei hei mi pu zanc tuang pumtan rui e; nangniw rui how bammei, mi pu ta tigayloumei hei Jisu khou lwmloupui paan rui e.

17“Chana nuncle, nangniw khatni nangniw tuang kapy nunc rui Jisu khou swlou kanmei tei thay lamc makna sw kan tuang e twmei ai thay e. 18Khrista hei ryanra khaengv puni twna Ravguangc rui muhzwng nunc mwang khou rui dinc kasuakc guang kanmei tuang the. Hei tei kamei rui tiguang nthuihlou kanmei tuang the. 19Nangniw paap guay thut maanlou khang, nangniw lungh laicna hanc guang dat ro. 20Kum pwkhou, chaengh tiringclou datpui ganv Poubauhmei khou rui tii guang puni, kumna nangniw khang rui suangloumei Khrista Jisu ta kamei rui ndiu guang puni. 21Ravguangc rui reydouc langloumei katuang nthanmei muhzwng nunc mwang khou rui dinc kasuakcloumei kumcna, ramh guayna damc kathanc dat nimei ganv kiu guang mak saanv, kamei tingkauh thangc bam puni. 22Mousi rui mi kumna salou e: ‘Poubauhmei nangniw Racguangc rui nangniw pang khou rui ata kumcna#ata kumcna; hamh e thei ai kumhmei muhzwng gaanv khat ta nangniw khou ndiu guang puni. Kamei rui samei guay tei nangniw piu nina e.#Ria 18.15,18 23Mi muczwng lat tei piu makpui mei ta tei Ravguangc mei pang khou rui swmaan puni.’#Ria 18.19 24Samuel khatni katangv thangc guangmei Ravguangc lat dinhmei muhzwng nunc rui ni ntaw pat bammei lam khou hei dinc kasuakclou the. 25Ravguangc rui katuang muczwng guay khou rui nrianhloumei guay tei nangniw khang e, khatni ‘Nang kikta khou rui ai rui kandihmei maansei guay ta suaihiamlou puni,’ twna Abraham khou nrianhloumei tei nangniw khang ni e.#Tha 22.18 26Hei zaeng rui, nangniw kathuic nangniw tuang simei chaeng khou rui ngalanc guangna suaihiam laa kan khang, Ravguangc kamei rui kadahloumei kabangc pu ta nangniw khou ndiu guang rey tuang the.”

Currently Selected:

LATDIUTATMEI 3: RONGBSI

Highlight

Copy