LATDIUTATMEI 2

Bumaengh Nthanmei Tii Keymei

1Pentikost tingmik tangc pwkhou, kaniw kabamv akhat khou guang kaduai bam khwan e.#Lev 23.15-21; Ria 16.9-11 2Khoutei thay mak liangna, tingpuk thangc rui puanzingh ranvmei khwan kumcna khwan akhat keyna, hei tei rui kaniw dungc bammei bamv kapwm tei padik the. 3Khoutei baley kumhmei maibwang kumhmei pang how the; kumna mi guay tei phak patna kaniw kathuic khou towlou the. 4Kaniw guayna Bumaengh Nthanmei rui padik the; kumna Bumaengh tei rui tisalou tina, kaniw lat baih baihmei sa thau the.

5Kandih baih baih thangc rui guangmei ravning nthukmei Jihudimei meic mpeyna Jerusalem khou lungc bam khwan e. 6Mi khwan tei chu lana, kaniw meic kangdai guang kaduai the. Kumna mi khou tei kaniw rui sa bammei lat guay tei kaniw khang kalat kalat khou chu pwkhou, kaniw ngak the. 7Kaniw khang ngakna sa the, “Mi khou lat sa bammei nunc hei Galilimei nunc hamh nah cho? 8Akumh tina kaniw rui sa bammei lat hei aniu kathuic karamc karamcmei lat khou chu bam tu cho? 9Aniu hei Parthia, Media, Elam, Mesopotamia, Judia, Kapadokia, Ponta, Asia, 10Phrugia, Pamphulia, Izip khatni Kurini daeng khou naimei Libia ramv guay khou rui guangmei nunc de. Aniu gaanvsaekc rui Rom thangc rui guangmei Jihudimei khatni Jihudi guanhmei nunc de. 11Gaanvsaekc rui Krit khatni Arabia khou rui guangmei nunc de. Tiki Ravguangc rui taanvdaih taancloumei lam khou kaniw rui sa bammei ti hei, karamc karamcmei lat khou aniu chu the!” 12Kaniw ngak the khatni kabah thay tangc ngam mak la thena, “Mi hei tabui tuang khang lana cho?” twna kaniw khat khat khou thanv the.

13Tiki kaniw gaanvsaekc rui mi nunc ta tei sinnuina, “Kaniw zouh zangv mba lana de,” twna sa the.

Pitar rui Chamvdinhmei

14Khoutei Pitar ziap ruhna akhat tei lev dingthauna, kauc ranvna meic kangdai khou tei sa the: “Jihudimeiputhiu khatni Jerusalem khou lungc bammei nangniw guay, alat nkinglou o. Mi lam khou hei ai rui salou puni. 15Nangniw rui ningmei kumcna mi nunc hei zouh zangv mba lana hamh e; ntaw laukhwan ganvdak chakiu na di he. 16Mi hei muhzwng Joel rui mi kumcna saloumei tei e:

17‘Ravguangc rui sa e:

Nkhamhpui ganv khou ai rui atuang Bumaengc

meic kathuicna khou bun keylou puni.

Nangniw nac mpouh aluh guay ravmundinc puni;

alauc nunc rui ndawman how puni,

gaanvthaih nunc rui mangmanv puni.#Jol 2.28-32

18Ngguay, abangcpui,

abangcpu guay khou,

mi ganv khou kiu abumaengc bun keylou puni;

mi khou kiu kaniw ravmundinc puni.

19Ai rui tingpuk khou charynmei taanv taanclou puni,

kandih khou sw-nchinmei taanv lyanlou puni:

zei, mai khatni maikhou dai tihow puni.

20Poubauhmei tuang daihmei

khatni hymdaihmei tingmik guang makmei hu khou,

neihmik zingc puni,

bw zei kumcna haengc puni.

21Mi ganv khou kiu,

Poubauhmei ta kawpui mei ta kanlou puni.’

22“Isaraelmeithiu, mi lat hei nkinglou o: Ravguangc rui kata charynmei khatni sw-nchinmei taanv mpeyna nangniw pang khou titaanclou khwanmei Nazarethmeipu Jisu hei Ravguangc rui ndiu guangmeipu e twmei lyanlou kanmei tei nangniw thay the. 23Ravguangc kamei rui thayna raengcloumei katuang raeng thei layna, Jisu ta nangniw baanc khou tiilou khang Ravguangc rui swlou tina, nangniw rui kata kariak tat makmei nunc baanc khou tiilouna, kros khou swluai kan the.#Met 27.35; Mrk 15.24; Luk 23.33; Jhn 19.18 24Tiki Ravguangc rui kata theihmei ramrianra khou rui tiduaklouna tiringcthaulou kan the. Kalam thu theihmei rui kata bangclou bam ngam mak ge.#Met 28.5-6; Mrk 16.6; Luk 24.5 25David rui kalam khou mi kumna salou e:

‘Ai Poubauhmei ta ahu khou how tanh tan e;

kamei adaeng khou bam e,

kumna ai ryanramei ariw lak ge.#Kal 16.8-11

26Kumna alung neihlamei padik ge,

akhou neihlamei lat padik ge.

Kumna ai hei theic nimei maansei khwan sini,

lwmgayna zaeng nthaekc bam ni.

27Kalam thu nang rui ata taruaih khou ganclou lak ge;

khatni nang khou lungh gutmei bangcpu ata tarou khou titaamclou lak ge.

28Ringhmei khou zayloumei chaeng,

nang rui akhou lyanlou the;

kumna nang bammei rui ai neihlamei padik puni.’

29“Achanathiu, aniu pupouc David lam khou nthanna ai rui sa nimei thu: kamei theic kan the kumna katuang tarou aseic nganvna aniu daeng khou nai bam e. 30Kamei muhzwng akhat re, kumna Ravguangc rui kakhou nrianhloumei tei kamei thay e—Ravguangc kamei rui David kikta gaanv khat ta David tuang guangcbamv khou tidungclou puni twna ntipmei latryan swlou khwan e.#Kal 132.11; 2 Sa 7.12-13 31Thei thangc guang nimei ta kamei how e, kumna ‘kata taruaih khou ganclou mak ge; kapumc tarou khou taamclou mak ge,’ twna Khrista ringcthau nimei lam khou kamei rui salou e. 32Mi Jisu ti hei Ravguangc rui tiringcthaulou kan the; mi kiu howmei kiu aniw hei the. 33Kata kapu Ravguangc tuang baanzat khou zay kauh thaulou the, kumna kamei rui nrianhloumei Bumaengh Nthanmei tei kapu khou rui laa the. Nangniw ntaw chu bammei khatni how bammei hei kamei rui aniu khou bun keyloumei katuang kaipat kiu the. 34Tingkauh thangc kumei kiu David kamei hamh e; kamei rui mi kumcna salou e:

‘Poubauhmei rui aPoubauhmei khou sa e:#Kal 110.1

35Nang ta zauczihmei nunc ta nang phaypav bangc khou ai rui tiniibinlou mak saanv,

nang abaanzat khou dungc bam o.’

36“Hei zaeng rui, Ravguangc rui Poubauhmei khatni Khrista tiswloumeipu kiu nangniw rui kros khou thaengcluai kanmei Jisu tei the twmei, Isaraelmei nangniw thay o.”

37Meic nunc tei hei tei chu pwkhou lungh kabiu the, kumna “Chanathiu, aniw tabui sw nina cho?” twna Pitar khatni baihmei latdiutatmei guay khou tei sa the.

38Pitar rui kaniw khou sa the, “Nangniw paap guay kuaklou khang, nangniw lungh laicna Jisu Khrista zanc khou duilup bo; kum pwkhou Ravguangc tuang kaipat, Bumaengh Nthanmei tiilou puni. 39Kalam thu Ravguangc kamei rui tii ni twna nrianhloumei hei nangniw khang, nangniw nac nunc khang khatni duh thangc bammei Poubauhmei Ravguangc rui kakhou guang khang kawloumei guay khang ni e.”

40Kumna lat baih baihmei mpeyna ni salouna, “Mi meicsimei nunc khou keylou nimei dandi khou rui pak duak la tho,” twna Pitar rui kaniw ta katiu the. 41Kaniw meic mpeyna kalat tei lwm the, kumna duilup the. Mi nungc tei meic ching thumh dou kaniw phwam khou haaplou the. 42Kaniw tei latdiutatmei nunc rui nchamloumei khou, phwam kariumei khou, tu zangv kariumei khatni huayneymei khou lungh gutna bam khwan e.

Lwmmei nunc tuang Panty

43Charynmei taanv khatni sw-nchinmei taanv mpeyna latdiutatmei nunc tei rui taanc lyanlou bam khwan e; kum tina meic guayna ping karim bam khwan e. 44Lwmmei guay tei maniatna lungc bam khwan e khatni kaniw tuang nai naimei meic mathiucna tuang swna piu bam khwan e.#Lat 4.32-35 45Kaniw tuang nai naimei zuancna syan tei kaniw pang khou kage nai naimei khang nzanh bam khwan e. 46Tingmik pum Ravkai khou guang kariu bam khwan e, kaniw kai guay khou tu kariu tat bam khwan e, kaniw neihlana khatni tii niina tii patna tu zangv kariuna bam khwan e. 47Ravguangc ta thuancna lungc bam khwan e, khatni meic guay rui kaniw ta kasyan kahawna bam khwan e. Kumna Poubauhmei rui kaniw pang khou kanloumei laamei nunc ta tingmik pum haaplou bam khwan e.

Currently Selected:

LATDIUTATMEI 2: RONGBSI

Highlight

Copy