MARK 16

Jisu Hangneng-keshagha

(Mat 28.1-8; Luk 24.1-12; Jhn 20.1-10)

1Sabbath tsathang kecen seng wi Magdalen Maria, James jja Maria, nu Salome hathu na handemvu sen wa Jisu kamang nyen cüle sa. 2Apvüwa tsathang wi aghani shhugho meyi mathu na ashüjjen wi wa. 3-4Alenca wi mathu na khokho wi khi, “Thowa na ikhang ghena ashüjjen wi alon tsü kulupheghe thsüa nu?” (Tsüna alon keti kesü.) Isanu mathu na wa ghangchi nan alon tsü kulupheghe kethengla muya. 5Tsalina mathu na ashüjjen wi wha nan anyi pvünyi kesü na athsümeni kemiki pvünu ajewa donki keben muya nu mathu na amansa.

6Ma mathu wi khi, “Nmessi lalo, hi nthu na Nazareth nyiwa Jisu pi kross miwi jen kesawa tsü bhaden kesa chüben. Ma he wi nmi, ma hangneng-shaghadha le! Ghala he wi mathu na ma pi kechi pen wi ghangchi nanlo! 7#Mat 26.32; Mrk 14.28 Wala ketsijüh ha pi sansikeyathu nu Pitor la kizalo: ‘Ma nthu wi kekiza ti nthu tuwi na Galilee wi waden, nthu ciwi ma muyaben.’ ”

8Mathu ashüjjen wina bvü wa mathu messi nu qhethiketen sa. Mathu messi ntsa sa kesalina tsü khi pi thola nkiza.

JÜHKEMEHAIWA KAGHAWEN SAKHEN KESÜ

Jisu na Magdalen Maria tuwi kegho

(Mat 28.9-10; Jhn 20.11-18)

[ 9Apvüwa tsathang wi ghanen mitu Jisu na hangneng-keshagha seng wi ma kheni ma gwo wi atsaghangthu tagü jügüshi kesawa Magdalen Maria yala ma muya thsü. 10Ma wala Jisu pvüshangthu na ahathana nu qai kebenthu tsü kiza. 11Isala mathu na Maria na Jisu hang benle nu ma Jisu muya le kekhi tsü n-nondi.

Sansikeyathu Keni Yala Jisu Mukeya Thsü

(Luk 24.13-35)

12Haseng wi Jisu na matsi makepa sala meshu keni diyyiwa wi wa keten alenca wi ma muya thsü. 13Manyi na kheneng gho kepathu wi kiza, Isala mathu na tsü la n-nondi.

Jisu na Taghakhen tuwi kegho

(Mat 28.16-20; Luk 24.36-49; Jhn 20.19-23; Kek 1.6-8)

14Asakhenwa, Jisu na sansikeyathu Taghakhen yala mathu dsajjü keben wi ma muya thsü. Ma mathu kha kepaghenanye mathu na ma hangneng-keshagha seng wi ma mukeyathu jüh tsü n-nondi nu leben-dhu. 15#Kek 1.8. Ma mathu wi khi, “Ayyi maben wi wa nu ajühkemehaiwa pi ayyi nyi tsüdila sansilo. 16Thowa na nondi nu baptaiz saya khe ma hangsha yaben, thowa na n-nondi khe pi shü thsüaben. 17Kenondithu amankesa kuliya kemehai kekhang pi cüden: mathu na inyan wina atsaghangthu jügüshi; mathu na ajüh ketheü khi; 18keujüla mathu na amaghangthu zankiya nyelela aji jjüya lela mangla sa nben; mathu kwen chang pi kesakinaathu miwi chithu tsüthu na mehai yaben.”

Tang wi Jisu Ssiki kesa

(Luk 24.50-53; Kek 1.9-11)

19 # Kek 1.9-11. Apvüwa Jisu na mathu ssinu keccüneng seng wi tang wi ma ssiki nu Anyiza kwen ajewa donkiwa. 20Sansikeyathu na apen tsüdi wi wa nyu sansi, nu Apvüwa na mathu ssinu kuli nu mathu jüh tsüna atsentsa le kesa amankesathu kuli.]

KAGHAWEN SAKHEN KEPA KESÜ #16.20: Zhükechithu nu Kheni zhükemilithu pahan wi Jükemehaiwa Sakhen kesei mithon wi milute kesa ha ben (vers 9-20).

[ 9Nzathu na Pitor nu ma pvüshangthu wi wa nu pi mathu kekiza cüki tsüdi khi pi mathu kiza. 10Haseng wi Jisu na kemetha nu anuphan hangben keten hangshakeya ketsijüh ghena ma sansikeyathu kesunshi pi nishu na wa nidu tsüdi wi chia.]

Currently Selected:

MARK 16: RENGNBSI

Highlight

Copy