MARK 15

Jisu na Pilat Tuwi kewa

(Mat 27.1-2,11-14; Luk 23.1-5; Jhn 18.28-38)

1Ghanenwa mitu na keqhaikedi ntsathu na kaghajila keshenpfüthu, Ayenkesansithu, nu keshenpfü kemehu maben ssinu keccünengli. Mathu na Jisu bhenya nu ssi wa Pilat kwen wi chicüa. 2Pilat na ma wi keü. “No Judah nyi Kadimiwa tsü kwe?” Jisu na luneng, “No khichidha.”

3Keqhaikedi ntsathu na pala kejon khi pi Jisu kimenni ben, 4tsalina Pilat kheneng ma wi keü, “No mathu lunengchi nten kwe? Mathu no kimenni keben jühthu tsü kina chilo!”

5Isala Jisu na ajüh kesütanla nkhila, tsalina Pilat na amansa.

Jisu Pi shü Thsülo Kekhi

(Mat 27.15-26; Luk 23.13-25; Jhn 18.39—19.16)

6Shhukeya Kho tsüwi Pilat na anyithu na ma wi kekhiewa atssüzü kesü lisha chicü keten tsü pi ayen saden. 7Tsü tsüwi Barabba na nyu pathi kesalina atssüzüjjen wi anyi nkemehaithu gweghe ben. 8Anyitenti na saghuya nu Pilat na kheni sa kegho ti mathu kenenwa tsü sa cülo khie. 9Ma mathu wi keü, “Hi nthu ghena Judah nyi Kadimiwa tsü lishachi thsü mvuben ma?” 10Kepaghenanye ma keqhaikedi ntsathu na anyonkisa wina Jisu ghan pi ma kwen wi chitheng kesa chütha ben. 11Isala keqhaikedi ntsathu na anyithu kechüchi pi Pilat ya mathu ghena Barabba lisha chicülo kesa khie thsü. 12Pilat na anyitenti wi keü neng, “Isathu hi anyi kesü nthu na pi Judah nyi Kadimiwa le ci ketenwa tsü pi khati sa thsü mvuben nu?”

13Mathu na jisha nu “Ma pi kross miwi jenlo,” isa khi. 14Pilat na “Isala ma mangwa sazzi theng nu? isa keü. Mathu na tsü miwi misiki magha nu “Ma pi kross miwi jenlo,” khi.

15Pilat na anyitenti kenenwa sa mvu kesalina mathu ghena Barabba lisha chicüa. Tsaseng wi ma Jisu kihhe cü nu ma pi kross miwi jenlo kesa khuchia.

Süpahithu na Jisu Nankeqhe

(Mat 27.27-31; Jhn 19.2-3)

16Süpahithu na Jisu ssinu ahng jjen ccühha wi du nu süpahi khang kepathu tsüdi cighu chi. 17Mathu na athsü kenmie pi Jisu pvü thsü nu aghazüthu pi aliwen sa pi ma li wen cü. 18Tsaseng wi mathu na ma shalom sa nu “Judah nyi Kadimiwa kesie kahangwa salo,” isa khi. 19Mathu akhhatssü pi ma li wi kihhe, ma meshuki, nu ma tuwi akhhutsüdu. 20Mathu na ma kekimenni tsü sacen theng nu ma gwo wi athsü kenmie tsü khusha nu ma thsü pi ma pvü neng thsüa. Isanu mathu na ma ssinu kross miwi jenle bvüa.

Jisu pi Kross Miwi Kejen

(Mat 27.32-44; Luk 23.26-43; Jhn 19.17-27)

21 # Rom 16.13 Mathu na alenca wi anyi kesü diyyi kepa wina anyunutiwa wi gho keten ma nyan Simon tsü metuya, nu süpahithu na ma meten pi Jisu kross pvü thsü. (Simon na Kuren wina kegho ma Alexander nu Rufu manyi ba.) 22Mathu na Jisu ssinu apen kesü Golgatha, ma jjügi “Aligü pen,” kesa wi tsü wa. 23Mathu ciwi kisengtssü mirr pi kesaghu pi ma jjü thsüle sa, isala Jisu na tsü jjü meyala. 24#Zak 22.18 Tsaseng wi mathu na ma pi kross miwi jen nu ma thsü pi thothu ji saten khe mathu jawi akezen sa nu pi gishüya. 25Aghanen amighe tugu kekihhe jüwi tsü mathu na ma pi kross miwi jen. 26Ma kekimenni jüh na hati: “Judah nyi Kadimiwa.” 27Mathu na kaghanfü nyi meshu keni pi Jisu gweghe kesü pi ajewa nu kepawa pi tavüwa jen. 28#Isa 53.12 Hatinu ntsawajüh na khi kebenwa tsü sacenya, “Ma pi kesami nyithu gweghe ketizen sa thsüdha.”

29 # Zak 22.7; 109.25; Mrk 14.58; Jhn 2.19 Anyi ciwi wa ketenthu na mathu li kejen pi hoholo Jisu nankeqhe nu khi, “Aha! No Kekinyijjenwa tsü yasa nu ghanan kecheng jü tsü sa neng tendha man! 30Khili no ketanla no hangshaya nu kross miwi na dugholo.”

31Tsü makesü keqhaikedi ntsathu nu Ayenkesansithu la Jisu nankeqhe nu khokho wi khi, “Ma nyu kepa wi hangsha yaben, isala ma ketanla ma hangsha meya le! 32Ikhang na khili Messiya, Israel kadimiwa na kross miwi na kedugho ghangchi na, isathu ikhang na ma nondi yaben.”

Nu pila Jisu gweghe kross miwi jen ketheng keni la ma kimenni.

Jisu Keshü

(Mat 27.45-56; Luk 23.44-49; Jhn 19.28-30)

33Amighe taghakeni na wa kecheng kekihhe kecu diyyiwa tsü mabenla jang. 34#Zak 22.1 Amighe kecheng kekihhe wi Jisu na misi ntsa maghachi, “Eloi. Eloi, lema sabachthani?” ma jjügi, “INyiza, iNyiza, no mangkesa hi teshidha nu?”

35Ciwi ngan kebenthu anyi pahan na tsü zaya nu khi, “Kinachilo, ma Elijah ciben le!” 36#Zak 69.21 Mathu meshu kesü na bvü wa akhishu ti kesa pi kisengtssü wi ten sengho achan kesü wi bhenki pi Jisu jjü thsü nu khi, “Hie ben lalo! Elijah na gho kross miwi ma pieshaya tenla nye khe ithu na ghangchi na!” 37Jisu na ahhai misi ntsa maghachi nu shü wa. 38#Bvü 26.31-33 Kekinyijjen wi ajenka keshonthsü tsü ma li na cü ma ccü kecu mezüqhe pi keni sa. 39Süpahi meza miwi kediwa na ciwi ngan nu ghang keben wi ma Jisu na khati shü khe tsü muya theng nu khi, “Ntsakhiwa anyi hawa ha Anyiza Tsawa le!”

40 # Luk 8.2-3 Nzathu pahan na temeja wi ben nu ghang ben. Mathu jawi Magdalen Maria, James ghanyiwa nu Josef manyi jja Maria, nu Salome hathu na ben. 41Mathu Jisu na Galilee wi keben wi ma nie wa nu ma kiqa cü. Nu nza Jerusalem wina ma nie keshhughothu kejonla ciwi ben.

Jisu Pi Kevhü

(Mat 27.57-61; Luk 23.50-56; Jhn 19.38-42)

42-43Minulen wi Josef Arimatheya nyi tsüna gho. Ma keshenpfü kemehu wi nyu ma nyuwakü keten nyi kesü, ma Anyiza Kadiyyi kegho tsü hie ben. Tsüna Kekiden tsathang (tsüna Sabbath tsathang tuwi,) tsalina Josef na kempvüza sala Pilat tuwi wala Jisu kamang tsü khie. 44Pilat na Jisu shüdha le kesa zakeya wi amansa. Ma süpahi kediwa cichi nu Jisu keshü matsü kesie sadhala khatinu keü. 45Ma süpahi kediwa wi Jisu na shüdha le kesa zakeya wi Josef yala akamang tsü pieshaya thsüa. 46Josef na linenthsü kesü sengho akamang tsü piesha pi mejuya nu pie wa ma alonshi wi ho ketheng ashüjjen kesü non wi tsü chia. Tsaseng wi ma alon keti kesü kulu pi ashüjjen jenka tsü khen. 47Magdalen Maria, nu Josef jja Maria manyi na ghang ben nu Jisu kamang pi khiewa vhütheng khe tsü mu.

Currently Selected:

MARK 15: RENGNBSI

Highlight

Copy