MATHI 5

Ayikha miwi Kesansi

1Jisu na anyitenti muya nu ma ayikha kesü miwi ki donkiya. Ma sansikeyathu na gho ma vüya, 2nu ma mathu zhüsansi shhu:

Atsentsa Nonkeghe

(Luk 6.20-23)

3“Aghamulen wi ketha-u le kesa kechüthu na kemihhi ntsa,

kepaghenanye tang Kadiyyi na mathu ji saden!

4 # Isa 61.2. ‘Anongü ketenthu na kemihhi ntsa,

kepaghenanye Anyiza na mathu leben satecca cüden!

5 # Zak 37.11. “Ccatssü ketenthu na kemihhi ntsa,

kepaghenanye mathu Anyiza na khishiketheng tsü muyaden!

6 # Isa 55.1-2. ‘Ketsatan ghena ghama nu dighe ketenthu na kemihhi ntsa,

kepaghenanye Anyiza na mathu ya anonkwenya thsüden!

7“Nyu nantizen ketenthu na kemihhi ntsa,

kepaghenanye Anyiza na mathu nantizen cüden!

8 # Zak 24.3,4 “Aleben kemethathu na kemihhi ntsa,

kepaghenanye mathu Anyiza muyaden!

9“Gweghe kemehaiwa ghena kuli ketenthu na kemihhi ntsa,

kepaghenanye Anyiza na mathu pi ma tsangathu le isa ciden!

10 # 1 Pi 3.14. “Ketsatanwa kekuli ghena nyu mathu metenmesha ketenthu na kemihhi ntsa,

kepaghenanye tang Kadiyyi na mathu ji saden!

11 # 1 Pi 4.14. “Nthu na isenkeniethu kesa ghena nyu na nthu kiminni, metenmesha, nu nkemehai tsüdi khi pi nthu shun lethu nthu na kemihhi ntsa. 12#2 Kc 36.16; Kek 7.52. Anonghe nu nongyalo, kepaghenanye nthu thün kemehaiwa tsüna tang wi ben. Kheni anyithu na hatinu nthu tuwi atusenjüh-kechüthu la metenmesha.

Amcü Nu Kewegü

(Mrk 9.50; Luk 14.34-35)

13 # Mrk 9.50; Luk 14.34,35. “Nthu na ayyi nyi tsüdi ghena amcü ti kesa. Isala amcü na ma kisheng nmila lethu mang la sanu tsü yala sheng neng thsüya nten. Tsüna mangla nyedha, tsalina pi khala nu anyithu na accü pi tsü cütenden.

14“Nthu na ayyi maben ghena kewegüwa ti kesa. Ayikha kesü miwi anyunuti sa ketheng tsüna kuthiya nten. 15#Mrk 4.21; Luk 8.16; 11.33. Anyi thola anni chanki pi pala khang cakhu wi chi nten, isala pi ma ketonpen wi ton nu ajjen ciwi anyi tsüdi wegüya thsüden. 16#1 Pi 2.12. Tsü makesü anyithu yala nthu kekuli kemehai mu nu nthu Ba tang wi kebenwa sengya thsüle kesalina nthu kewegü ya anyithu tuwi nwegüthu yishü.

Ayenwa Cüki Pi Kesansi

17“Hi Mosa Yenwa nu atusenjüh- kechüthu na pi kesansijüh tsü yasale ghole nmeshen lalo. Hi tsüthu yasale kesawa nyela sacenya thsüle kesalina gho le! 18#Luk 16.17. Chüyalo, atssan nu ayyi na keben chu nu pala tsüdila asakhenwa npi kesa tsü Ayenwa wi ajjügi kizza ntsawa nu keshenki kesü lela nmila saya nben. 19Tsalina anyi thowa na ayenkhukechithu jawi kizza ntsawa lela n-niela nyu kepa wi zhüsansi pi tsüti sa thsü khe ma tang Kadiyyi wi kizza ntsawa saben. Isala anyi thowa na Ayenwa tsü nie nu nyu kepa wi zhüsansi pi tsüti sa thsü khe ma tang Kadiyyi wi kedi ntsawa saben. 20Hi nthu kizaden, nthu ketsatan na Ayenkesansithu nu Farisithu miwi mehaiya ccüla nthu na tang Kadiyyi wi duya ben.

Lebenkeminu Cüki pi Kesansi

21 # Bvü 20.13; Aye 5.17. “Kheni tsüwi hati anyithu wi kekhi tsü nthu na zayadha, ‘Anyi npathi la; thowa na nyu pathi khe ma jühkaghaten ben.’ 22Isala hi khili nthu kizaden, anyi thowa na ma cünyuwa miwi lebenminu#5.22: thowa na ... lebenminu; zhükechi pahan wi ben, thowa na ajjügi nmila lebenminukhe ma jühkaghaten ben, thowa na ma cünyuwa cila ‘No kethathau’ khi khe ma ajühkekaghaten tuwi gho metsi ben, nu thowa na ma cünyuwa wi no kejüphon mangla nkenye isa khi khe ma annighajü wi tsü wa keten ghena kemessi ben. 23Tsalina keujüla nthu na aju pi kekinyipen wi Anyiza cüle kesa wi nthu cünyuwa na pala pahan ghena nthu miwi leben-nkagha keben meshenya lethu, 24aju tsü pi kekinyipen tuwi teshi theng nu wala atuwa sa ncünyuwa ssinu gweghe mehai yalo, isanu tsaseng wina gho aju tsü pi Anyiza cülo.

25“Keujüla anyi pahan na nthu ssinu ajühkaghaten nu nthu ssinu ajühkekaghatenpen wi wa lethu, ajühkekaghatenpen wi npi kedu wi matsü keben na ma ssinu kicennali tsü südhe yalo. Nthu na ciwi wa lethu, ma nthu pi pendhewa kwen wi chi, nu ma nthu pi ayenkesenwa kwen wi chiaben, nu nthu pi atssüzü sa thsüaben. 26Hi nthu kizaden, ciwi nthu na asakhenwa apisa kesü tsü la pi npi kedhikhi chu nthu na shhughoya nben.

Keqheza Cüki pi Kesansi

27 # Bvü 20.14; Aye 5.18 “Kheni ‘Keqheza nsa la’ kekhi tsü nthu na zayadha. 28Isala hi khili nthu kizaden: anyi thowa na nza kesü ghang pi ma ssiya mvuthi sa khe ma leben wina ma nzawa tsü ssinu keqheza saben. 29#Mat 18.9; Mrk 9.47. Tsalina keujüla nthu nyon ajewa na nthu sa pi sami thsü lethu tsü khushi pi khalalo! Nthu gwo tsüdi pvünu annighajü wi wa kesa tsü nthu gwo wi alen kesü nmila kesawa nthu ghena mehai. 30#Mat 18.8; Mrk 9.43. Keujüla nthu kwen ajewa na nthu sa pi sami thsü lethu tsü denthi pi khalalo! Nthu gwo tsüdi pvünu annighajü wi wa kesa tsü nthu kwen kesü nmila kesawa nthu ghena mehai.

Awubvü Keyisha Cüki pi Kesansi

(Mat 19.9; Mrk 10.11,12; Luk 16.18)

31“Hati la khitheng, Anyi thowa na ma wubvü yisha khe keyisha cüki kezhü pi ma ncüthu yishü.” 32#Mat 19.9; Mrk 10.11,12; Luk 16.18; 1 Kor 7.10,11. Isala hi khili nthu kizaden: keujüla anyi kesü ma wubvü na nkemetha nsa lela teshi, nu nzawa na kheneng n-nuwa lethu ma nzawa tsü sa pi sami thsüben, nu anyi thowa na nzawa tsü ya khe ma la keqheza saben.

Kekishen Cüki pi Kesansi

33 # Lev 19.12; Scs 30.2; Aye 23.21. “Kheni tsüwi hati pi anyithu wi kiza keten tsü la nthu na zayadha, ‘Nthu jüh khishi kethengwa tsü npakhhi la, isala Apvüwa wina nthu sale kishen kethengwa tsü salo.’ 34#Jos 5.12; Isa 66.1; Mat 23.22. Isala hi khili nthu kizaden, nthu ajüh khishi kechi wi khiela nkishen lalo. Atssan khi pi nkishen la, kepaghenanye tsüna Anyiza kadipen; 35#Isa 66.1; Zak 48.2. nyelela ayyi khi pi nkishen la, kepaghenanye tsüna ma ccü pi kennipen; nyelela Jerusalem khi pi nkishen la, kepaghenanye tsüna Kadimi ntsawa nyunutiwa. 36Nu nthu lissen lela khi pi nkishen la, kepaghenanye nthu na alissen kesü la sa pi miki nyelela nimugho keya nmi. 37‘Anle’ nyelela ‘nyele’ ketan khilo, nthu na tsü miwi kekhi tsüna Atsaghang wina kegho.

Ajukhikeya Cüki pi Kesansi

(Luk 6.29-30)

38 # Bvü 21.24; Lev 24.20; Aye 19.21. “Nthu na hati kekhi la zayadha, ‘Anyon kesü mithon anyon kesü, nu ayha kesü mithon ayha kesü’. 39Isala hi khili nthu kizaden: nyu na nthu tuwi sazzi lela ajukhi meya lalo. Keujüla nyu na nthu dhibe ajewa cen cü lethu, ma yala nthu dhibe tavüwa la cen thsülo. 40Keujüla nyu na nthu gwomejuwa khuya mvu nu nthu ssinu ajühkaghaten lethu, ma yala nthu thsü la khuya thsülo. 41Nu keujüla anyi kesü na nthu meten pi ma gweghe kilometer kesü walo sa lethu ma ssinu kilometer keni walo. 42Nyu na nthu wi pala pahan khie lethu pi ma cülo; nyu na nthu wi pala nnaya mvu ben lethu pi ma nkenna thsü nsa lalo.

Ghinyithu Ketizen

(Luk 6.27-28,32-36)

43“Nthu na ‘Nthu pvüshangthu tizenya nu nthu ghinyithu nanmeghülo’ kekhi tsü la zayadha. 44Isala hi khili nthu kizaden: nthu ghinyithu tizenya nu nthu metenmesha ketenthu ghena khielo, 45isanu nthu na nthu Ba tang wi kebenwa tsangathu sayale kesalina. Kepaghenanye ma aghani pi anyi kemehaithu nu nkemehaithu tsüdi miwi wegü nu atsangho pi anyi kemehai nu nkemehai kekulithu tsüdi miwi chiden. 46Keujüla nthu na anyi nthu tizen ketenthu ketan tizen lethu Anyiza na mangwa ghena sawegü pi nthu cü nu? Khajana kekhüthu lela tsü makesü sa keten na! 47Nu keujüla nthu na nthu pvüshangthu ketan ccüneng ten lethu nthu na anyi jümuthu miwi kemehai mangwa sa theng nu? Anyiza nkechüthu la tsü makesü sa nten kwe? 48#Lev 19.2; Aye 18.13. Nthu Ba tang wi kebenwa na mehai cencu kesa tsüti nthu la mehai cencu nsathu yishü.

Currently Selected:

MATHI 5: RENGNBSI

Highlight

Copy