MATHI 13

Amacükivvüwa pi Ajühkaghape

(Mrk 4.1-9; Luk 8.4-8)

1Tsü ghanan wi Jisu na ajjen tsü teshi nu wa aghajü kete wi donki nu nyu khisansi. 2#Luk 5.1-3.Anyitenti ma vüsen keben tsüna di ntsa sa kesalina ma ahun kesü wi duya nu anyitenti na aghüsa wi ngan. 3Ma ajühkaghape wina pala kejon khi pi mathu kiza.

“Anyi amacü kivvüwa na amacü pi vvü wa. 4Ma amacü pi ma lli wi kivvüchi wi amacü pahan na alen wi qancadu nu awathu na gho mcüa. 5Pahan na ayyi kemehai keu ketan keben alon miwi qancadu. Ciwi ayyi kemehai kejon nkemi ghena amacü na wan shhugho. 6Isala aghani na shhugho tsüthu thsü kechi wi tsüthu ghazan na mehaitsü cha nkeya ghena tsüthu na wan jü wa. 7Pahan na aghazü jawi qancadu nu shigü keshagha wi aghazü na mathu khwensha. 8Isala pahan na ayyi kemehai wi qancadu shigü keshagha wi mabi bünya; pahan na meza, pahan na achentugho, nu pahan na changha tsüti bünya.”

9Jisu na khi, “Keujüla nthu na akhuna ben lethu kinayalo.”

Ajühkaghape Jjügi

(Mrk 4.10-12; Luk 8.9-10)

10Tsaseng wi sansikeyathu na Jisu wi ghonu ma keü, “Mangkesa na anyithu na no keccüneng wi no ajühkaghape khiten nu?”

11Jisu luneng, “Kekuthi wina tang Kadiyyi cüki chüya keten pi nthu cüdha, isala mathu ghena tsü tsüti nyele! 12#Mat 25.29; Mrk 4.25; Luk 8.18; 19.26. Kepaghenanye anyi thowa na pala pahan ben khe pi wwa neng cüden, isanu ma ji ntsa benya thsüden; isala anyi thowa na mangla nmi khe ma keu ketan keben tsü lela sen bvüaben. 13Hi ajühkaghapethu wi na mathu keccüneng tsüna ma jjügi hale: mathu na ghang lela muya nben, mathu na kina lela za nu chüshiya nben. 14#Isa 6.9,10. Tsalina Isa na atusenjüh-kekhi tsüna mathu ghena saaben:

‘Anyi hathu ha kina nu kina lela chüshiya nben;

mathu na ghang nu ghang lela muya nben,

15kepaghenanye mathu leben na jengdha,

mathu akhuna tecu nu mathu nyon na jangdha.

nyelethu, mathu nyon na mu,

mathu khuna na za,

nu mathu leben na chüshiya kesa;

isanu mathu na hi wi gho nu hi mathu sa pi mehai cüa kesale,

Anyiza na khi.’

16 # Luk 10.23,24. “Isala nthu na acenpvü keben ntsale! Nthu nyon na muben, nu nthu khuna na zaben. 17Hi nthu kizaden, atusenjüh-kechüthu nu ketsatanthu kejon la nthu na mu keben ha muya mvuthi sa lela mu meya, nu nthu na za keben ha zaya mvuthi sa lela za meya.

Jisu Na Amacü kivvüwa Jjügi Khimethakechi

(Mrk 4.13-20; Luk 8.11-15)

18“Tsalina amacü kivvüwa pi ajühkaghape ha ma jjügi mangwa khe chüyalo. 19Anyi na Kadiyyi cüki tsü zaya lela ma jjügi nkechüthu tsüna amacü na alen wi keqancathu ti kesa. Atsaghang na gho nu pi mathu leben wi yangchi ketheng tsü sen bvüa. 20Amacü alon miwi keqancathu tsüna anyi na ajüh tsü zakeya wi anonghe ntsa nu tsü yakeyathu. 21Isala mathu ghazan cha meya nu matsü kesie ben meya. Tsalina ajüh tsüwa ghena ketizenkesa nu kemeten-kemesha na kegho wi mathu na wan tsü teshia. 22Amacü aghazü jawi keqancathu tsüna anyi na ajüh tsü za keyathu, isala mathu kahang wi ahathakina nu keben kenmvu na ajüh tsü khwensha nu mathu bi bün meya la. 23Amacü ayyi kemehai wi keqancathu tsüna anyi na ajüh tsü zaya nu chüya kesathu: mathu pahan na abi meza, pahan na abi achentugho, nu pahan na abi changha tsüti bünya.”

Adeghesu Pi Ajühkaghape

24Jisu na ajühkaghape kepa wi la pi mathu kiza: “Tang Kadiyyi na hati kesa. Anyi kesü na amacü kemehai pvü wa ma lli wi vvüchi. 25Ghaja wi anyithu tsüdila jen watha kesa seng wi aghinyi kesü na adeghesu sen wa asu jawi vvüchi nu bvüa. 26Asu na shigü shagha nu bün keya wi adeghesu muya. 27Anyi tsüwa maghathu na gho ma wi khi, ‘Kediwa, no amacü kemehai pi nlli wi nvvüchi kwe?’ 28Ma luneng, ‘Aghinyi pahan na tsüti sa theng.’ Mathu na ma wi keü, ‘No ikhang ya wala adeghesuthu tsü pfü thsü mvu ben kwe?’ 29Isala ma khineng, ‘Nyele, kepaghenanye nthu na adeghesuthu saghu kewa wi asuthu la pfüghu shaben. 30Makesasa manyi gweghe allikewwi tsü npi kecu chu shigü benla thsülo. Nu allikewwi tsüwi hi kewwithu kizala, atuwa sa adeghesuthu tsü saghu pi bhenya nu pi annibhon wi khala chilo. Isala asu tsü saghu pi isabe wi chilo kizaden.’ ”

Hanuwencü Pi Ajühkaghape

(Mrk 4.30-32; Luk 13.18-19)

31Jisu na ajühkaghape kepa wi khi pi mathu kiza: “Tang Kadiyyi tsüna hati kesa. Anyi kesü na hanuwencü pi ma lli wi yangchi. 32Tsüna pala cüghe jawi kizza ntsawa, isala shigü keshagha wi aghang tsüdi jawi keti ntsawa saden. Tsüna maton sa shaghathu awathu na gho ma cünathu cakhu wi mathu ghacen saden.”

Azimi Pi Ajühkaghape

(Luk 13.20-21)

33Jisu na tsü miwi la ajühkaghape pi mathu kiza: “Tang Kadiyyi tsüna hati kesa. Nza kesü na azimi khuya nu pi ashijü kecheng wi awheng saghu nu maben la azimi npi ceng keshhugho chu pi ketheng tsüti le.”

Jisu na Ajühkaghapethu Kesen

(Mrk 4.33-34)

34Jisu na ajühkaghapethu sen nu hathu ha tsüdi pi anyitenti kiza; ma ajühkaghape nsenla pala kesü la pi mathu nkiza. 35#Zak 78.2 Atusenjüh-kechü na kekhi tsü ntsakhiwa sacenya thsüle kesalina ma hati sa,

“Hi mathu keccüneng wi ajühkaghapethu senden;

Hi kheni ayyi sahangkechi wina npi kechü jithu pi mathu kizaden.”

Jisu na Adeghesuthu pi Ajühkaghape Jjügi Kekhi

36Jisu na anyitenti teshi nu ajjen non wi kedu wi ma sansikeyathu na gho ma wi keü, “Alli wi adeghesuthu pi ajühkaghape tsü ma jjügi mangwa khe pi ikhang kizalo.” 37Jisu na luneng, “Anyi amacü kemehai pi vvükechiwa tsüna Anyi Tsawa; 38alli tsüna ayyi; amacü kemehai tsüna anyi Kadiyyi ji saya kesathu; adeghesuthu tsüna anyi atsaghang ji sa kesathu; 39nu adeghesuthu pi vvükechiwa tsüna atsaghang. Allikewwi tsüna kahang sakhen, nu kewwithu na tangnyilothu. 40Adeghesuthu saghuya nu pi annibhon wi mecang kesa tsüti kahang sakhen wi la tsü makesü saben: 41Anyi Tsawa na ma nyilothu kesun pi ma Kadiyyi wi anyithu nyu sa pi sami thsü nu anyi nkemehai sa ketenthu tsüdi saghuya thsüaben, 42nu mathu na anyi tsüthu pi anni kisa ntsa wi khala chi nu ciwi mathu na qai nu ayha kemeküli ben. 43Tsaseng wi anyi ketsatanthu na aghani ti mathu Ba Kadiyyi wi wegü ben den. Keujüla nthu na akhuna ben lethu kinayalo!

Kekuthi Keben-keyeng Pi Ajühkaghape

44“Tang Kadiyyi tsüna hati kesa. Anyi kesü na alli wi kekuthi keben tsü muya. Ma tsü shanbhon neng, nu ma nonghe ntsa wala ma keben tsüdi pi jeü, isanu wala alli tsü sheiya.

Mejüti pi Ajühkaghape

45“Tang Kadiyyi tsüna hati la kesale. Anyi kesü na mejüti kemehai tsü bhaden, 46nu ma wa tsüna mehai ntsa kesa mukeya wi, wala ma keben tsüdi pi jeü, nu mejüti tsü sheiya.

Kaghanthsü Pi Ajühkaghape

47“Tang Kadiyyi tsüna hati la kesale. Anga kaghanthu pahan na mathu kaghanthsü pi aghajü wi cüchi nu anga alen kepapa kesa tsüdila ghanya. 48Mathu kaghanthsü pong keya wi tsü zanshi pi aghüsa wi chi nu donki nu tsü ghaka; kemehaithu pi mathu ngakhang wi chiya nu nkemehaithu pi khala. 49Kahang sakhen wi hati saben: tangnyilothu na wala anyi kemehaithu jawi nkemehaithu saghuya, 50nu mathu pi anni kisa ntsa wi cüchi nu ciwi mathu na qai nu ayha kemeküli benden.

Ketheü Tsentsawa nu Kaghawen

51“Nthu na hathu ha chübenla nu?” Jisu na tsüti mathu keü. Mathu na “Chübenle” khineng.

52Tsalina ma khineng, “Hawa ha ma jjügi, Ayenkesansithu tsüdila tang Kadiyyi nyi sayakea tsüna ajjen pvüwa na ma keben ketheng jjen wi pala ketheü nu kaghawen khushikeya tsütile.”

Nazareth wi Jisu Meya Mvula kesa

(Mrk 6.1-6; Luk 4.16-30)

53Jisu na ajühkaghape hathu ha kekhi seng wi apen tsü teshi theng nu 54ma nyutiwa wi tsü wa neng. Ma sinagog wi nyu sansi nu ma jüh za keyathu tsüdila amansa nu keü, “Anyi hawa ha ma khie wi kemetsa nu amankesa kekulithu kekhang ha muya nu? 55Ma achankecüwa tsa tsü nye kwe? Ma jja na Maria nu James, Josef, Simon, nu Judah hathu na ma cünyuthu nye kwe? 56Ma tssüggüthu tsüdila hewi hang nben kwe? Ma khie wi hathu ha muya nu?” 57#Jhn 4.44 Tsalina mathu na ma meya mvula. Jisu na mathu wi khi, “Atusenjüh- kechüwa tsüna ma nyuti nu ma jjen wi ketan khe kahe wi tsüdila ma kinyikü den.” 58Mathu kenondi nkemi ghena ma ciwi amankesa kejon nkulichi.

Currently Selected:

MATHI 13: RENGNBSI

Highlight

Copy