MATHI 12

Sabbath Jjügi Kekeü

(Mrk 2.23-28; Luk 6.1-5)

1 # Aye 23.25. Sabbath ghanan wi Jisu na allithu pahan pvüdhi sen nu wa. Ma sansikeyathu na ghamaya kesalina asubi mahang pi dsaben. 2Farisithu na ha muya theng nu Jisu kiza, “Ghangchilo, no sansikeyathu na Sabbath ghanan wi hati kesa ha ithu Yenwa tsü shun benle!”

3 # 1 Sam 21.1-6. Jisu na khineng, “David na ghamaya kesa seng wi ma nu ma pvüshangthu na khati sa khe nthu na tsü si meya kwe? 4#Lev 24.9.Ma Anyiza jjen wi dunu ma nu ma pvüshangthu na keqhaikedithu ketan khe mathu dsakeya Ayen nkemi mesa pi Anyiza kecüwa tsü dsa. 5#Scs 28.9,10. Nyelela nthu na Mosa Yenwa wi Sabbath ghanan kaghapenla keqhaikedithu na Kekinyijjen wi Sabbath tsathang yen pakhhi lela mathu na nsamile kesa tsü si meya kwe? 6Hi nthu kizaden, pala pahan Kekinyijjen miwi kediki na he wi benle. 7#Mat 9.13; Hos 6.6. Ntsawajüh na khiben, ‘Hi nanketizenwa nen khe asahang pi ahhansha kesawa tsü nye.’ Keujüla nthu na ha ma jjügi chü lethu, nthu na anyi kesami nkemithu tsü meshensa nkesale. 8Kepaghenanye Anyi Tsawa hana Sabbath Pvüwa lale.”

Anyi Kesü Ma kwen kecügüshü

(Mrk 3.1-6; Luk 6.6-11)

9Jisu na apen tsü teshi theng nu sinagog wi wa nan 10ciwi anyi kesü ma kwen kecügüshü na ben. Anyi pahan na ciwi ben nu Jisu kesazzi muthu ma kiminni cüle saben, tsalina mathu Jisu wi keü, “Sabbath ghanan wi nyu sa pi mehai kecü Ayen benla nmi nu?” 11#Luk 14.5. Jisu na luneng, “Keujüla nthu meshu kesü na khaghaneni kesü ben nu Sabbath ghanan wi ayyiku wi khulidu lethu khati saten nu? Ma wala tsü zanshia nben kwe? 12Anyi na khaghaneni miwi ma men dhuki le! Tsalina Sabbath ghanan wi anyi pahan kiqa kecüu Ayen na benle!” 13Tsaseng wi ma anyi ma kwen kecügüshüwa wi kiza, “Nkwen chang chilo.” Ma ma kwen chang chinan tsüna pahanwa ti mehai nengya. 14Tsaseng wi Farisithu na apen tsü teshi nu wala Jisu pathiale acho kidenya.

Anyiza na Kessikeya Maghawa

15Jisu na nyu ma pathiale kiden keben chükeya seng wi apen ciwi na bvüa; nu anyitenti na ma nieden. Ma kesakinaathu tsüdi sa pi mehai cü, 16nu ma cüki pi nyu kepa wi nkiza lalo kesa mathu wi kiza. 17Anyiza na Isa atusenjüh-kechüwa wi khichi ketheng tsü ntsakhiwa sacenya thsüle kesalina ma ha sachi:

18 # Isa 42.1-4. “Hawa ha imagha, hi ma kessikeyawa,

hi ma ghali, nu ma hi kenen ntsawa.

Hi ighamu kesun pi ma miwi chiden,

nu ma hi ajühkaghaten ketenwa tsü pi nyu kizaden.

19Ma magha nu nyu ssinu kecücanli nben,

nyelela alentonti wi jisha nu ajühkhi nben.

20Ma ahuphon kesü ncü kebenwa tsü pashi nben,

nyelela ahula khwenkhwe kebenwa tsü la patenyen nben.

21Ma atsentsawa tsü npi khangkeya chu khiben,

nu anyi tsüdila kenondi pi ma miwi chiben.”

Jisu nu Beelzebul

(Mrk 3.20-30; Luk 11.14-23)

22Tsaseng wi anyi pahan na anyi kesü atsaghang ma miwi keben ghena anyon nmu nu ajühkhi meya kesawa tsü ssinu Jisu wi gho. Jisu na anyi tsüwa sa pi mehai cü, nu ma ajühkhiya nu pala muya. 23Anyitenti tsüdi Jisu kekuli tsü mu pi amansa nu khi, “Ma David Tsawa tsü nye kwe?”

24 # Mat 9.34; 10.25. Farisithu na ha zaya nu khineng, “Beelzebul atsaghangthu kediwa na kekhang pi ma kecü ghena ma atsaghangthu jügüshiya benle.” 25Jisu na mathu kemeshen tsü chüya nu ma mathu wi kiza, “Kadiyyi kesüsü tsüdila gishüzighe pi khokho ssinu aghisa ben lethu dediden. Nu anyuti nyelela atheghi kesüsü tsüdila gishüzighe pi khokho ssinu aghisa ben lethu qancaden. 26Tsalina keujüla Satan kadiyyi tsü gishüzighe pi khokho ssinu aghisa ben lethu ma kadiyyi tsüna khati nu ngan benya mehai nu? 27Nthu na Beelzebul na kekhang pi hi cü nu hi atsaghangthu jügüshiya benle khiben. Isathu, thowa na kekhang pi nthu nyithu cü nu tsüthu jügüshiya thsü nu? Tsalina nthu kekuli ketanla nthu na sazzi benle kesa chüyaben! 28Nyele, Beelzebul na nye, isala Anyiza Ghamu kekhang pi hi cü nu hi atsaghangthu jügüshiyaben, tsüna Anyiza Kadiyyi na nthu miwi ghodha kesa chütiyaben. 29“Anyi thola atuwa sa anyi kezüwa tsü bhen nkesa tsü ma anyi kezüwa jjen wi dula ma tsanqaithu tsü khuya nben; Tsaseng wi ccüna ma jjenwa tsü yasaya mehai. 30#Mrk 9.40. “Anyi thowa na hi wiwa nye khe ma hi shunden; thowa na hi gweghe pala saghu nten khe ma ntsakhiwa pazighe ben. 31Hi ha jjügi ghena nthu kizaden: anyithu kesami nu mathu nkemehai kekhi tsüdila kesami teshi pi cüya mehai, isala thowa na Kemetha Ghamu kethenjüh khi khe kesami teshi pi cü keya nmi. 32#Luk 12.10. Anyi kesü le kesü lela Anyi Tsawa kethenjüh khi lela kesami teshi pi cüya mehai, isala thowa na Kemetha Ghamu kethenjüh khi khe khili le anuphan wi lela kesami teshi pi cü keya nmi.

Achanton kesü nu Mabi

(Luk 6.43-45)

33 # Mat 7.20; Luk 6.44. “Achan mabi kemehai muyale kesalina nthu maton kemehai ben meyathu yishü, keujüla nthu na maton nkemehai ben lethu mabi la nkemehai muyaden. Kepaghenanye achanton tsüna khati kesa khe mabi wina chüyaden. 34#Mat 3.7; 23.33; Luk 3.7; Mat 15.18; Luk 6.45. Amaghangthu, nthu na nmehai lethu khati nu pala kemehai khiya mehai nu? Kepaghenanye aleben wi mangwa na pong ben khe apang wi tsü khishü shhugho den. 35Anyi kemehaiwa na ma pala kemehai keben wina kemehai sen shhugho den; nkemehaiwa na ma pala nkemehai keben wina nkemehai sen shhugho den.

36“Hi nthu kizaden, Ajühkekaghaten tsathang wi anyi tsüdila ma ajüh nkemehai kekhi cüki tsüdila khuchiden. 37Kepaghenanye nthu jüh kenie wina nthu ghan nan, nu nthu mehaiya nyelela meshensa ben.

Amankesa Kekhie

(Mrk 8.11-12; Luk 11.29-32)

38 # Mat 16.1; Mrk 8.11; Luk 11.16. Tsaseng wi Ayenkesansithu nu Farisithu pahan na ma wi khi, “Ikhang na no amankesa kulikechi ghangchi mvu benle.” 39#Mat 16.4; Mrk 8.12. Jisu na mathu wi khineng, “Nansü anyithu ha khatila nmehai nu Anyiza nchüdha nu! Nthu na hi wi amankesa kesü khie ben la? Nyele! Jonah atusenjüh-kechüwa na amankesa sa kechi ketan khe kepa wi pi nthu ncüdha. 40#Jon 1.17. Jonah na ghanan kecheng ghaja kecheng anga keti pvü non wi keben tsüti Anyi Tsawa la ghanan kecheng nu ghaja kecheng ayyi kedhu non wi benden. 41#Jon 3.5. Ajühkaghaten tsathang wi Nineve nyithu na shagha nthu kiminni ben, kepaghenanye mathu na Jonah jüh kekhi zakeya wi mathu na kesami wina khapegheya; hi nthu kizaben, hewi pala pahan Jonah miwi kediki na benle! 42#1 Kad 10.1-10; 2 Kc 9.1-12. Ajühkaghaten tsathang wi Sheba wi Kadijja na shagha nthu kiminni ben, kepaghenanye ma diyyi kelensie wina gho Kadimi Solomon kemetsa kesansijüh tsü kinaya; hi nthu kizaben, hewi pala pahan Solomon miwi kediki na benle!

Nkemehai Ghamuwa na Keghoneng

(Luk 11.24-26)

43“Nkemehai ghamu kesü na anyi kesü wina bvü lethu, ma ayyi tsüdi wi wa ma keben pen bhaden. Keujüla tsü nmula lethu, 44ma ketanla hati khiben, ‘Hi kheni ijjen teshi kesawa wi tsü wha neng den!’ Tsalina ma wha neng nan ajjen tsüna kaghacang, satemetha nu kiden pi mehaitsü kethengla muya. 45Tsaseng wi ma wala ma miwi nkemehaiki ghamuthu tagü ssigho ciwi hang wa. Tsalina tsüti sa keya wi anyi tsüwa cüki na kheni miwi nmehaiki la. Nansü tsüwi anyi nkemehaithu miwi hati saben.”

Jisu Jja nu Ma Cünyuthu

(Mrk 3.31-35; Luk 8.19-21)

46Jisu na ma jja nu ma cünyuthu na gho lela ma anyithu wi ajühkhi ben. Mathu na akhemi wi ngan nu ma ccünengle hieben. 47Tsalina ciwi anyi kesü na ma wi kiza, “Ghangchilo, njja nu ncünyuthu na akhemi wi nganben, nu mathu no ccüneng mvu benle.” 48Jisu na luneng, “Anyi thowa na ijja nu icünyuthu nu?” 49Tsaseng wi ma sansikeyathu tsütson nu khi, “Ghangchilo, hathu ha ijja nu icünyuthu le! 50Anyi thowa na iBa tang wi kebenwa na ma ya sa thsü mvu keben tsü saten khe tsüna icünyuwa, itssüggüwa, nu ijja le.”

Currently Selected:

MATHI 12: RENGNBSI

Highlight

Copy