MATHI 11

Johan Baptizwa wina Nyilothu Kegho

(Luk 7.18-35)

1Jisu na kecükegwe hathu pi ma sansikeyathu Taghakeni kecü seng wi ma apen tsü teshi theng nu wala anyutithu tsü kevü wi nyu khisansi nu zhüsansi wa.

2Johan Baptizwa na atssüzüjjen wina Khrista cüki tsü zaya nu ma sansikeyathu pahan kesun pi ma wi chi 3nu keü, “No ghotenle kesawa tsüla, ithu na kepa wi hie benla nu?” 4Jisu na luneng, “Wala, nthu na mangwa muya nu zaya khe pi Johan kizalo: 5#Isa 35.5,6; Isa 61.1. anyon nkemuthu na muya, accü nkemehaithu na lentsenya, agükedsakenaathu sa pi mehai cü, akhuna ketecuthu na zaya, keshüthu sa pi hang neng cü, nu Ajühkemehaiwa pi ketha-uthu kiza bendha. 6Imiwi kesütu nkesathu na kemihhi ntsa.”

7Johan sansikeyathu na bvü keten wi Jisu na ma cüki khi pi anyitenti kiza, “Nthu aghansha witsü Johan wi mangwa muya benle meshen nu ciwi wa nu? Ameghü na aghangwa mo kuli keben tsü kwe? 8Nthu na mangwa ghang wa nu? Anyi kesü na athsümeni mehaitsü keten pvü keten tsü kwe? Anyi kadijjen wi kahangthu ti athsümeni kemehai pvü keten tsü kwe? 9Hi kizalo, nthu na mangwa ghang wa nu? Atusenjüh-kechü kesü kwe? Anle ntsakhiwa, isala nthu na atusenjüh- kechü kesü miwi kediki muyadha. 10#Mal 3.1. Kepaghenanye tsüna Johan, Ntsawajüh na ma ghena khiben: ‘Anyiza na khi, hi ntuwi na hi nyilo kesun pi nghena alen sa thsüden.’ 11Hi nthu kizaden, anyi hang kegho kesü la Johan Baptizwa miwi kediki nmi, isala tang Kadiyyi wi kizza ntsawa na Johan miwi diki. 12#Luk 16.16. Johan na ma ketsijüh pi nyu sansi kegho tsüwi na gho nansü kecu ha yasayalathu na tang Kadiyyi shun ghoben, nu anyi yasayalathu na tsü nkayale sa. 13Johan tsüwa tsü kecu chu atusenjüh-kechüthu tsüdi nu Mosa Yenwa na Kadiyyi cüki tsü khi; 14#Mal 4.5; Mat 17.10-13; Mrk 9.11-13. nu keujüla nthu na mathu jüh tsü nondi mvu lethu, Johan tsüna Elijah, gho benle khi kethengwa tsüle. 15Nthu na akhuna ben lethu kina yalo!

16“Hi mangwa pi nansü nyithu ha ghapeya mehai nu? Mathu na ghanyithu asenkesapen wi donki kebenthu tile. Mathu na khokho wi jishaben, 17‘Ikhang na nthu ghena keshanyi khwi sa lela nthu na n-nashü! Ikhang na nthu ghena keshü khwi sa lela nthu na nqai!’ 18Johan na gho zi nu kisengtssü la njjü nan tsüdila khi, ‘Ma atsaghang ssi tenle!’ 19Anyi Tsawa na gho dsa nu jjü nan anyi tsüdila khi, ‘Anyi hawa ha ghang chilo! Ma ahhaisha nu kisengtssü kejjü nyi, khajana kekhüthu nu kesamithu pvüshang kesüle!’ Kemetsa tsüna ma kekuli wina chütha yaden.”

Nkenondi Nyutithu

(Luk 10.13-15)

20Jisu na amankesa kejon kekuli nyutithu wi kahangthu na mathu kesami wi leben khapeghe meyala, tsalina Jisu na anyutithu tsü kiminni. 21#Isa 23.1-18; Ezk 26.1—28.26; Jol 3.4-8; Amo 1.9,10; Zek 9.2-4. “Nghena kemessi khacu khatila saten nu, Khorazin! Nghena la kemessi khacu khatila saten nu, Bethsaida! Keujüla nshinyi wi amankesa sa kechithu tsü pi Tur nu Sidon wi sachi lethu, ciwi anyithu na kheni na kesami wina mathu leben khapeghe yadhale kesa wina alishithsü mphi nu amihi pi mathu li wi chipvü kesa nan! 22Hi nthu kizaden, Ajühkaghaten tsathang wi Anyiza na nthu miwi Tur nu Sidon nyithu nantizen kayi cüaben! 23#Isa 14.13-15; Ade 19.24-28. Nu Kapernaum, no la! No ketanla no sa pi tang wi chi mvu sa kwe? No pi annighajü wi khalachi cüden! Keujüla no wi amankesa sa kechi tsü pi Sodom wi sachi lethu tsüna nansü la benla kesa nan! 24#Mat 10.15; Luk 10.12. Hi no kizaden, Ajühkaghaten tsathang wi Anyiza na nmiwi Sodom nantizen kayi cüaben!”

Hi wi Gha nu Ccayalo

(Luk 10.21-22)

25Tsü tsüwi Jisu na khi, “IBa, atssan nu ayyi Pvüwa! Hi no sengle, kepaghenanye no pi kemetsa nu kechüthu tuwi kuthi ketheng tsü pi nkechüthu ccücachi kesalina. 26Anle, iBa, hati kesa ha no kemeshen ghena.

27 # Jhn 3.35; Jhn 1.18; 10.15. “IBa na pala tsüdi pi hi cüdha. Anyi kesütanla Abawa nkenye tsü Atsawa chü meya, nu thola Atsawa nkenye tsü Abawa chü meya, nu Atsawa na kessiya kesawa wi ma pi ccüca chiden.

28“Hi wi ghalo, nthu agüccü nu akhhi kekiyan pvü ketenthu tsüdila, hi kecca pi nthu cüden. 29#Jer 6.16. Nthu ikhhi tsü pvüya, nu hi wina chüyalo, kepaghenanye hi ayencüki mehai nu ccatssü; nu nthu na kecca muyaben. 30Kepaghenanye hi akhhi pi nthu cü ketenwa tsüna lekete, nu akhhi pi nthu pvü thsü ketenwa tsüna mbhesi.”

Currently Selected:

MATHI 11: RENGNBSI

Highlight

Copy