LUK 3

Johan Baptizwa na Nyu Kesansi

(Mat 3.1-12; Mrk 1.1-8; Jhn 1.19-28)

1Kadimi Tiberia na kadikesa mapi tagha mangawa wi Pontia Pilat na Judea wi ahng sa, Herod na Galilee wi kekhang sen, nu ma cünyuwa Filip na Ituria nu Trakhonit yyi wi kekhang sen; Lusania na Abilen yyi wi kekhang sen, 2nu Anna nu Kaifa manyi na keqhaikedi ntsathu sa. Tsü tsüwi Zekhariya tsa Johan na ayyikeshü wi keten wi Anyiza jüh na ma wi gho. 3Tsalina Johan na Jordan Ghaku kevü ayyi maben wi wa nu nyu sansi, “Nthu kesami wi leben khapegheya nu baptaiz sayalo, isathu Anyiza na nthu kesami teshi cüben.” 4#Isa 40.3-5 Hana atusenjüh- kechüwa Isa lesüshen wi zhü ketheng tsüti:

“Anyi hhai kesü ayyikeshü wi jishaben:

‘Apvüwa len ghena kidenyalo;

nu ma len satemeshon yalo.

5Ayyiketijü tsüdi sa pi misi,

nu ayikha tsüdi sa pi menni thsüaben.

Alen kekhhakhuthu sa pi meshon,

nu ghagu-ghana sa pi tijü thsüaben.

6Anyi tsüdila Anyiza hangshakeya tsü muyaden.’ ”

7 # Mat 12.34; 23.33 Anyitenti na Johan wi baptaiz sayale shhugho. Ma mathu wi kiza, “Nthu amaghangthu! Thowa na Anyiza leben kekha gho keten wi tsü bvüshhu yalo nthu kiza nu? 8#Jhn 8.33 Nthu na kesami wi leben khapegheyadha le kesa kekulithu sa pi nyu ccücalo. Nu nthu jawi Abraham tsüna nthu baqhai le nkhi lalo. Hi nthu kizaden, Anyiza na alon hathu pi Abraham tsangathu sacüya mehai le! 9#Mat 7.19 Ampvü na achanton ccü wi ben, achanton ma bi nkemehai kebünwa shüchi pi anni wi khala chiaden.”

10Anyithu na ma wi keü, “Isathu, ikhang khati sa nu?”

11Ma luneng, “Anyi thowa na agwomejuwa keni ben khe kesü pi nkemiwa cü, nu anün kebenwa lela tsüti sayalo.”

12 # Luk 7.29 Khajana kekhüthu pahan na ma wi baptaiz sayale gho nu ma wi keü, “Kesansiwa, ikhang khati sa nu?”

13Ma mathu kiza, “Yalo sa ketheng miwi meyala.”

14Süpahithu pahan la ma wi keü, “Ikhang tsü khati sa nu?”

Ma mathu wi khi, “Anyi kesü la meten nu apisa meyala nyelela milikemesa wi thola nkimennila. Nthu thün pi leben ghashu sen tenlo.”

15Anyithu na nkehiecha sa keben ghena mathu tsüdi aleben wi Johan ha Messiya la nyenu isa meshen. 16Tsalina Johan na mathu tsüdi wi kiza, “Hi atssü pi nthu baptaiz saben, isala anyi iseng wi gho ketenwa tsüna imiwi diki. Hi ma ccüguwen lela nlisha qo le! Ma Kemetha Ghamu nu anni wi nthu baptaiz sa cüben. 17Ma amagha kesü ma kwen wi ben, nu tsü pi asu kewhen pi nu ma non pi ma sabe wi chiya, isala ma gwen pi nyen nketen nni wi mecang shaben.”

18Alen kejon wi la Johan na Ajühkemehaiwa pi anyithu sansi nu mathu kahang kemili yalo khi khvu sa. 19#Mat 14.3-4; Mrk 6.17-18 Isala Johan na Herod kha, kepaghenanye ma ma cünyuwa wubvü Herodia tsü yaya, nu pala nkemehai kejonla kuli. 20Tsü miwi nkemehai kekuli tsüna Herod na Johan ghan pi atssüzüjjen wi chia.

Jisu Baptaiz Kesa

(Mat 3.13-17; Mrk 1.9-11)

21Anyi tsüdi baptaiz sa keya seng wi Jisu la baptaiz saya. Ma kekhie sa keben wi tang wi shachi, 22#Ade 22.2; Zak 2.7; Isa 42.1; Mat 3.17; Mrk 1.11; Luk 9.35 nu Kemetha Ghamu na nkhetsü kesü ti ceng sen ma miwi dugho. Nu tang wi ahhai kesü na gho, “No hi kaghaliwa itsa. No hi kenen ntsawa.”

Jisu Bamyithu

(Mat 1.1-17)

23Jisu na ma kahang mapi changha jüwi ma kekuli sa shagha. Nyu na ma Josef tsa le meshen, Josef na Heli tsa, 24ma Matthat tsa, ma Levi tsa, ma Melkhi tsa, ma Janai tsa, ma Josef tsa, 25ma Mattathia tsa, ma Amos tsa, ma Nahum tsa, ma Esli tsa, ma Naggai tsa, 26ma Maath tsa, ma Mattathia tsa, ma Semein tsa, ma Josef tsa, ma Judah tsa, 27ma Joanan tsa, ma Rhesa tsa, ma Zerubbabel tsa, ma Shealtiel tsa, ma Neri tsa, 28ma Melkhi tsa, ma Addi tsa, ma Kosam tsa, ma Elmadam tsa, ma Er tsa, 29ma Joshua tsa, ma Eliezer tsa, ma Jorim tsa, ma Matthat tsa, ma Levi tsa, 30ma Simeon tsa, ma Judah tsa, ma Josef tsa, ma Jonam tsa, ma Eliakim tsa, 31ma Melea tsa, ma Menna tsa, ma Mattatha tsa, ma Nathan tsa, ma David tsa, 32ma Jesse tsa, ma Obed tsa, ma Boaz tsa, ma Salmon tsa, ma Nashon tsa, 33ma Amminadab tsa, ma Admin tsa, ma Arni tsa, ma Hezron tsa, ma Perez tsa, ma Judah tsa, 34ma Jakob tsa, ma Isak tsa, ma Abraham tsa, ma Tera tsa, ma Nahor tsa, 35ma Serug tsa, ma Reu tsa, ma Peleg tsa, ma Eber tsa, ma Shela tsa, 36ma Kainan tsa, ma Arfaxad tsa, ma Shem tsa, ma Noah tsa, ma Lamek tsa, 37ma Methusela tsa, ma Enok tsa, ma Jared tsa, ma Mahalaleel tsa, ma Kenan tsa, 38ma Enosh tsa, ma Seth tsa, ma Adam tsa, ma Anyiza tsa.

Currently Selected:

LUK 3: RENGNBSI

Highlight

Copy